مەملەكەت باسشىسى قاسىم-جومارت توقاەۆ Twitter-دەگى پاراقشاسىندا: «ۇكىمەتكە قىتايدا پايدا بولعان كوروناۆيرۋستىڭ قازاقستان اۋماعىنا تارالۋىنا جول بەرمەۋ جونىندە ناقتى ۇيىمداستىرۋ شارالارىن قابىلداۋ تاپسىرىلدى», دەپ جاريالاعان ەدى. مينيسترلەر كابينەتى پرەزيدەنتتىڭ مالىمدەمەسىنەن كەيىن ارنايى كەڭەس وتكىزىپ, ۇكىمەت باسشىسى اسقار مامين بىرقاتار كەشەندى شارالاردى قابىلداۋدى تاپسىرعان بولاتىن.
ەل ازاماتتارىن جەدەل رەسپيراتورلىق اۋرۋلاردان, ونىڭ ىشىندە كوروناۆيرۋستىق ينفەكتسيادان قورعاۋ جانە الدىن الۋ سالاسىنداعى جۇمىسىن ۇيلەستىرۋ ماقساتىندا كەشە دەنساۋلىق ساقتاۋ مينيسترلىگىنىڭ ەپيدەميولوگيالىق احۋال جونىندەگى شتابى ءوز جۇمىسىن باستادى. اتاپ ايتقاندا, قورعانىس كوستيۋمدەرىن, ارنايى جابدىقتاردى جانە قىزۋ تۇسىرگىشتەردى ءوندىرۋدى, ساتىپ الۋدى ۇلعايتۋ شارتتارى جاريالاندى. ۇقك شەكارا قىزمەتىمەن بىرلەسىپ, قازاقستانعا قىتاي اۋماعىنان كىرەتىن ازاماتتاردى تىركەۋدىڭ بىرىڭعاي مالىمەتتەر بازاسىن قۇرۋ جۇمىستارى جۇرگىزىلۋدە. مينيسترلىكتىڭ ءباسپاسوز قىزمەتىنىڭ حابارلاۋىنشا, ۆيرۋستىق ينفەكتسيا بەلگىلەرى بار ادامدارعا تولىق گەنومدىق جۇيەلىلىك كومەگىمەن دياگنوز قويۋدىڭ تەحنيكالىق مۇمكىندىگى قاراستىرىلعان. «سق-فارماتسيامەن» بىرگە ۆيرۋسقا قارسى جانە باسقا دارىلەردىڭ رەزەرۆىن ارتتىرۋ دا كوزدەلگەن. سونداي-اق اۋرۋحانالارداعى توسەك سانىن كوبەيتۋ تۋرالى شەشىم قابىلداندى.
ارنايى بريفينگ وتكىزگەن ەلىمىزدىڭ باس سانيتارلىق دارىگەرى جانداربەك بەكشين قازاقستاندا كوروناۆيرۋسىمەن تىركەلگەندەردىڭ جوق ەكەنىن ايتتى. ونىڭ ايتۋىنشا, قىتايدان جانە باسقا ەلدەردەن كەلگەن ازاماتتار ارنايى مەديتسينالىق باقىلاۋدان ءوتىپ, 14 كۇن دارىگەردىڭ باقىلاۋىندا بولادى. ء«بىزدىڭ ەلشىلىكتەرىمىز قىتاي حالىق رەسپۋبليكاسىنداعى قازاقستاندىق ستۋدەنتتەرمەن تىعىز بايلانىستا. ۋحان قالاسىندا 94 ستۋدەنت بار. قىتاي بيلىگى تىكەلەي تاپسىرما بەردى. ولارعا ازىق-ت ۇلىك, مەديتسينالىق كومەك, كونسۋلتاتيۆتىك كەڭەس بەرۋ جۇمىستارىن جۇرگىزۋ قارقىندى ءجۇرىپ جاتىر. بۇل جۇمىس ۋنيۆەرسيتەتتەردىڭ ءبىرىنشى باسشىلارىنا جۇكتەلگەن», دەدى جانداربەك بەكشين.
