ارقاسىندا ەستۋ قابىلەتى وتە ناشار بالالار بايراقتى باسەكەلەردە توپ جارىپ ءجۇر
ءوڭىر باسشىسى س.ەسكەندىروۆ وبلىستىق ەستۋ قابىلەتى تومەن بالالار مەكتەپ-ينتەرناتىنا ارنايى كەلدى. وعان مىنا جاعداي سەبەپ بولعان ەدى. مۇنىڭ الدىندا ءبىلىم ۇياسىنىڭ قابىرعاسىندا كوپ جىلدان بەرى جەمىستى جۇمىس ىستەپ كەلە جاتقان «Sensitive» بال ءبيى ءانسامبلىنىڭ كوركەمدىك جەتەكشىسى ولگا روستوۆششيكوۆا «نۇر وتان» حدپ جەرگىلىكتى فيليالىنىڭ قابىلداۋىنا كەلگەن. سوڭعى ءۇمىت ءجىبىن ءۇزىپ العىسى كەلمەگەندەي سامات ساپاربەك ۇلىنىڭ الدىنا يمەنە كىرىپ, اتا-انالاردىڭ اماناتىن بايانداپ بەرگەن. فيليال توراعاسىنىڭ ماسەلەمەن ابدەن تانىسىپ العاننان كەيىن «قام جەمەڭىز, كومەكتەسەمىز» دەگەن ءبىر اۋىز ءسوزى وعان قانات ءبىتىرىپ, قابىلداۋدان توبەسى كوككە جەتكەندەي كوتەرىڭكى كوڭىل-كۇيمەن شىققان. جۇرەكجاردى قۋانىشىن ارىپتەستەرىمەن بولىسكەنشە اسىققان. ەندى شە... ەلىمىزدەگى بىرەگەي بالدىق بي توبى بولگاريادا وتەتىن دودالى باسەكەگە قارجى تاپپاۋ سالدارىنان قاپ-قاراڭعى تۇنەك قۇشاعىندا تۇنشىققانداي كۇي كەشىپ جۇرگەندە, سامالا جارىق نۇرلاندىرىپ سالا بەردى ەمەس مە. وسى كەزدە ءبىزدىڭ ويىمىزعا ديدار مالاەۆ دەگەن ونەرلى ازاماتتىڭ مەكتەپ جاسىنا تولا قويماعان ۇلىن سوفيا قالاسىنداعى حالىقارالىق اندەر بايقاۋىنا اپارۋ ءۇشىن يەلىگىندەگى كولىگىن بانككە كەپىلدىككە قويىپ, ابدەن اۋرە-سارساڭعا تۇسكەنى ورالدى.
وبلىس اكىمى ۋادەسىندە تۇردى. كەلىسىلگەن مەرزىمدە مەكتەپ-ينتەرناتقا كەلىپ, 150 بالاعا ءتالىم-تاربيە بەرىپ جاتقان 90-عا جۋىق ۇجىم مۇشەلەرىنىڭ حالىمەن, وقۋ ورنىنىڭ ماتەريالدىق-تەحنيكالىق جاعدايىمەن تانىستى. بولگاريانىڭ نەسەبر قالاسىندا حالىقارالىق «سلاۆيانسكي پۋت» ۇلتتىق مادەنيەت, ونەر جانە قولونەر جازعى مەكتەبىنىڭ ۇيىمداستىرۋىمەن وتەتىن «سولنەچنىي تانەتس» كونكۋرسىنا جولداما العان بي ءانسامبىلىنىڭ ونەرىن تاماشالاپ, ەستىمەيتىندەرىنە قاراماستان, بي ونەرىن ابدەن يگەرىپ العاندارىنا, ونىڭ تىلسىم قۇدىرەتىن جان-تانىمەن تۇسىنەتىن سەزىمتالدىقتارىنا تانتىلىگىن جاسىرمادى. ەلىمىزدە مۇنداي ساناتتاعى بي ءانسامبلىنىڭ جالعىز ەكەنىنە باستاپقىدا سەنىڭكىرەمەگەنىم راس. قاراپ وتىرسام, اتاق-داڭقتارىڭ جەر جارادى ەكەن. رەسەيدىڭ چەبوكسارى قالاسىندا ۇيىمداستىرىلعان «ناتسيونالنوە دوستويانيە-2013- NATIONAL. PROPERTY» كونكۋرسىندا ءبىرىنشى ورىن الىپسىڭدار. وسى جارىس جولىن ەۋروپا تورىندە جالعاستىرۋعا, ون ەكى مۇشەسى ساۋ ورەندەرمەن تەرەزەسى تەڭ دارەجەدە ونەر كورسەتىپ, جۇلدەمەن ورالۋعا تىلەكتەسپىن.
وسىلايشا, اعىنان جارىلعان سامات ساپاربەك ۇلى بالدىق بي توبىنا بۇدان بىلاي دا تۇراقتى قامقورلىق جاسالاتىنىنا سەندىردى. ءسوزىنىڭ اياعىندا سەندەردەي جەتكىنشەكتەردىڭ تولىققاندى ازامات بولىپ ەرجەتۋىنە ەلىمىزدە بارلىق جاعداي جاسالعان. ەلباسىنىڭ سەندەرگە جۇكتەگەن اماناتىن ابىرويمەن ورىنداڭدار دەي كەلىپ, ءارلى-بەرلى جول شىعىندارىن وتەۋ جانە شەبەرلىك سىنىپتارىنا قاتىسۋ ءۇشىن قارجىلىق دەمەۋ كورسەتتى. قازاقستاننىڭ اتىن شىعارا جۇرىڭدەر دەپ, ءبيشى بالالارعا ەلىمىزدىڭ ەلتاڭباسى بەينەلەنگەن فۋتبولكالار سىيلادى.
ءومىر ەسقالي,
«ەگەمەن قازاقستان».
سولتۇستىك قازاقستان وبلىسى.