تاۋەلسىزدىك – ءار قازاقتىڭ ماڭدايىنا جازىلعان باعا جەتپەس باقىت پەن بايلىق. ازاتتىق جىلدارى مەملەكەت قامقورلىعىمەن ەلىمىزدىڭ بارلىق وڭىرلەرىندە جارقىن جوبالار قولعا الىنىپ, ءوز جەمىسىن بەردى.
وسى جىلدار ىشىندە تاۋەلسىزدىكتى نىعايتۋعا بارشا قازاقستاندىقتارمەن بىرگە جامبىل وبلىسىنىڭ تۇرعىندارى دا لايىقتى ۇلەس قوستى دەۋگە بولادى. بۇگىندە اۋليەاتا ءوڭىرى سەرپىندى دامۋ جولىنا ءتۇسىپ, ءوزىنىڭ الەۋەتىن كورسەتتى. اعىمداعى جىلدىڭ وزىندە وبلىستىڭ ارالىق ەكونوميكالىق ءوسىمى 5 پايىزدان اسقان. ونەركاسىپ ءوندىرىسىنىڭ كولەمى 6,5 پايىزعا, نەگىزگى كاپيتالعا سالىنعان ينۆەستيتسيالار 15 پايىزعا ارتىپ وتىر.
بۇل رەتتە جەكە ينۆەستيتسيالاردىڭ ۇلەسى 20 پايىزعا ارتقانىن دا ايتا كەتۋ كەرەك. «جىل باسىنان بەرى 430 مىڭ شارشى مەتر تۇرعىن ءۇي پايدالانۋعا بەرىلدى, ال جىل بويىنشا 485 مىڭ شارشى مەتر تۇرعىن ءۇي پايدالانۋعا بەرىلەدى دەپ كۇتىلۋدە. ەڭ تومەنگى جالاقى 1,5 ەسەگە ارتتى. «ەڭبەك» باعدارلاماسىنا 36 مىڭ ادام قاتىسىپ, 27 مىڭ ادام جۇمىسپەن قامتىلدى. 18 مىڭ جاڭا جۇمىس ورنى قۇرىلدى, ونىڭ ىشىندە 11,5 مىڭى تۇراقتى. ءبىلىم بەرۋ سالاسىندا 15 مەكتەپكە دەيىنگى ۇيىم اشىلدى, 3 جاستان 6 جاسقا دەيىنگى بالالاردى قامتۋ 100 پايىزعا جەتتى. سونداي-اق, اۋىل حالقىن العاشقى مەديتسينالىق كومەك نىساندارىمەن 100 پايىز قامتۋ, اعىمداعى جىلى 65 مەديتسينالىق مەكەمە سالۋ ناتيجەسىندە بولىپ وتىر. جامبىلدىقتاردىڭ ءال-اۋقاتىن جاقسارتۋعا مەملەكەتتىك جانە سالالىق باعدارلامالار باعىتتالعان. جەكە قوسالقى شارۋاشىلىقتاردى قولداۋ جونىندەگى پيلوتتىق جوبانى ىسكە اسىرۋ شەڭبەرىندە حالىقتىڭ تابىسىن ارتتىرۋدا ماڭىزدى پەرسپەكتيۆالار اشىلۋدا», دەيدى جامبىل وبلىسىنىڭ اكىمى اسقار مىرزاحمەتوۆ. سونداي-اق, جىل باسىنان بەرى 123 الەۋمەتتىك-ەكونوميكالىق نىساندار جاڭادان اشىلىپ, بىرقاتار نىساندار قايتا جاڭعىرتىلعان. ونىڭ ىشىندە 20 ءبىلىم, 65 دەنساۋلىق ساقتاۋ نىساندارى بولسا, 18 تۇرعىن ءۇي, 130 سپورت الاڭدارى ەل يگىلىگىنە بەرىلگەن.
جامبىل وبلىسى