الماتى وبلىسىندا تۇراقتى تىركەۋدە تۇرعان 2 048 680 ادامنىڭ 85 پايىزى, ياعني 1 738 679 تۇرعىن مىندەتتى الەۋمەتتىك مەديتسينالىق ساقتاندىرۋ جۇيەسىنىڭ قاتىسۋشىسى ەسەبىنە كىرەدى. ال جىل باسىنداعى ەسەپ بويىنشا وبلىستا جينالعان ءمامس جارناسى 11,2 ملرد تەڭگەنى قۇرادى.
جالپى, مىندەتتى الەۋمەتتىك مەديتسينالىق ساقتاندىرۋ تىزىمىنە ەنگەن 1 183 425 ادام مىندەتتى تولەمنەن بوساتىلعان الەۋمەتتىك ساناتقا جاتسا, 474 514 ادام جالدامالى جۇمىسشىلار قاتارىنا كىرەدى. ال ءمامس باعدارلاماسىنا قاتىسۋشىلاردىڭ تاعى ءبىر قالىڭ شوعىرىن جەكە كاسىپكەرلەر مەن كەلىسىمشارت نەگىزىندە جۇمىس ىستەيتىن تۇلعالار قۇرايدى. ولاردىڭ سانى – 50 088 ادام. سونداي-اق بىرىڭعاي جيىنتىق تولەم جۇيەسى بويىنشا جارنا اۋدارعاندار سانى دا 30 652 ادام شاماسىندا. ال وبلىس كولەمىندە ءمامس باعدارلاماسىنا قوسىلماعان 26 650 ادام قالىپ وتىر.
جاڭا جۇيە بويىنشا جۇرگىزىلەتىن جۇمىس اياسىندا وبلىستا مەديتسينا مەكەمەلەرىن وڭتايلاندىرۋ اياقتالدى. بۇل ءۇردىس بۇعان دەيىن مەملەكەتتىك قازىنالىق كاسىپورىنى نىسانىندا قىزمەت كورسەتىپ كەلگەن اۋرۋحانالاردى شارۋاشىلىق جۇرگىزۋ قۇقىعىنداعى كاسىپورىندارعا اينالدىرۋ مەن تۇرعىن سانى از ەلدى مەكەندەردەگى ەمدەۋ ورىندارىن اۋداندىق دەڭگەيدەگى ەمحانالارعا قوسۋ جولى ارقىلى جۇزەگە اسقان. اتاپ ايتقاندا, ەندى تالدىقورعان قالاسىندا جانە تالعار قالاسىندا ەكى ءىرى ناركولوگيالىق ديسپانسەر بىرىكتىرىلىپ, ءبىر ورتالىقتان باسقارىلاتىن بولسا, وسى ەكى قالاداعى تۋبەركۋلەزگە قارسى كۇرەس ديسپانسەرلەرى دە وڭتايلاندىرۋ جولىمەن قوسىلدى. ال بۇعان دەيىن جەكە ەمدەۋ مەكەمەسى بولىپ كەلگەن قاسكەلەڭ قالاسىنىڭ جۇقپالى اۋرۋلار اۋرۋحاناسى قاراساي اۋدانىنىڭ ورتالىق اۋرۋحاناسىنا بەرىلسە, جاركەنت قالاسى مەن ەسىك قالاسىنداعى پەرزەنتحانالار دا اۋداندىق اۋرۋحاناعا باعىنىشتى بولدى.
بۇعان قوسا وبلىستاعى توسەك سانى 29 ورىنعا جەتپەيتىن بارلىق اۋىلدىق اۋرۋحانالاردىڭ مارتەبەسى الىنىپ, اۋداندىق اۋرۋحانالارعا قوسىلعان. ال جالپى سانى 237 بولاتىن دارىگەرلىك امبۋلاتوريانىڭ جيىرما ءتورتى العاشقى دارىگەرلىك-سانيتارلىق كومەك كورسەتۋ ورتالىقتارى بولىپ قايتا قۇرىلسا, تۇرعىن سانى 1 500 ادامنان اسقان ەلدى مەكەندەردەگى 49 فەلدشەر-اكۋشەر پۋنكتى مەن 13 مەديتسينا پۋنكتى دارىگەرلىك امبۋلاتورياعا اينالعان ەكەن.
سونداي-اق ايماقتىڭ مەديتسينا مەكەمەلەرى «Sagtandyry» ورتالىقتاندىرىلعان جۇيەسىنە قوسىلىپ جاتىر. جاقىن كۇندەرى بۇل جۇمىس اياقتالادى. وسى جۇيە «مىندەتتى الەۋمەتتىك مەديتسينالىق ساقتاندىرۋ» قورى بويىنشا جۇزەگە اساتىن قارجىلىق تولەمدەردى ناقتى ءارى قىسقا مەرزىمدە تولەۋ ءۇشىن قولدانىلماق. بۇگىندە بۇل مىندەت تە تولىقتاي ورىندالدى دەۋگە بولادى. اتاپ ايتقاندا, وبلىستىق, اۋداندىق دەڭگەيدەگى مەكەمەلەردىڭ ينتەرنەتپەن قامتىلۋى 100 پايىزعا جەتكەن. ال شالعاي اۋىلدارداعى ەمحانالاردىڭ عالامتور جەلىسىنە قوسىلۋى Astel جەر سەرىگى ارقىلى جۇزەگە اسىپ جاتىر. قازىر اۋىلدىق ايماقتاعى 588 مەديتسينا مەكەمەسىنىڭ ءتورت ءجۇز الپىس بىرىندە جوعارى جىلدامدىقتى ينتەرنەت ىستەپ تۇر. قالعان مەكەمەلەردى قامتۋ اقپان ايىندا تولىق اياقتالماق.
– وبلىستا مىندەتتى الەۋمەتتىك مەديتسينالىق ساقتاندىرۋ جۇيەسىنە قوسىلۋ بويىنشا ايتارلىقتاي جۇمىس ىستەلدى. اسىرەسە, تەحنيكالىق دايىندىق شاراسىنا كوپ كوڭىل بولدىك. بۇل ءۇشىن ايماقتاعى مەديتسينا مەكەمەلەرىن جاڭا ۇلگىدەگى كەڭسە تەحنيكاسىمەن قامتۋ كۇن تارتىبىنە شىقتى. قازىر وسى مىندەتتى تولىق اتقاردىق. جەرگىلىكتى بيۋدجەت قاراجاتى ەسەبىنەن 952 كومپيۋتەر ساتىپ الىندى. وعان 112 ملن تەڭگە قارجى جۇمسالدى. سول ارقىلى ەمحانالارداعى تەحنيكالىق قولداۋ 100 پايىزعا جەتتى, دەيدى وبلىستىق دەنساۋلىق ساقتاۋ باسقارماسىنىڭ باسشىسى باۋىرجان ىسقاق.
الماتى وبلىسى