ليبەرالدى-دەموكراتتار جاپونيا پارلامەنتىنىڭ ەكى پالاتاسىنا دا باقىلاۋدى ءوز
قولدارىنا الدى. پرەمەر سيندزو ابەنىڭ ەندى ەل ەكونوميكاسىن جانداندىرىپ, اسكەري قۋاتىن ارتتىرۋ بويىنشا جوسپارلاعان جۇمىستارىن كەدەرگىسىز جۇزەگە اسىرۋعا مۇمكىندىگى بار.
جاپونيادا وتكەن پارلامەنتتىڭ جوعارعى پالاتاسىنا سايلاۋدا ليبەرال-دەموكراتيالىق پارتيا مەن «جاڭا كومەيتو» پارتياسى ۇلكەن باسىمدىقپەن جەڭىسكە جەتتى. ءسويتىپ, كەشەگى مالىمەت بويىنشا, اتالعان پارتيالار پارلامەنتتىڭ جوعارعى پالاتاسىنداعى 121 ورىننىڭ 76-سىن يەلەنىپ وتىر. وسىلايشا بيلەۋشى كواليتسيا التى جىلدان بەرى تۇڭعىش رەت ەكى پالاتادا دا كوپشىلىككە يە بولدى.
فيليپپ – بەلگيانىڭ جاڭا كورولى
بەلگيا تاعىنا 53 جاستاعى جاڭا مونارح فيليپپ كوتەرىلدى. بۇعان دەيىن ونىڭ اكەسى البەرت ءىى-ءنىڭ تاقتان باس تارتۋ ءراسىمى ءوتتى. ول ءوزىنىڭ سوڭعى سوزىندە بەلگيالىقتاردى تۇتاستىققا شاقىردى.
فيليپپ ۇلتتىق پارلامەنتتىڭ قوس پالاتاسى مۇشەلەرىنىڭ الدىندا مونارح رەتىندە انت بەردى. وسى شاراعا وراي بريۋسسەلدەگى كورول سارايىنا 250 جوعارى شەندى قوناقتار, ونىڭ ىشىندە ۇكىمەت مۇشەلەرى دە بار, شاقىرىلدى. البەرت ءىى بەلگيانى 20 جىلعا جۋىق ۋاقىت باسقارعان ەدى. ءسويتىپ, ول ۇلىنىڭ پايداسىنا تاقتان رەسمي تۇردە باس تارتتى. البەرت بۇل قادامىن دەنساۋلىعىمەن جانە جاسى كەلىپ قالعانىمەن ءتۇسىندىردى.
اقش سانكتسيا ەنگىزەمىز دەپ قورقىتتى
اقش مەملەكەتتىك حاتشى دجون كەرري ۆەنەسۋەلا سىرتقى ىستەر ءمينيسترى ەلياس حاۋاعا ەگەر اقش ورتالىق بارلاۋ باسقارماسىنىڭ بۇرىنعى قىزمەتكەرى ەدۆارد سونۋدەنگە ساياسي باسپانا بەرىلگەن جاعدايدا ۆەنەسۋەلانىڭ قاتاڭ ەكونوميكالىق سانكتسياعا دۋشار بولاتىنىن ەسكەرتتى.
اتاپ ايتقاندا, دج.كەرري اقش-تىڭ ۆەنەسۋەلاعا بەنزين مەن باسقا دا مۇناي ونىمدەرىن ساتۋدى دوعاراتىنىن, ال ونىڭ ۇشاقتارىنا ناتو ەلدەرىنىڭ اۋە كەڭىستىگىن كەسىپ وتۋگە تىيىم سالىناتىنىن مالىمدەدى. سونىمەن قاتار, ۆەنەسۋەلانىڭ باسشىلىعىنا اقش اۋماعىنا كىرۋگە رۇقسات ەتىلمەيتىنىن ەسكەرتتى. قازىرگى كەزدە ە.سنوۋدەن ماسكەۋدەگى «شەرەمەتەۆو» اۋەجايىنىڭ ارنايى بولمەسىندە شەشىم كۇتىپ وتىر.
قىسقا قايىرىپ ايتقاندا:
كولۋمبيانىڭ ۆەنەسۋەلامەن شەكاراسىنا جاقىن ماڭدا پارتيزانداردىڭ تۇتقيىلدان شابۋىلى بارىسىندا كولۋمبيا ارمياسىنىڭ 17 سولداتى قازا تاپتى. بىرنەشە پارتيزان دا كوز جۇمعان. تۇتقىنعا الىنعاندارى دا بار.
اۋعانستاننان كواليتسيالىق كۇشتەردىڭ شىعارىلا باستاعانى بەلگىلى. ولاردىڭ بازالار ماڭىندا قالدىرعان گراناتالارى مەن سناريادتارى جانە مينالارىنا كۇنى بۇگىنگە دەيىن 50 اۋعاندىق جارىلىپ ولگەن.
تۇركيادا جۇزدەگەن ادام تاعى دا ىستامبۇلداعى تاكسيم ساياباعىنا وتپەكشى بولعان ەدى. بىراق ولاردى پوليتسيا سۋمەن اتقىلاپ قۋىپ تاراتتى. جالپى, ەلدەگى جاعداي قالىپتى بولىپ وتىرعانىمەن, انكارا مەن ىستامبۇلدا شەرۋلەر جالعاسۋدا.
