اۆستراليا تاس جولدارىندا ۆەلوسپورتتان بيىلعى جىلدىڭ العاشقى جارىسى اياقتالدى. ءداستۇرلى «تۋر داۋن اندەر» كوپكۇندىگىنىڭ سوڭعى التىنشى كەزەڭىندە «استانا پرو تيم» كومانداسىنىڭ سپورتشىسى مانۋەل بوارو كوزگە ءتۇسىپ, ۇزدىك ۇشتىكتەن كورىندى.
151 شاقىرىمعا سوزىلعان جارىستا قازاقستاندىق كوماندانىڭ وكىلى لۋيس لەون سانچەس تە بەلسەندىلىك بايقاتتى. الايدا يسپان جىگىتىن مارەگە بىرنەشە شاقىرىم قالعاندا قالىڭ توپ قۋىپ جەتتى. ال, بوارو ۇزدىك ۇشتىكتەگى ورنىن ساقتاپ قالدى. يتاليالىق ۆەلوسپورتشى مارە سىزىعىن ءۇشىنشى بولىپ كەستى. 6-كەزەڭدە بريتانيالىق مەتيۋ حولمس جەڭىمپاز اتاندى. ول اۆستراليالىق ريچي پورتتى باسىپ وزدى. «تۋر داۋن اندەر» كوپكۇندىگىنىڭ جالپى ەسەبىندە پورت توپ جاردى. «استانالىقتار» اراسىنان ومار فرايلە ۇزدىك ناتيجە كورسەتىپ, 17-ورىننان كورىندى. اۆستراليادا تەننيستەن بيىلعى جىلدىڭ العاشقى ۇلكەن شلەم جارىسى قىزا ءتۇستى. جەكەلەي سىنداعى ويىنداردا قازاقستاندىق سپورتشىلار جارىستان شىعىپ قالدى. ەندى جۇپتىق سىنداعى سايىستارعا كوز تىگەمىز. ميحايل كۋكۋشكين مەن الەكساندر بۋبليك جۇبى شيرەك فينالعا شىقتى. قازاقستان تەننيسشىلەرى ءۇشىنشى اينالىمدا امەريكالىق سەم كۋەرري مەن ستيۆ دجونسوننان باسىم ءتۇستى. ەسەپ: 6:4, 6:2. ەندى جەرلەستەرىمىز جارتىلاي فينال جولداماسىن دجەيمس داكۆورت - مارك پولمانس جۇبىمەن ساراپقا سالادى. ەرلەر اراسىنداعى جەكەلەي سىندا اۆستراليا اشىق بىرىنشىلىگىنىڭ قازىرگى چەمپيونى نوۆاك دجوكوۆيچ جارىستى جالعاستىرادى. سەربيالىق تەننيسشى ارگەنتينالىق ديەگو شۆارتسماننىڭ وسال تۇسىن تاپتى. ەندى ول شيرەك فينالدا كانادالىق ميلوش راونيچپەن كەزدەسەدى.