قىتاي وكىلدەرى جاڭا كوروناۆيرۋستان قايتىس بولعاندار سانى 106 ادامعا جەتكەنىن ايتتى, ال ۆيرۋستى جۇقتىرعاندار ەكى ەسە كوبەيگەن.
سوڭعى دەرەكتەرگە سايكەس, قىتايدا ىندەتتى 4 515 ادام جۇقتىرعانى بەلگىلى بولدى. بۇل ءبىر كۇن بۇرىنعى كورسەتكىشتەن 2835 ادامعا كوپ.
ەلدە ۆيرۋسپەن كۇرەسۋ ماقساتىندا ساياحاتقا قاتىستى تالاپتار كۇشەيگەن.
كورونوۆيرۋس تاراعان ايماق رەتىندە ۋحان قالاسى مەن حۋبەي پروۆينتسياسىنىڭ اينالاسى قاتاڭ باقىلاۋعا الىنعان, قالادان كىرىپ-شىعۋعا بولمايدى.
ىندەت اۋىر رەسپيراتورلىق ۆيرۋستىق ينفەكتسيا تۋدىرادى, ال ونى ەمدەۋدىڭ ارنايى جولى نە وعان قارسى ۆاكتسينا جوق.
قايتىس بولعانداردىڭ كوبى ەگدە جاستاعى تۇرعىندار مەن وسىعان دەيىن تىنىس الۋ جولىنا بايلانىستى شاعىمدارى بولعان ناۋقاستار.
ىندەتكە بايلانىستى قىتاي جاڭا جىلىن تويلاۋعا ارنالعان شارالار توقتاتىلعان جانە ۆيرۋستىڭ بەلەڭ الۋىن ازايتۋ ماقساتىندا مەيرامعا بەرىلەتىن ارنايى دەمالىس كۇندەرى جەكسەنبىگە دەيىن سوزىلدى.
11 ميلليون حالقى بار ۋحان قالاسىندا بارلىق قوزعالىس توقتاتىلعانىن ايتقان ەدىك. دەگەنمەن, قالا باسشىلىعىنىڭ ايتۋىنشا, ميلليوننان استام تۇرعىن مەيرامعا جانە قاتاڭ تارتىپكە دەيىن وزگە جەرلەرگە ساياحاتتاپ كەتكەن.
قىتايدىڭ وزگە دە ءىرى قالالارى قوعامدىق كولىكتەردىڭ جۇمىسىن توقتاتقان. سونداي-اق شانحاي مەن گونكونگتا ورنالاسقان ديسنەيلەند ويىن-ساۋىق ورتالىعى ۋاقىتشا جابىلدى.
دۇنيەجۇزىلىك دەنساۋلىق ساقتاۋ ۇيىمىنىڭ (World Health Organization) مالىمەتىنشە, الەمنىڭ وزگە ەلدەرىندە 47 جاعداي تىركەلگەن.
قازاقستاننىڭ دەنساۋلىق ساقتاۋ وكىلدەرى ەلىمىزدە ىندەتتى جۇقتىرعاندار جوق ەكەنىن جانە الدىن الۋ شارالارى جولعا قويىلعانىن جەتكىزدى.