ۇستىمىزدەگى جىلدىڭ اقپان ايىندا سانكت-پەتەربۋرگ قالاسىندا جوعالعان رەسەي ءارتىسى الەكسەي وسيپوۆتىڭ ءولى دەنەسى 19 شىلدە كۇنى كرونشتادت قالاسىنىڭ ماڭىنداعى فين شىعاناعىنىڭ ايدىنىندا تابىلدى. بۇل تۋرالى «موسكوۆسكي كومسومولەتس» گازەتى جازدى.
بىراق ا. وسيپوۆتىڭ تۋىستارى بۇل مالىمەتكە سەنۋدەن باس تارتىپ وتىر. ماسەلەن, اكتەردىڭ باۋىرى يۆان وسيپوۆ پوليتسيانىڭ جەكە مالىمەتىنە كۇمان كەلتىرەدى. «ءبىز ءىستى جۇرگىزىپ جاتقان تەرگەۋشىمەن ۇنەمى حابارلاسىپ تۇرمىز. الەكسەي تابىلعان جاعدايدا ول بىزگە حابار بەرەتىن ەدى», – دەپ مالىمدەدى يۆان.
ەندى ايلاقتان مۇردەسى تابىلعان ازاماتتىڭ جەكە تۇلعاسىن انىقتاۋ ءۇشىن وعان دنك ساراپتاماسىن جۇرگىزۋ قاجەت.
ءبىر ايتاتىن جايت, 38 جاسار ءارتىس بيىلعى اقپان ايىندا ءىز-ءتۇزسىز جوعالىپ كەتكەن بولاتىن. بۇل جايىندا ونىڭ قۇربىسى ولگا سول كەزدە پوليتسياعا شاعىم ايتىپ كەلدى. سول كۇنى اكتەر وسى قىزبەن فين شىعاناعى اۋدانىنا سەرۋەندەپ جۇرگەن ەكەن. ول كەنەت مۇزدىڭ بەتىمەن ءبىراز ءجۇرىپ قايتپاق بولادى. ال ولگا ونىمەن ەرمەي, جاعالاۋدا قالىپ قويادى. الايدا, الەكسەي سول كەتكەننەن جاعالاۋعا قايتا ورالمايدى. ونى كۇتە-كۇتە شارشاعان قىز سوسىن قۇقىق قورعاۋ ورگاندارىنا جۇگىنەدى. كەيىننەن انىقتالعانداي, سول كۇنى ايدىننىڭ ءارتىس جوعالىپ كەتكەن اۋدانىندا مۇزدىڭ جارىلىپ, سەڭنىڭ ءجۇرۋى ورىن العان كورىنەدى.
ءبىز ءسوز ەتىپ وتىرعان الەكسەي وسيپوۆ 1975 جىلعى 18 اقپاندا لەنينگراد قالاسىندا ومىرگە كەلگەن. سانكت-پەتەربۋرگ تەاتر ونەرى مەملەكەتتىك اكادەمياسىنىڭ ارتىستەر دايارلايتىن فاكۋلتەتىن بىتىرگەن. ول كينودان 2001 جىلدان كورەنى باستادى. وسى ارالىقتان بەرى الەكسەي «بايعۇس ناستيا», «دۇكەننەن شىققان ەكەۋ», «جاقۇتتى بارون», «بۇزاقىلار پەتەربۋرگى», «تەرگەۋ قۇپياسى», «تاسجارعان» سەكىلدى بىرقاتار تەلەسەريالداردا ويناپ, كورەرمەندەرگە تانىمال بولدى.
ايدار ورىسباەۆ.