كەشە ورتالىق كوممۋنيكاتسيالار قىزمەتى الاڭىندا ەۋرازيالىق ەكونوميكالىق وداق ەلدەرىنەن قازاقستانعا اكەلىنگەن اۆتوكولىكتەردى ۋاقىتشا تىركەۋ جانە ەسەپكە قويۋ ماسەلەسىنە ارنالعان ءباسپاسوز كونفەرەنتسياسى ءوتتى.
جيىنعا ىشكى ىستەر ءمينيسترىنىڭ ءبىرىنشى ورىنباسارى مارات قوجاەۆ, ساۋدا جانە ينتەگراتسيا ۆيتسە-ءمينيسترى جانەل كۋشۋكوۆا, قارجى مينيسترلىگى مەملەكەتتىك كىرىستەر كوميتەتىنىڭ توراعاسى مارات سۇلتانعازيەۆ قاتىستى. اتالعان ۆەدومستۆو وكىلدەرى داۋلى ماسەلەگە بايلانىستى بىرلەسىپ اتقارىپ جاتقان جۇمىستاردىڭ جاي-جاپسارىن باياندادى.
ىشكى ىستەر ۆيتسە-ءمينيسترى مارات قوجاەۆتىڭ ايتۋىنشا, ەاەو ەلدەرىنەن اكەلىنىپ, قازاقستاندا ۋاقىتشا تىركەلگەن كولىكتەرگە «18» دەگەن تسيفرى بار ارنايى سارى نومىرلەر بەرىلەدى.
– ۋاقىتشا تىركەۋ ءۇشىن كولىك يەلەرى جەكە كۋالىگىن, كولىكتىڭ بۇرىنعى مەملەكەتتىك نەمەسە ترانزيتتىك ءنومىرىن, تىركەۋ تۋرالى كۋالىگىن, مەنشىك قۇقىن راستايتىن قۇجاتتارىن, سونىمەن قاتار باستاپقى تىركەۋ باج تولەمىنىڭ تۇبىرتەگىن, مەملەكەتتىك ءنومىر مەن تەحنيكالىق پاسپورت دايىنداعانى ءۇشىن باج تولەمىنىڭ تۇبىرتەگىن اكەلۋى كەرەك. كولىك يەلەرىنە قويىلىپ وتىرعان شارت وتە قاراپايىم, ءبىر جىل ىشىندە اتالعان اۆتوكولىكتى زاڭداستىرۋعا, ۋتيليزاتسيا الىمىن جانە كەدەندىك باج سالىعىن تولەۋگە مۇمكىندىك بەرىلدى, – دەدى ول.
وتكەن اپتادا ۇكىمەتتىڭ كەڭەيتىلگەن وتىرىسىندا مەملەكەت باسشىسى ۇكىمەتكە ەل زاڭناماسىن بۇزا وتىرىپ شەتەلدەن اۆتوكولىكتەردىڭ اكەلىنۋىنە, پايدالانىلۋىنا شەكتەۋ قويۋدى تاپسىرعانى بەلگىلى. پرەزيدەنت بۇل تۋرالى: «ەلىمىزگە اكەلىنگەن مۇنداي اۆتوموبيلدەردىڭ كوپشىلىگى تىركەۋگە قويىلمايدى. ونداي كولىكتەر سانى – ونداعان مىڭ. باس پروكۋراتۋراعا قالىپتاسقان جاعدايعا بايلانىستى قۇقىقتىق باعا بەرۋدى تاپسىرامىن. اتالعان ماسەلەنى شەشۋ ءۇشىن ۇكىمەت قازاقستانعا ەۋرازيالىق ەكونوميكالىق وداققا مۇشە ەلدەردەن 2020 جىلدىڭ 1 اقپانىنا دەيىن اكەلىنگەن اۆتوموبيلدەردى ءبىر ايدىڭ ىشىندە ءبىر رەتتىك تارتىپپەن ۋاقىتشا تىركەۋدى قامتاماسىز ەتۋى قاجەت. بۇل اۆتوكولىكتەردى تىركەۋ 2021 جىلدىڭ 1 ناۋرىزىنا دەيىن جالعاسادى», دەگەن بولاتىن.
