«قازاقستان رەسپۋبليكاسىنىڭ كوللەدجدەرىنىڭ ۇزدىك 100 ءبىلىم الۋشىسى». ءدال وسىنداي اتاۋمەن تۇڭعىش رەت رەسپۋبليكالىق بايقاۋ وتكىزىلدى. ءبىلىم دوداسىندا اقمولالىق جاس ورەندەر دە توپ جاردى.
بىرنەشە ايعا سوزىلعان سايىستا وبلىس نامىسىن 14 وقۋشى قورعادى. سونىڭ جەتەۋى «ۇزدىك» اتاعىنا يە بولىپ, ارنايى توسبەلگىمەن ماراپاتتالدى. اتالعان شارانى قازاقستان رەسپۋبليكاسى ءبىلىم جانە عىلىم مينيسترلىگى ۇيىمداستىردى.
وقۋشىلاردىڭ قارىم-قابىلەتىن شىڭدايتىن بۇل سايىس العاش رەت ۇيىمداستىرىلعان. سايىستىڭ باستى ەرەجەسى بويىنشا بايقاۋعا تەك كوللەدج وقۋشىلارى عانا قاتىسۋعا قۇقىلى. كوللەدج ىشىلىك كەزەڭنەن سۇرىنبەي وتكەن مىقتىلار وبلىستىق كەزەڭگە جولداما الادى. ال وڭىرلىك سايىستا باعى جانعان جاستار رەسپۋبليكالىق سىڭدا ءوڭىر نامىسىن قورعايدى. ايماق نامىسىن ابىرويمەن قورعاپ شىققان ستۋدەنتتەردىڭ ءبىرى – لاۋرا مادجيتوۆا. ول بۇگىنگى تاڭدا جانايدار مۋسين اتىنداعى جوعارى قازاق پەداگوگيكالىق كوللەدجىنىڭ 4 كۋرس وقۋشىسى.
– بۇل سايىستىڭ باستى ماقساتى – ءبىلىم الۋشىلاردىڭ كوشباسشىلىق قابىلەتىن دامىتىپ, ولاردىڭ ماماندىقتارىنا دەگەن قۇزىرەتتىلىكتەرىن ارتتىرۋ بولىپ تابىلادى. سوندىقتان دا وسى سايىسقا قاتىسۋعا مەندە اسا ءبىر تالپىنىس بولدى. سايىس بارىسىندا ءۇش كەزەڭنەن وتتىك. ءبىرىنشى كەزەڭ ءوتىنىش قابىلداۋ, ەكىنشى جەتىستىكتەرى جانە ءۇشىنشى ءوز جۇمىستارى تۋرالى بايانداما. سونداي-اق رەسپۋبليكالىق دەڭگەيدە داۋىس بەرۋ كەرەك بولدى. اتالعان وسى 3 كەزەڭنەن 1423 ۇپاي جيناپ, جەڭىمپازدار قاتارىنان ىلىكتىم, – دەيدى ج.مۋسين اتىنداعى جوعارى قازاق پەداگوگيكالىق كوللەدجىنىڭ ستۋدەنتى لاۋرا مادجيتوۆا.
ۇزدىك جۇزدىكتىڭ قاتارىندا تەمىرلان ءشارىپحانوۆ تا بار. بۇل جىگىتتىڭ ەسىمى كوكشە جۇرتىنا ءبىرشاما تانىس. سەبەبى, جاس ورەن سۋعا باتىپ بارا جاتقان ءبۇلدىرشىندى اجال اۋزىنان امان الىپ قالعان. جانتۇرشىگەرلىك وقيعا 2018 جىلى ورىن العان. تەمىرلان بۇگىنگى تاڭدا ازاماتتىق قورعانىس جوعارى كوپسالالى كوللەدجىندە ء«ورت قاۋىپسىزدىگى» ماماندىعى بويىنشا ءبىلىم الۋدا.
– جالپى بۇل سايىسقا قاتىسۋ ءۇشىن كەزەڭدەردەن ءوتۋ كەرەك بولدى. ياعني, قاتىسۋشىنىڭ بىرنەشە بايقاۋدا جەڭىمپاز اتانعانى جانە سپورتتا نەمەسە ونەردەگى جەتىستىكتەرى. مەن وسى ەرەجەلەرگە تولىعىمەن ساي بولدىم. سونىمەن قاتار 2018 جىلى سۋعا باتىپ بارا جاتقان ءبۇلدىرشىندى قۇتقارىپ قالعانىمدى كوللەدج ۇجىمى ەسكەرىپ, وسى سايىسقا ۇسىنىپتى. وتە قۋانىشتىمىن, – دەيدى ازاماتتىق قورعانىس جوعارى كوپسالالى كوللەدجىنىڭ ءبىلىم الۋشىسى تەمىرلان ءشارىپحانوۆ.
رەسپۋبليكالىق كەزەڭگە ايماقتاردان 200-دەن استام ءبىلىم الۋشىلار قاتىسىپتى. سونىڭ ىشىندە سارالانىپ, تەك 100 ستۋدەنت ۇزدىك دەپ تانىلعان. جەڭىمپازداردىڭ بارلىعىنا ارنايى توسبەلگىلەر مەن العىس حاتتار تابىستالعان.