ەلباسى نۇرسۇلتان نازارباەۆ «قازاقستان-2050» ستراتەگياسىندا قالىپتاسقان مەملەكەتتىڭ جاڭا ساياسي باعىتىن انىقتاپ بەرگەنى بەلگىلى. سونىمەن بىرگە, بۇل اسا اۋقىمدى ستراتەگيالىق قۇجاتتا مەملەكەتتىڭ ودان ءارى دامۋىنداعى ۇلان-عايىر ءمىندەتتەر ايقىندالدى. سونداي-اق, مەملەكەت باسشىسىنىڭ وسى جولعى قازاقستان حالقىنا جولداۋىن پرەزيدەنتتىڭ «قازاقستاننىڭ الەۋمەتتىك جاڭعىرتىلۋى: جالپىعا ورتاق ەڭبەك قوعامىنا قاراي 20 قادام» اتتى كەڭ ءپىشىندى, تەرەڭ مازمۇندى ماقالاسىمەن دە بايلانىستىرا قاراي الامىز. ولاي بولاتىن سەبەبى, اتالعان ماقالادا دا ستراتەگيالىق جانە تاكتيكالىق تۇرعىداعى مىندەتتەر جان-جاقتى قامتىلدى. وسىناۋ ىرگەلى قۇجاتتار ەلىمىزدەگى ۇكىمەتتىك ەمەس ۇيىمدار (ۇەۇ) ءۇشىن دە ۇزاق جىلدارعا ارنالعان ءىس-قيمىل باعدارلاماسىنا اينالىپ وتىر.
ورال قالاسىنداعى «ارتۋ» قوعامدىق بىرلەستىگىنىڭ توراعاسى باۋىرجان تۇمانوۆپەن اڭگىمەمىز وسىنداي باعىتتا ءوربىدى.
– باۋىرجان قاناتباي ۇلى, جولداۋدىڭ ءاربىر تاراۋى ەلىمىزدە قۇرالعان ۇەۇ-نىڭ ەكىنشى تىنىسىن اشۋعا العىشارت جاساعانى ايقىن بايقالادى. ياعني, ەلباسى مۇندا بارشا قازاقستاندىقتاردى قويىلعان مىندەتتەردى جۇزەگە اسىرۋ ءۇشىن وعان بەلسەندى تۇردە قاتىسۋعا شاقىردى. بۇعان قانداي وي-پىكىر قوسا الاسىز؟
– دۇرىس ايتاسىز, ماسەلەنىڭ وسىلاي قويىلۋىنىڭ ءوزى كەز كەلگەن ۇكىمەتتىك ەمەس ۇيىمنىڭ تابيعاتى مەن ءبىتىم-بولمىسىنا تولىق سايكەس كەلەدى. ولاي بولاتىن سەبەبى, ۇەۇ-نىڭ و باستاعى ميسسياسى قوعام مۇشەلەرى قاجەت ەتىپ وتىرعان تالاپتار مەن ناقتى پروبلەمالاردى شەشۋگە ىقپال جاساۋدان تۋىندايدى. ءبىر سوزبەن ايتقاندا, بۇل قوعامنىڭ ءوزارا ۇيلەسىمدى دامۋىنا جول اشۋ دەگەن ءسوز. اتاپ ايتقاندا, ءبىز الداعى كەزەڭدە سەرىكتەستىك, جاۋاپكەرشىلىك, ۇجىمشىلدىق سەكىلدى وڭ, جاعىمدى قۇندىلىقتاردى تۇرمىس-سالتىمىزعا بەرىك ەنگىزىپ, ودان ءارى تەرەڭدەتە الساق قوعامنىڭ ۇيلەسىمدى دامۋى ۇعىمىنىڭ ءوزى دە وسى تۇسىنىكتەردەن قاشىققا كەتپەيدى. وسى ارقىلى بولاشاققا دەگەن سەنىمدى دە نىق قالىپتاستىرۋعا بولادى. قازاقستاندىق ءپاتريوتيزمدى دامىتۋ ماسەلەسىنە دە وسىنداي ولشەممەن قاراي الامىز.
