بۇگىن, پرەمەر-ءمينيستردىڭ ءبىرىنشى ورىنباسارى, وڭىرلىك دامۋ ءمينيسترى باقىتجان ساعىنتاەۆ قىزىلوردا وبلىسىندا ارنايى جۇمىس ساپارىمەن بولدى. ونىمەن بىرگە بولعان قورشاعان ورتانى قورعاۋ ءمينيسترى نۇرلان قاپپاروۆ, اۋىل شارۋاشىلىعى ءمينيسترىنىڭ ورىنباسارى مارات تولىباەۆ, ەكونوميكا جانە بيۋدجەتتىك جوسپارلاۋ ۆيتسە-ءمينيسترى مارات قۇسايىنوۆ جانە بىرقاتار مەملەكەتتىك ورگانداردىڭ وكىلدەرى وڭىردە اتقارىلىپ جاتقان جۇمىس بارىسىمەن تانىستى جانە «بايقوڭىر» عارىش ايلاعىنىڭ بۇگىنگى احۋالىن كوزبەن كوردى. بۇل تۋرالى «قازاقپارات» اگەنتتىگى حابارلادى.
ولار الدىمەن ارال تەڭىزىنىڭ سولتۇستىگىندەگى كوكارال بوگەتىنە كەلدى. وسى جەردە جەرگىلىكتى بيلىك وكىلدەرى «سىرداريا وزەنى ارناسىن رەتتەۋ جانە سولتۇستىك ارال تەڭىزىن ساقتاپ قالۋ» (ساراتس) جوباسى اياسىندا اتقارىلعان جانە الداعى ۋاقىتتا جۇزەگە اسىرىلاتىن جۇمىستار تۋرالى حاباردار ەتتى. بۇل جوبانىڭ ەكىنشى كەزەڭى بويىنشا قىزىلوردا سۋ تورابىنىڭ سول جاعالىق رەتتەگىش ءشليۋزىن, قازالى جانە قارماقشى اۋداندارىنداعى قورعانىس بوگەتتەرىن قالپىنا كەلتىرۋ, سىرداريا وزەنىنىڭ قورعانشا جانە تۇرىمبەت ۋچاسكەلەرى تۇسىنداعى ارناسىن تۇزەتۋ, قازالى اۋدانىنىڭ بىرلىك اۋىلى جانىنداعى اۆتوجولداعى كوپىردى جوندەۋ, قامىستىباس جانە اقشاتاۋ كولدەر جۇيەسىن جاڭعىرتۋ, قامىستىباس پيتومنيگىنىڭ تاستاق ۋچاسكەسىندەگى توعان شارۋاشىلىعىن كەڭەيتۋ سەكىلدى جۇمىستاردى اتقارۋ جوسپارلانعان. ناقتى كەزەڭدە 6 باعىت بويىنشا ازىرلەنگەن تەحنيكالىق-ەكونوميكالىق نەگىزدەمە مەملەكەتتىك قۇرىلىس ساراپتاماسى قاراۋىنا ۇسىنىلدى. سونىمەن بىرگە, ساراتس جوباسىنىڭ ءبىرىنشى كەزەڭىن جۇزەگە اسىرۋ بويىنشا ارال تەڭىزىنىڭ سولتۇستىك بولىگىن جاڭعىرتۋ جانە ونىڭ تەحنيكالىق-ەكونوميكالىق نەگىزدەمەسىن قايتا قاراۋ, سىرداريا وزەنى باسسەينىنىڭ قازاقستاندىق بولىگىن سۋ رەسۋرستارىمەن قامتاماسىز ەتۋدى جابدىقتاۋ جۇمىسى جالعاسۋدا. ورتالىق مەملەكەتتىك ورگان وكىلدەرى وسى ىستەردىڭ بارىسىمەن تانىسىپ بولعاننان سوڭ, ارال بالىق وڭدەۋ زاۋىتى مەن ايتەكە بي كەنتىندەگى «رزا» اق ءسۇت ونىمدەرىن وڭدەۋ زاۋىتىندا بولدى.
پرەمەر-ءمينيستردىڭ ءبىرىنشى ورىنباسارى باستاعان دەلەگاتسيا كەلەسى كەزەكتە «بايقوڭىر» عارىش ايلاعىنا ايالداپ, وسىنداعى «گاگارين ستارتى» ورتالىعىن, مۇراجاي كەشەنى مەن تورەتام كەنتىندەگى ەمحانالاردى ارالاپ كوردى. ودان ءارى وسى ايلاقتا كوشپەلى ءماجىلىس وتكىزىلىپ, وندا زىمىران تاسىعىشىنىڭ قۇلاعان ورنىن قالپىنا كەلتىرۋ مەن زالالسىزداندىرۋ ماسەلەسى قارالدى. ماجىلىستە قىزىلوردا وبلىسىنىڭ اكىمى قىرىمبەك كوشەرباەۆ «بايقوڭىر» عارىش ايلاعىندا بولعان اپاتتىڭ جەرگىلىكتى تۇرعىنداردىڭ دەنساۋلىعىنا اسەر ەتىپ جاتقانىن مالىمدەدى. وسىعان وراي ەكولوگيالىق احۋالدى باقىلايتىن تۇراقتى مونيتورينگ جۇرگىزۋ قاجەتتىگىن العا تارتتى.
ءامىرحان الماعانبەتوۆ.