ءبىز الەۋمەتتىك جەلى ارقىلى ۋحانداعى قىتاي گەولوگيا ۋنيۆەرسيتەتىنىڭ ماگيسترانتى, جەرلەسىمىز ماعجان بەيسەندى تاپتىق. ونىڭ ايتۋىنشا, اتالعان ۋنيۆەرسيتەتتە 20-عا جۋىق قازاقستاندىق ستۋدەنت ءبىلىم الادى. نەگىزىنەن بارلىعى قىسقى كانيكۋلدا ەلگە ورالعان. الايدا ءۇش دوسى سوندا شىعا الماي قالىپ قويعان ەكەن. «مەن ۋحاننان 6 قاڭتار كۇنى كەتتىم. ول كەزدە جاعداي قازىرگىدەي ەمەس, تۇراقتى ەدى. قازىر سونداعى دوستارىممەن سويلەسىپ وتىرمىن. قۇدايعا شۇكىر, ەشقايسىسى بۇل ىندەتكە شالدىققان جوق. قازىر قالا مۇلدە جابىق, ءتىپتى حۋبي پروۆينتسياسىنا ەشكىمدى كىرگىزبەي جاتىر ەكەن. ترانسپورت توقتاتىلىپتى. ءۇش دوسىم سوندا. قازىر جاتاقحانادا ەكەن. ازىق-ت ۇلىكتى جەتكىلىكتى العاندارىن ايتتى. دۇكەندەرگە شىعا الادى. قىستىق كانيكۋل ۋاقىتى 16 اقپانعا دەيىن ەدى. بىراق قازىرگى جاعدايعا بايلانىستى دەمالىس تاعى دا ۇزارتىلادى دەپ جاتىر. ازىرگە ناقتىلانعان جوق», دەيدى ول.
25 قاڭتاردا الماتى قالاسىنىڭ اۋەجايىندا «ىستانبۇل – ۋحان – ىستانبۇل» باعىتىنداعى TCCJ چارتەرلىك رەيسى ايالداعان بولاتىن. اقپارات قۇرالدارىندا بورتتا كوروناۆيرۋسىن جۇقتىرعان جولاۋشىنىڭ بار ەكەنى تارادى. حالىقتى دۇرلىكتىرگەن اقپاراتتى تەرىسكە شىعارعان جانداربەك بەكشين: «وندا ۆيرۋس جۇقتىرعان جولاۋشىنىڭ بولعاندىعى تۋرالى اقپارات جوق. حالىقارالىق الگوريتم بويىنشا ۇشاق ءبىزدىڭ اۋەجايعا قوندى جانە ءبىزدىڭ باقىلاۋىمىزدا بولدى. ودان كەيىن ۇشاق سانيتارلىق قونۋعا جىبەرىلدى. وندا جانارماي تولتىرىلدى, بۇل ۇشاقتىڭ ءبىر دە ءبىر ۇشقىشى نەمەسە جولاۋشىسى قازاقستان اۋماعىنا كىرگەن جوق», دەدى.
حالىقارالىق رەيستەردى ورىندايتىن «ەير استانا» اۋە كومپانياسىنىڭ ءباسپاسوز قىزمەتى قىتايعا رەيستەر كەستە بويىنشا ورىندالىپ جاتقانىن حابارلاپ وتىر. «كوروناۆيرۋستىڭ الدىن الۋ ءۇشىن «ەير استانانىڭ» جولاۋشىلارى قىتاي قالالارىنداعى جانە الماتى مەن نۇر-Cۇلتان قالالارىنداعى اۋەجايلاردا تەپلوۆيزوردان مىندەتتى تۇردە وتەدى. قىتاي بيلىگى شەتەلگە تۋريستىك توپتاردى جىبەرۋدى توقتاتتى. ناتيجەسىندە ءۇرىمشى, بەيجىڭ جانە گونكونگ قالالارىنىڭ تۋريستىك توپتارى حالىقارالىق رەيستەرگە, سونىڭ ىشىندە «ەير استانا» اۋە كومپانياسىنىڭ قازاقستانعا جانە باسقا دا باعىتتارى بويىنشا بيلەتتەرىن قايتارۋدا. وسى باعىتتا ء(ۇرىمشى, بەيجىڭ, گونكونگ) ۇشاتىن جولاۋشىلاردىڭ الاڭداۋشىلىعىن ەسكەرە وتىرىپ, «ەير استانا» باعىتتى وزگەرتۋدى, بيلەتتى قايتا برونداۋدى نەمەسە قايتارۋدى ايىپپۇلسىز جۇزەگە اسىرادى», دەلىنگەن حابارلامادا.
ال قىتاي بيلىگى اۋرۋدىڭ ءسات سايىن ءورشىپ بارا جاتقانىن حابارلادى. قىتاي حالىق رەسپۋبليكاسىنىڭ ۇلتتىق دەنساۋلىق ساقتاۋ كوميسسياسىنىڭ توراعاسى ما تسزياوۋي بەيجىڭدەگى ءباسپاسوز كونفەرەنتسياسىندا كوروناۆيرۋستىڭ سيپاتى تۋرالى اقپاراتتىڭ ماردىمسىز ەكەنىن, ونىڭ مۋتاتسياسىمەن بايلانىستى الدىن الا قاۋىپ-قاتەرلەرىن بولجاۋ قيىنعا ءتۇسىپ وتىرعانىن ايتتى. سوڭعى دەرەكتەرگە سۇيەنسەك, 81 ادام قايتىس بولعان. قازىرگە دەيىن 2823 ادام جۇقتىرىپ, ونىڭ 58-ءى جازىلىپ شىققان. ال جۇقتىرعان بولۋى مۇمكىن دەگەن كۇدىكتى ادامداردىڭ سانى 6 مىڭعا جۋىقتاپ قالدى.