مىقتى ءارى ۇلكەن بيزنەسپەن ءالى دە بولسا جان-جاقتى دامىپ كەتە قويماعان قوعامنىڭ اراسىنداعى ۇيلەسىمسىزدىك پەن ديسبالانس مورالدىق قۇندىلىقتار مەن ار-نامىستىڭ شاراسىز تۇردە كوممەرتسيالانۋىنا اكەلىپ سوقتىرماي قويمايدى. ياعني, قوعامدا ساتىلمايتىن ەشتەڭە جوق, ءبارى دە ساتىلادى دەگەن ۇعىم مەن تۇسىنىستىكتىڭ پايدا بولا باستاۋى وڭ قۇبىلىس پەن جاقسىلىقتىڭ نىشانى بولا المايدى. مۇنداي تەرىس كوزقاراس جاعدايىندا شەكتەن شىققان ارسىزدىق كورىنىستەرى بەلەڭ الۋى ابدەن مۇمكىن. ونىڭ ناتيجەسىندە تەك بيزنەس قانا ەمەس, سونىمەن بىرگە, بارلىق قوعام زارداپ شەگەدى. ارسىزدىق پەن جەمقورلىق ەگىز, توركىندەس ۇعىمدار. وسىندا ايتىلعان ەكىنشى دەرت پەن ىندەتتى مەملەكەت باسشىسى ۇلتتىق قاۋىپسىزدىگىمىزگە تىكەلەي تونەتىن قاتەر دەپ اتاۋى تەكتەن تەك بولماسا كەرەك.
جولداۋداعى: مەملەكەتتىلىكتى ودان ءارى نىعايتۋ جانە قازاقستاندىق دەموكراتيانى دامىتۋ» اتتى تاراۋدا نۇرسۇلتان ءابىش ۇلى: ازاماتتاردىڭ جەرگىلىكتى جەردەگى وزەكتى ماسەلەلەردىڭ شەشىمىن تابۋىنا بەلسەندى تۇردە ارالاساتىن جانە جەرگىلىكتى بيلىك ورگاندارىنىڭ قىزمەتىن باقىلايتىن ۋاقىتى جەتتى دەپ تايعا تاڭبا باسقانداي اتاپ كورسەتتى. مىنە, جاڭا جولداۋ مەن ۇەۇ اراسىنداعى ۇندەستىكتىڭ باستى كورىنىسى وسىندا. ەلباسى اتاپ كورسەتكەندەي ۇەۇ-نىڭ بۇگىنگى باستى باعدارى ءدال وسى ماقساتتارعا باعىتتالسا, ودان تەك ۇتادى. قازاقستان ازاماتتارىنىڭ ارقايسىسى ءوز اۋماعى مەن ءوز مەملەكەتىنىڭ قوجايىنى ەكەنى انىق. مىنە, ءدال وسى اقيقاتتى وتانداستارىمىز سانا سەزىمدەرىنە سىڭىرە السا – ۇلكەن ولجا سول بولار ەدى. بۇل جالپى ادامزاتتىق دەموكراتيا تالاپتارىنا دا سايكەس كەلەدى. ويتكەنى, ءبىز ءبارىمىز – قوعام مەن جۇرتشىلىق ءبىر-ءبىرىمىز ءۇشىن جاۋاپكەرشىلىك ارقالايتىنىمىزدى ۇمىتپاساق ەكەن. سونىمەن بىرگە, ءوز كەزەگىندە بيلىك پەن حالىق ەلباسى تۇجىرىمداپ بەرگەندەي مەملەكەتتىڭ دامۋى مەن تاعدىرى جونىندەگى جاۋاپكەرشىلىكتى تەڭ بولىسسە, سول مەملەكەتتىڭ بولاشاعى دا سولعۇرلىم سەنىمدى ءارى جارقىن.
وسىلاي بولۋىنىڭ ءوزى دە تابيعي ءارى زاڭدىق تۇرعىدان تۋىندايدى. بىرىنشىدەن, كونستيتۋتسيادا كورسەتىلگەن تارماقتارعا سايكەس حالىق ەلدەگى بيلىكتىڭ بىردەن ءبىر قاينار كوزى بولىپ تابىلادى. وسى ىڭعايمەن ءسوز ساباقتاساق حالىق بيلىكتە قوعامدىق جانە ۇكىمەتتىك ەمەس ۇيىمدار رەتىندە تولىقتاي ءارى تىكەلەي قاتىسا الادى.
ەكىنشىدەن, بۇگىنگى كۇنى ءار ايماق پەن وبلىستىڭ, ءار قالا مەن اۋداننىڭ, ءار ەلدى مەكەننىڭ, اۋىلدىڭ تابيعي ءارى الەۋەتتى رەسۋرستارىن ورنىقتى جانە ءتيىمدى تۇردە پايدالانا ءبىلۋدىڭ ماڭىزى ايرىقشا. بۇل وتە كىنامشىل, جۇرەككە جاقىن الاتىن ماسەلە. سوندىقتان ونى تەك قانا جەرگىلىكتى تۇرعىنداردىڭ كەلىسىمىمەن ءارى كومەگى