كەشە مەملەكەت باسشىسى نۇرسۇلتان نازارباەۆ پرەمەر-مينيستر سەرىك احمەتوۆتى قابىلدادى, دەپ حابارلادى پرەزيدەنتتىڭ ءباسپاسوز قىزمەتى.
كەزدەسۋ بارىسىندا پرەمەر-مينيستر ەلىمىزدىڭ ءبىرىنشى جارتىجىلدىقتاعى الەۋمەتتىك-ەكونوميكالىق دامۋىنىڭ قورىتىندىلارى تۋرالى بايانداپ, تاياۋ كەزەڭدەگى جوسپارلار جونىندە ايتىپ بەردى.
س.احمەتوۆ ۇكىمەتتىڭ سوڭعى وتىرىسىندا ەلىمىزدىڭ بيىلعى التى ايداعى الەۋمەتتىك-ەكونوميكالىق دامۋ قورىتىندىسى قارالىپ, ەكىنشى جارتىجىلدىققا بىرقاتار مىندەتتەر قويىلعانىنا توقتالدى.
– ءبىزدىڭ نەگىزگى ەكسپورتتىق سەرىكتەستەرىمىزگە داعدارىستىڭ ىقپال ەتۋىنە قاراماستان, جىل قورىتىندىسى بويىنشا ءبىز ىشكى جالپى ءونىمنىڭ 6 پايىزعا ارتۋىن كۇتۋدەمىز. ءوسىم ەكونوميكانىڭ ءىس جۇزىندە بارلىق سالاسىندا بايقالۋدا, نەگىزگى كاپيتالعا ينۆەستيتسيا ارتتىرىلۋدا. ءوز كەزەگىندە ينفلياتسيا دەڭگەيى 2,7 پايىزدى قۇرادى, بۇل ەل حالقىنىڭ كىرىسى ارتۋىنا وڭ ىقپال ەتەدى, – دەدى قازاقستان پرەمەر-ءمينيسترى.
نۇرسۇلتان نازارباەۆ الەمدىك ەكونوميكانىڭ تۇراقسىزدىعى جاعدايىنداعى ەكونوميكانىڭ ءوسىمى جاقسى كورسەتكىش بولىپ سانالاتىنىن جانە بۇگىندە ونى ودان ءارى ارتتىرۋعا قاجەتتى رەزەرۆتەردىڭ بار ەكەنىن اتاپ ءوتتى.
– قاراجاتتى يگەرە الماۋ سەبەبىنەن تۇرعىن ءۇيدى سالۋدىڭ جانە بىرقاتار ينفراقۇرىلىمدىق جوبالار كورسەتكىشتەرىنىڭ تومەندەۋى ورىن الىپ وتىر. وسى باعىتتاعى جۇمىستى جانداندىرعان ءجون. بۇل, تۇتاستاي العاندا, ىشكى جالپى ءونىمنىڭ ارتا تۇسۋىنە ەداۋىر سەپتىگىن تيگىزەدى. ەل ەكونوميكاسىنىڭ ءوسىمى جونىندەگى بولجام جىل قورىتىندىسى بويىنشا 6 پايىزعا تولىق ىسكە اسادى دەۋگە نەگىز بار, – دەدى مەملەكەت باسشىسى.
پرەزيدەنت ەكىنشى جارتىجىلدىقتا, اسىرەسە, ءوڭىرلەردە بەلسەندى جۇمىستى جالعاستىرۋ قاجەتتىگىنە نازار اۋداردى.
– يندۋستريالىق-يننوۆاتسيالىق باعدارلاما اياسىندا جۇزەگە اسىرىلىپ جاتقان نىسانداردى جوبالىق قۋاتىنا جەتكىزۋدى قامتاماسىز ەتۋ ماڭىزدى. وڭدەۋ ونەركاسىبى مەن ماشينا جاساۋ سالاسىنداعى ءوسىم – جاقسى جەتىستىك. قارجى سەكتورىندا دا دامۋدىڭ وڭ قارقىنى بار. قازاقستان تاۋارلارىنىڭ ەكسپورتتىق تۇتىنىمى تومەندەۋىنە بايلانىستى «قازاقمىس» جشس, «ارسەلور ميتتال تەمىرتاۋ» اق سياقتى وتاندىق كومپانيالار بىرقاتار قيىندىقتاردى باستان كەشۋدە, مەنىڭ تاپسىرمام بويىنشا ولارعا قاجەتتى قولداۋ جاسالۋدا. سونىمەن بىرگە, ەكسپورتتىق الەۋەتتىڭ كولەمى ازايعانىنا قاراماستان, «ارسەلور ميتتال تەمىرتاۋ» كومپانياسى باسشىلىعى ءوندىرىستىڭ جىل سايىنعى كولەمىن 3,5 ملن. توننا مولشەرىندە ساقتاۋعا ۋادە بەردى, – دەدى نۇرسۇلتان نازارباەۆ.
مەملەكەت باسشىسى جيىن-تەرىن ناۋقانىنا دايىندىقتى ۋاقىتىلى جۇرگىزۋدى جانە اۋىلشارۋاشىلىق ءونىمىن وتكىزۋدىڭ ىشكى نارىقتارىن كەڭەيتۋدى تاپسىردى.
كەزدەسۋ قورىتىندىسىندا پرەزيدەنت قارالعان ماسەلەلەر بويىنشا بىرقاتار ناقتى تاپسىرمالار بەردى.