قوعامدا اۋعان سوعىسىنا, سول قاندى قاساپقا «ينتەرناتسيونالدىق بورىش» دەگەن جەلەۋمەن جونەلتىلگەن جاۋىنگەرلەرگە دەگەن كوزقاراس ۋاقىت وتكەن سايىن قۇبىلا ءتۇسىپ, كۇردەلەنىپ كەلەدى. ءبىر تاراپ بۇل قانتوگىستى سول كەزدەگى ورتاق وتاننىڭ الدىنداعى قاسيەتتى بورىشتى وتەۋ دەپ تانىسا, بازبىرەۋلەر مۇنى بەيبىت جاتقان مۇسىلمان ەلىنە جاسالعان باسقىنشىلىق دەگەن بىرجاقتى باعا بەرەدى. قالاي دەگەنمەن, تاريحتا «اۋعان سوعىسى» دەگەن اتپەن قالعان بۇل قاندى وقيعانىڭ شىندىعى ەگجەي-تەگجەيلى ايتىلۋى ءتيىس جانە ول ايتىلا بەرەدى دە...
وسى ايتىلعاننىڭ جارقىن كورىنىسىندەي, تاياۋدا كەنشىلەر استاناسىنداعى وبلىستىق تاريحي-ولكەتانۋ مۇراجايىندا كەڭەس اسكەرلەرىنىڭ اۋعانستان جەرىنە ەنۋىنە 40 جىل جانە شىعارىلعانىنا 30 جىل تولۋىنا ارنالعان كورمە ۇيىمداستىرىلدى.
«ارداگەر» اۋعان سوعىسى ارداگەرلەرى مەن مۇگەدەكتەرىنىڭ وداعى» قوعامدىق بىرلەستىگىنىڭ توراعاسى تالعات حاسەنوۆ كورمەگە قويىلعان جۇزگە تارتا جادىگەردى ەكى ايعا جۋىق ۋاقىت جيناعاندارىن ايتادى. سورەگە قويىلعان ەكسپوناتتار اراسىندا اسكەري كيىم-كەشەك, جارىلعىش زاتتار, وق-ءدارى سياقتى جادىگەرلەر, ءتىپتى پاراشيۋتكە دەيىن قويىلعان.
– بۇل ەكسپوناتتاردىڭ ءبارى شىنايى, جاۋىنگەرلەر قولدانعان زاتتار. وسىنىڭ ءبارىن ءبىز بۇگىنگى جاستار مەن بولاشاق ۇرپاق ءوز باتىرلارىن ءبىلىپ ءجۇرۋى جانە ۇمىتپاۋى ءۇشىن وبلىستىق مۇراجايعا تابىستادىق, – دەيدى ت.حاسەنوۆ.
كورمە سورەلەرىندەگى اۋعان سوعىسىنىڭ الۋان سيپاتىنان سىر شەرتەتىن جادىگەرلەردى قالاداعى ت.بيگەلدينوۆ اتىنداعى «جاس ۇلان» مەكتەبىنىڭ تاربيەلەنۋشىلەرى, ستۋدەنتتەر مەن مەكتەپ وقۋشىلارى قىزىعا تاماشالادى.
اتالعان مۇراجاي ديرەكتورى ەرجان نۇرماعانبەتوۆتىڭ ايتۋىنشا, اتاۋلى داتالار قارساڭىندا مۋزەي قىزمەتكەرلەرى عىلىمي-زەرتتەۋ جۇمىستارىن جۇرگىزگەن. سونىڭ ناتيجەسىندە كورمە قورى اۋعان سوعىسىنا قاتىستى فوتوماتەريالدارمەن, سيرەك كەزدەسەتىن قۇجاتتارمەن جانە قۇندى ەكسپوناتتارمەن تولىعا ءتۇسىپتى.
– بۇگىندە كوپتەگەن ادام «بۇل – ءبىزدىڭ سوعىس ەمەس» دەگەندى ءجيى ايتا باستادى. بىراق ول سوعىستا جىگىتتەر وزدەرىنىڭ ينتەرناتسيونالدىق بورىشىن وتەدى عوي. ولار ءوز جاستىعىن تارك ەتتى, بىرەۋ ءومىرىن قيدى, ولاردىڭ كوبى قازىر ءبىزدىڭ باتىرلارىمىز. مۇنى ەستەن شىعارماۋىمىز كەرەك, – دەيدى مۇراجاي ديرەكتورى.
ەكسپوزيتسيا بارىسىندا قاراعاندىلىق فوتوسۋرەتشى جانە رەجيسسەر داۋلەت ءابدىراحمانوۆتىڭ «قىزىل ءىز» اتتى فوتوالبومىنىڭ تانىستىرىلىمى ءوتتى. سونداي-اق اۋعان جەرىندە وققا ۇشقان جاۋىنگەرلەردىڭ انالارىنا مەرەيتويلىق مەدالدار تابىس ەتىلدى.
جالپى, قاراعاندى وبلىسىنان ءۇش مىڭ جاۋىنگەر اۋعانستاندا وزدەرىنىڭ ينتەرناتسيونالدىق بورىشىن وتەگەن. ولاردىڭ 81-ءى جات جەردە قازا تاپسا, ەكەۋى ءىز-ءتۇزسىز جوعالىپ كەتىپتى. قازىرگى تاڭدا وبلىستا 1502 ارداگەر بار, ونىڭ 690-ى قاراعاندى قالاسىندا تۇرادى.
قاراعاندى