ىشكى ىستەر ۆيتسە-ءمينيسترىنىڭ ايتۋىنشا, سارى ءتۇستى, «18» تسيفرى جازىلعان نومىرلەر پرەزيدەنت ايتقان مەرزىمگە, ياعني كەلەسى جىلدىڭ 1 ناۋرىزىنا دەيىن جارامدى. ەگەر ازاماتتار سوعان دەيىن جوعارىدا ايتىلعان تىركەۋ شارالارىن جاساماسا, نومىرلەر ودان كەيىن جارامسىز دەپ تانىلىپ, پوليتسيا ونداي كولىكتەردىڭ ەل اۋماعىندا جۇرۋىنە شەكتەۋ قويادى.
سارى ءتۇس پەن 18-ايماق دەگەندى بىلدىرەتىن ارنايى تسيفر ىشكى ىستەر مينيسترلىگىنە اتالعان اۆتوكولىكتەردى باسقا كولىكتەرىڭ اراسىنان وڭاي اجىراتىپ, سانىن, قوزعالىسىن باقىلاپ وتىرۋدى جەڭىلدەتۋ ءۇشىن جاسالعان. ءبىر جىل ىشىندە كولىگىن تىركەۋگە قويماعان جاعدايدا يەسى ارنايى ءنومىردى قايتارىپ, كولىگىن ەل اۋماعىنان باسقا جاققا اكەتە الادى.
ىشكى ىستەر ۆيتسە-ءمينيسترىنىڭ ايتۋىنشا, بۇگىنگى تاڭدا ەلىمىزدە تىركەلگەن اۆتوكولىكتەردىڭ جالپى سانى 4 ملن 200 مىڭنان اسادى.
– وسى 4 ملن 200 مىڭنان استام اۆتوكولىكتىڭ يەلەرى قازاقستاننىڭ زاڭناماسىندا قاراستىرىلعان سالىقتاردى, باج سالىعىن تولەيدى. وسى الىم-سالىقتان قۇرالعان قارجى حالىقتىڭ الەۋمەتتىك قاجەتتىلىكتەرىنە, جول, كوپىر سىندى ينفراقۇرىلىم سالۋعا جۇمسالاتىنىن جاقسى بىلەسىزدەر. 4 ملن 200 مىڭ ادام الەۋمەتتىك مىندەتتەمەلەرىن ورىنداپ كەلەدى. ال قالعان بىرنەشە ونداعان مىڭ اۆتوكولىكتىڭ يەسى بولسا قازاقستان اۋماعىنداعى جولدارمەن جۇرەدى, قورشاعان ورتاعا زياندى قالدىقتاردى شىعارادى, بىراق الەۋمەتتىك مىندەتتەمەلەردى ورىنداعىسى كەلمەيدى. بۇل ءادىل مە؟ ءبىز كوپشىلىكتىڭ مۇددەسىن قورعاۋىمىز كەرەك, – دەدى مارات قوجاەۆ.
جالپى, ارمەنيادان ەلىمىزگە اكەلىنگەن كولىكتەردىڭ سانى 22 مىڭعا جۋىقتايدى. قىرعىزستان مەن رەسەيدىڭ ارقايسىسىنان 15 مىڭعا تارتا اۆتوكولىك كەلگەن. قازىرگى تاڭدا قارجى مينيسترلىگىنىڭ مەملەكەتتىك كىرىستەر كوميتەتى مەن ىشكى ىستەر مينيسترلىگى بىرلەسىپ, كولىگىن تىركەۋگە نيەتتى ازاماتتارعا ىڭعايلى جاعداي جاساۋ ءۇشىن «جولدا قابىلداۋ» رەسپۋبليكالىق اكتسياسىن جۇزەگە اسىرۋدا. اكتسيا اياسىندا ەلدىڭ بارلىق ايماعىندا پوليتسيانىڭ 516 كەڭەس بەرۋ پۋنكتى اشىلىپ, شەتەلدىك كولىك قۇرالدارىن تىركەۋگە قاتىستى كەڭەس بەرىلىپ جاتىر.