كەشە پرەمەر-مينيستر كارىم ءماسىموۆ ورتالىق جانە جەرگىلىكتى اتقارۋ ورگاندارى باسشىلارىنىڭ قاتىسۋىمەن سەلەكتورلىق كەڭەس وتكىزدى, دەپ حابارلادى پرەمەر-ءمينيستردىڭ ءباسپاسوز قىزمەتى.
وندا الماتى جانە شىعىس قازاقستان وبلىستارىنىڭ اكىمدەرى توتەنشە جاعدايلار زارداپتارىن جويۋ جانە سۋ تاسقىنىنان زارداپ شەككەن ەلدى مەكەندەردى قالپىنا كەلتىرۋ ءىس-شارالارىن ۇيىمداستىرۋ جۇمىستارى جونىندە باياندادى.
الماتى وبلىسىنىڭ اكىمى س.ۇمبەتوۆ اقسۋ اۋدانىنداعى توتەنشە جاعدايدان زارداپ شەككەن ەلدى مەكەندەردەگى جاعدايدىڭ قالىپقا ءتۇسىپ كەلە جاتقانىن, قالپىنا كەلتىرۋ جۇمىستارىنا 52 قۇرىلىس ۇيىمدارى تارتىلىپ, جاڭا ۇيلەر قۇرىلىسى باستالعانىن حابارلادى. قازىرگى كۇنى توتەنشە جاعدايدىڭ زارداپتارىن جويۋ ءۇشىن 2 ميلليارد 700 ميلليون تەڭگەدەن استام اقشالاي جانە ماتەريالدىق كومەك جونەلتىلدى.
تارباعاتاي اۋدانىنداعى اعىمداعى جاعداي تۋرالى شىعىس قازاقستان وبلىسىنىڭ اكىمى ب.ساپارباەۆ حابارلاپ, بۇتىندەي العاندا احۋالدىڭ باقىلاۋدا تۇرعانىن جەتكىزدى. تاسقىنعا قارسى جۇمىستار جۇرگىزۋ ءۇشىن ۇكىمەت 850 ميلليون تەڭگە ءبولدى. قۇتقارۋ جانە قالپىنا كەلتىرۋ جۇمىستارىنا توتەنشە جاعدايلار, كولىك جانە كوممۋنيكاتسيا, سول سياقتى قورعانىس مينيسترلىكتەرىنىڭ كۇشتەرى جۇمىلدىرىلۋدا.
توتەنشە جاعدايلار مينيسترى ۆلاديمير بوجكو مەملەكەتتىك ماتەريالدىق رەزەرۆتەردەن قاجەتتى زاتتار دايىنداۋ جونىنەن جۇمىستاردىڭ باستالعانىن حابارلادى. توتەنشە جاعدايلار قىزمەتىنىڭ ماماندارى وبلىس اكىمدىگى وكىلدىگىمەن بىرلەسىپ, اۋدانداعى قار ەرۋدىڭ جاعدايىن قاداعالاۋدا جانە قاۋىپتى دەگەن ايماقتارداعى سۋ تاسقىنى احۋالىنا ۇنەمى مونيتورينگ جۇرگىزۋدە.
ك.ءماسىموۆ پرەمەر-مينيستردىڭ ءبىرىنشى ورىنباسارى ءو.شوكەەۆكە شىعىس قازاقستان وبلىسىنا بارىپ, اكىممەن بىرلەسە وتىرىپ, جەرگىلىكتى جەردە قاجەتتى شارالار قابىلداۋ جونىندە تاپسىرما بەردى.