اقتاۋ قالاسىنداعى قر قارۋلى كۇشتەرى اسكەري-تەڭىز كۇشتەرىنىڭ كىشى مامانداردى دايارلاۋ وقۋ ورتالىعىنىڭ بازاسىندا اسكەري مىندەتتىلەردى دايارلاۋدىڭ كەزەكتى كەزەڭى اياقتالدى. رەزەرۆيستەردى دايارلاۋ اۆتوموبيل مامانى, اتقىش جانە باسقا دا جۇمىلدىرۋ رەزەرۆىن تولىقتىرۋعا قاجەتتى ماماندىقتار بويىنشا جۇرۋدە. جيىنعا 27-30 جاس ارالىعىنداعى بۇرىن ءدالەلدى سەبەپتەرمەن اسكەري قىزمەت وتكەرمەگەن 50 اسكەري مىندەتتى تارتىلدى. ولاردىڭ كوپشىلىگى ەسەپشىدەن باستاپ, مەكتەپ مۇعالىمىنە دەيىنگى ءوز قىزمەت سالالارىنىڭ ماماندارى بولىپ تابىلادى.
ءبىر اي ىشىندە جاس جىگىتتەر اسكەري ءىستىڭ الىپبيىمەن تانىسىپ, اسكەري تەحنيكا مەن قارۋ-جاراقتىڭ ماتەريالدىق بولىگىن, ولاردى ۇرىستا قولدانۋ تاسىلدەرىن زەردەلەيدى, دەنە دايارلىعىمەن شۇعىلدانادى جانە بارلىق وتكەن پاندەر بويىنشا سىناقتار تاپسىرادى.
– جالپى جۇمىلدىرۋ رەزەرۆى ءۇشىن اسكەري مىندەتتىلەردى دايارلاۋ جونىندەگى جيىن تابىستى ءوتتى. اسكەري ماماندىق العان ءتورت اسكەري مىندەتتى قازىردىڭ وزىندە كەلىسىمشارت بويىنشا اسكەري قىزمەتتى جالعاستىرۋعا تىلەك ءبىلدىردى, – دەدى كىشى مامانداردى دايارلاۋ جونىندەگى وقۋ-جاتتىعۋ ورتالىعىنىڭ باستىعى پولكوۆنيك دانيار گالەەۆ.
بۇل جولى وقۋ-جاتتىعۋ ورتالىعىندا اتىراۋ وبلىسىنان كەلگەن اسكەري مىندەتتىلەر دايارلىقتان ءوتتى. جيىننىڭ اياقتالۋى بويىنشا ولار سەرتيفيكاتتار الىپ, ولارعا قاتارداعى جاۋىنگەر جانە سەرجانتتار قۇرامىنىڭ اسكەري اتاقتارى بەرىلدى. بۇدان بۇرىن وسى ورتالىقتا ماڭعىستاۋ وبلىسىنىڭ اسكەري مىندەتتىلەرى دايارلىقتان وتسە, تامىز ايىنىڭ العاشقى كۇندەرىنەن باتىس قازاقستان وبلىسىنىڭ جىگىتتەرى جاتتىعۋعا كىرىسپەك.
«ەگەمەن-اقپارات».