كەشە, كۇندىزگى ساعات 11:07 شاماسىندا قالالىق ىشكى ىستەر ءبولىمىنىڭ جەدەل باسقارۋ ورتالىعىنىڭ كەزەكشىسىنە بەلگىسىز ازاماتتان قوڭىراۋ تۇسكەن. قوڭىراۋ شالعان ازاماتشا «قازكوممەرتسبانك» اق قىزىلوردا وبلىستىق فيليالىندا ارنايى قولدان جاسالعان جارىلعىش زاتتىڭ قويىلعاندىعىن جانە ونىڭ 15 مينۋتتان سوڭ جارىلاتىنىن ايتقان. ادامنىڭ زارەسىن ءزار تۇبىنە جەتكىزەتىن حاباردان كەيىن قىزىلوردانىڭ بۇكىل قۇزىرلى ورگانى ورىندارىنان ءدۇر كوتەرىلگەن. ايتىلعان جەرگە بارعان. سودان قىزىلوردا وبلىستىق ىشكى ىستەر دەپارتامەنتى, پروكۋراتۋرا, ۇلتتىق قاۋىپسىزدىك كوميتەتى جانە توتەنشە جاعدايلار جونىندەگى دەپارتامەنتىنىڭ ماماندارى بانكتەگى ازاماتتاردى سىرتقا شىعارىپ, ايماقتى وقشاۋلاعان. وسىدان كەيىن قىزىلوردا ىشكى ىستەر دەپارتامەنتىنىڭ ارنايى ماقساتتاعى «ارلان» جاساعى بانك عيماراتىن تەكسەرىپ, وندا جارىلعىش زاتتىڭ جوق ەكەندىگىن انىقتاعان.
ەندى نە ىستەمەك كەرەك؟ قۇقىق قورعاۋ ورگاندارىنىڭ قىزمەتكەرلەرى جەدەل ىزدەستىرۋ جۇمىسىنا كىرىسەدى. قايتكەندە دە جالعان اقپارات تاراتىپ, جۇرتتى دۇرلىكتىرگەن ادامدى تابۋعا ءتيىس. جەدەل جۇمىس ناتيجەسىن بەرمەي قالمادى. پوليتسيا قىزمەتكەرلەرىنىڭ ىزدەستىرۋ شارالارىنىڭ ناتيجەسىندە جالعان قوڭىراۋ شالعان 1968 جىلى تۋعان ايەل ۇستالدى. اتالعان دەرەك بويىنشا كۇدىكتىنىڭ ۇستىنەن قر قك-ءنىڭ 242-بابى بويىنشا قىلمىستىق ءىس قوزعالىپ, تەرگەۋ امالدارى دا باستالىپ كەتتى. كۇدىكتىنىڭ قىلمىسى تولىق دالەلدەنسە, وندا وعان سوت شەشىمىمەن 200-دەن 500-گە دەيىن ايلىق ەسەپ كورسەتكىشىندە ايىپپۇل سالىنادى. بولماسا, 7 جىلعا دەيىن باس بوستاندىعىن شەكتەۋ نەمەسە 6 جىلعا دەيىن باس بوستاندىعىنان ايىرۋ جازاسى تاعايىندالۋى مۇمكىن.
ادەتتە كوكتەم مەن كۇز مەزگىلىندە ادامداردا اۋىتقۋ بولادى. وقيعا سول مەزگىلدەردە بولسا, تۇسىنەر ەك. شىلىڭگىر شىلدەدە بۇل نە قىلعان دۇرلىكتىرۋ؟ الدە باسىنان كۇن وتكەن ادامنىڭ تىرلىگى مە ەكەن؟ نە بولسا دا, بەيبىت كۇندە بەرەكەمىزدى قاشىرعانى جاقسىلىق ەمەس.
ەرجان بايتىلەس,
«ەگەمەن قازاقستان».
قىزىلوردا.