رەسەيدىڭ سولتۇستىك-باتىس فەدەرالدى وكرۋگى قۇرامىنا كىرەتىن كارەليا رەسپۋبليكاسىندا ورنالاسقان «ءۇش ايۋ» حايۋاناتتار باعىندا اڭدار ءبىر كۇن ىشىندە ادامدارعا ەكى رەت شابۋىل جاساعان. بۇل تۋرالى «Lifenews.ru» اقپارىنا سىلتەمە جاساي وتىرىپ, ريا «نوۆوستي» حابارلادى.
ءبىرىنشى شابۋىل بۇگىن تۇندە ورىن الدى. حايۋاناتتار باعىنىڭ جۇمىسشىسى يۋري ل. قىزىنا اڭداردى قالاي تاماقتاندىراتىن كورسەتپەك بولىپ ونى توردىڭ ىشىنە الىپ كىرگەن. يۋري تاماق بەرمەك بولىپ قولىن سوزا بەرگەندە, تيشكا ەسىمدى التى جاسار ايۋ وعان اتىلا كەتكەن. ابىروي بولعاندا, كىشكەنتاي قىز كومەك شاقىرىپ اكەسىنىڭ ءومىرىن اراشالاپ قالعان.
اياق پەن قولدارى جاراقاتتانعان ءيۋريدى جەدەل جاردەم قىزمەتى اۋرۋحاناعا جەتكىزدى. دارىگەرلەر وپەراتسيا جاساپ, قازىر ونىڭ ومىرىنە ەشبىر قاۋىپ ءتونىپ تۇرعان جوق ەكەنىن ايتادى. «ءبىز جۇگىرىپ كەلىپ, يۋرانى ايۋدىڭ استىنان ج ۇلىپ الدىق, – دەيدى ونىڭ ارىپتەستەرى. – يۋرا ماس بولعان, ال تيشكا الكوگولدىڭ ءيىسىن جەك كورەدى. نەگىزى تيشكا وتە تىنىش ءارى مەيىرىمدى ايۋ, ونىڭ مۇنداي ارەكەتكە بارۋىنا الكوگولدىڭ ءيىسى سەبەپشى بولعان كورىنەدى».
ەكىنشى وقيعا ءدال وسى جەردە بۇگىن كۇندىز ورىن الىپ وتىر. بۇل جولى جىرتقىش اڭنىڭ شابۋىلىنا حايۋاناتتار باعىنا ۇلىمەن كەلگەن 29 جاسار دميتري س. ۇشىرادى. وعان داشا ەسىمدى ايۋ شابۋىل جاساعان. كۋاگەرلەردىڭ ايتۋىنا قاراعاندا, ايۋ توردىڭ ارتىنا قاراي شەگىنە بەرىپ العا قاراي جۇگىرە جونەلدى. الدىندا تۇرعان قورشاۋدان سەكىرىپ وتكەن ول دميتريگە قاراي ۇمتىلعان. حايۋاناتتار باعىنىڭ جۇمىسشىلارى اراعا اڭشىلىققا ۇيرەتىلگەن يتتەردى سالىپ ءجۇرىپ, ارەڭ دەگەندە ەر ازاماتتى قۇتقارىپ قالدى. «سودان سوڭ اشىنعان ايۋدى مەكەمە ديرەكتورى ءوز قولىمەن اتىپ ءولتىردى», – دەيدى كۋاگەرلەر.
دميتري تەز ارادا اۋرۋحاناعا جەتكىزىلدى. ونىڭ باس تەرىسى سىپىرىلىپ, دەنەسى اۋىر جاراقاتتانعان كورىنەدى. وپەراتسيادان كەيىن دارىگەرلەر ونىڭ جاعدايى بىرقالىپتى ەكەنىن حابارلادى.
ايدار ورىسباەۆ.