اقش-تىڭ كەيبىر شتاتتارىندا كۇن كۇيىپ تۇر. نيۋ-دجەرسي شتاتىنداعى ورتتەن ءۇش تۇرعىن ءۇي تولىقتاي جانىپ كەتتى. 50 ادام زارداپ شەكتى. ءورت سەبەبى انىقتالۋدا. قازىرگى كەزدە شتاتتا تەرمومەتر باعاناسى 40 گرادۋستان تۇسپەۋدە.
يراكتىڭ ورتالىق بولىگىندە جاسالعان لاڭكەستىكتەن كەم دەگەندە 20 ادام وپات بولدى. جارىلىس ءسۇننيت مەشىتتەرىنىڭ بىرىندە جاسالعان. بۇل جونىندە ەلدىڭ قۇقىق قورعاۋ ورگاندارى حابارلادى.
يسپانيادا مەملەكەتتىك قارىز تەك ۇستىمىزدەگى جىلدىڭ مامىر ايىندا عانا 23 ملن. ەۋروعا ءوسىپ, 927 ملن. ەۋروعا, ياعني رەكوردتىق كورسەتكىشكە جەتتى. بۇل – ەلدىڭ ىشكى جالپى ءونىمىنىڭ 89,6 پايىزى دەگەن ءسوز.
يران «بەيشارا» يزرايلدەن قايمىقپايدى
يراننىڭ جاڭادان سايلانعان پرەزيدەنتى حاسسان روۋحاني يزرايل تاراپىنان اسكەري قاتەر ءتونۋى ىقتيمالدىلىعىن جوققا شىعاردى. «كەيبىر ەلدەر يزرايل سياقتى «بەيشارا» ەل تۋرالى وسىنداي اڭگىمە قوزعاعان كەزدە تەك كۇلكىڭ كەلەدى», دەيدى ول.
«بىزگە قوقان-لوقى جاسايتىن سيونيستەر دەگەن كىمدەر سونشاما؟» – دەيدى تاعى دا يران پرەزيدەنتى. بۇعان دەيىن يزرايل پرەمەرى بەنيامين نەتانياحۋ ءوزىنىڭ ەلى يرانعا پرەۆەنتيۆتى سوققى جاساي الاتىنىن مالىمدەگەن ەدى. سونداي-اق ول ەگەر يرانعا قارسى ەنگىزىلگەن سانكتسيالار ءوز دەڭگەيىندە ناتيجە بەرمەيتىن بولسا, وندا اقش سوعىس ءىس-قيمىلىنا جۇگىنۋى ءتيىس دەگەن پىكىر دە بىلدىرگەن بولاتىن.
ءۇندىستان ءوز شەكاراسىن كۇشەيتەدى
ءۇندىستان مينيسترلەر كابينەتىنىڭ قاۋىپسىزدىك جونىندەگى كوميتەتى قىتايمەن داۋلى شەكارا بولىگىنە قوسىمشا 50 مىڭ سولدات ورنالاستىرۋ تۋرالى ۇسىنىستى ماقۇلدادى. بۇل ءۇشىن بيلىك 10 ميلليارد دوللاردان استام قارجى ءبولۋدى قاراستىرماق.
ال اسكەريلەر باتىس بەنگاليا, بيحار, اسسام, دجاممۋ جانە كاشيمير شتاتتارىنا باعىتتالاتىن بولادى. بۇعان قوسا ارميا شەكاراعا اسكەري-كولىك ۇشاقتارىن جىبەرمەك. اسكەريلەردى ورنالاستىرۋعا قانشا ۋاقىت كەتەتىنى تۋرالى اڭگىمە ايتىلمايدى. ەسكە سالا كەتسەك, مۇنىڭ الدىندا ءۇندىستان قورعانىس ءمينيسترى پەكينگە ۇستىمىزدەگى جىلدىڭ ءساۋىر ايىندا قىتايدىڭ لاداكح پروۆينتسياسىندا لاگەر قۇرعانىنا وراي ءۇندىستاننىڭ ءوز شەكاراسىن قورعايتىنىن ەسكەرتكەن ەدى.
قىتايداعى ءزىلزالا قۇربانى – 47 ادام
قىتايدىڭ ورتالىق بولىگىندە جەر سىلكىنىسى تىركەلدى. ءزىلزالا سالدارىنان كەم دەگەندە 47 ادام كوز جۇمدى. 296 ادام ءتۇرلى دەنە جاراقاتتارىن الدى. الدىن الا دەرەكتەرگە قاراعاندا, ەڭ از دەگەندە 380 عيمارات, مىڭداعان قۇرىلىستار زارداپ شەككەن.
تابيعات اپاتىنىڭ سالدارىن جويۋعا 500-دەن استام ادام جىبەرىلگەن. ال جەر سىلكىنىسى كەشە ەرتەڭگىسىن گانسۋ پروۆينتسياسىندا ورىن العان. قىتاي سەيسمولوگتارىنىڭ باعالاۋىنشا, نەگىزگى جەر سىلكىنىسىنىڭ ماگنيتۋداسى 6,6 باللدى قۇراعان. «سينحۋا» اگەنتتىگىنىڭ دەرەكتەرىنە سۇيەنسەك, مەيچۋان جانە پۋما ەلدى مەكەندەرى ايتارلىقتاي زارداپ شەككەن. جەرگىلىكتى تۇرعىنداردىڭ سوزدەرىنە قاراعاندا, جەر سىلكىنىسى 1 مينۋت بويى سەزىلىپ تۇرعان.
ينتەرنەت ماتەريالدارى نەگىزىندە ازىرلەندى.