وتكەن سەنبىدە جەڭىس الاڭىندا №5517 اسكەري ءبولىمىنىڭ بيىل جازدا اسكەر قاتارىنا شاقىرىلعان جاس ساربازدارى سالتاناتتى تۇردە ەلىن, وتانىن قورعاۋعا انت قابىلدادى. وسى سالتاناتتى راسىمگە ءبولىم باسشىلىعىنىڭ ارنايى شاقىرتۋىمەن الماتى, پاۆلودار جانە وڭتۇستىك قازاقستان وبلىستارىنان ات تەرلەتىپ ساربازداردىڭ اتا-انالارى كەلدى.
سونىمەن, بەلگىلەنگەن مەزەتتە, ياعني ساعات ءتىلى 10-دى كورسەتكەندە ءبولىم جەكە قۇرامى جەڭىس الاڭىندا ساپ تۇزەدى.
وقۋ پۋنكتىنىڭ باستىعى, پودپولكوۆنيك ەسكەندىر جىگىتوۆ پولك كومانديرى پودپولكوۆنيك ماماي قۇرمانتاەۆكا جەكە قۇرامنىڭ اسكەري انت قابىلداۋعا دايارلىعىن باياندادى. ءبولىمنىڭ جاۋىنگەرلىك تۋى الىپ ءوتىلدى. كوپ ۇزاماي بەلگىلەنگەن بەس نۇكتەدە جاستار اسكەري انتتىڭ كيەلى ءماتىنىن جىگەرلەنە وقىپ جاتتى. وسى ايتۋلى ساتتە ءوز بالالارىن وزدەرى تانىماي قالعان اتا-انالار ءوزارا كۇبىرلەسىپ, كەيبىرەۋلەرى كوزدەرىنە جاس تا الدى. ساربازداردىڭ ارقايسىسى وزدەرىن جاقسى كورسەتۋگە تىرىستى.
ودان كەيىن مەرەكە قوناقتارى مەن ءبولىم باسشىلىعى مىنبەگە كوتەرىلدى.
انت قابىلداۋ راسىمىندەگى سالتاناتتى جيىندى پولك كومانديرى پودپولكوۆنيك ماماي قۇرمانتاەۆ قۇتتىقتاۋ سوزبەن اشتى.ءوز كەزەگىندە «باتىس» وڭىرلىك قولباسشىلىعى قولباسشىسىنىڭ ورىنباسارى, پولكوۆنيك يساتاي جاردەموۆ, «باتىس» وڭىرلىك قولباسشىلىعى ارداگەرلەر كەڭەسىنىڭ توراعاسى زاپاستاعى پودپولكوۆنيك سانسىزباي توكاشەۆ, قۇقىق قورعاۋ ورگاندارىنىڭ باسشىلارى, ءدىن وكىلدەرى جانە ساربازداردىڭ اتا-انالارى اق تىلەكتەرىن ايتىپ, بالالارىنا باتالارىن بەردى.
مەرەكەلىك ميتينگتەن كەيىن جاس جاۋىنگەرلەر ساپتىق, قولما-قول ۇرىستىڭ كورسەتپەلى جاتتىعۋلارىن كورسەتتى.
شارا اياقتالعان سوڭ جينالعان مەيماندار كازارما ءۇي-جايىنا, ساربازدار اسحاناسىنا, مەديتسينالىق بەكەتكە كىرىپ, ءبولىمنىڭ تىنىس-تىرشىلىگىمەن تانىستى.سالتانات سوڭىندا اسكەري ءبولىمنىڭ كلۋبىندا ءبولىمنىڭ ۇرمەلى-اسپاپتار وركەسترى ءوز ونەرىن پاش ەتتى. قوناقتاردىڭ ويىنان شىققان وركەستر قۇرامى وزدەرىنىڭ ماقتاۋعا تۇرارلىقتارىن تاعى دا ءبىر دالەلدەپ بەردى.
كونتسەرتتەن كەيىن مەرەكەلىك تۇسكى اس بەرىلدى. اسكەر قاتارىنا كەلگەلى بەرى جاس ساربازدار العاشقى رەت «سەرۋەنگە شىعۋ قاعازىنا» يە بولدى. اتا-انالار مەن تۋىستارى كەلىپ بىرگە قىدىرىپ كەتىپ بارا جاتقان جولداستارىنا الىس ايماقتاردان اسكەر قاتارىنا شاقىرىلعان باسقا دا ساربازدار قىزىعا قارايدى. الايدا, اسكەري بولىمدە بۇل ماسەلە دە الدىن الا شەشىلىپ قويىلعان بولاتىن. قالعان جاس ساربازدار اسكەري ءبولىم باسشىلىعىنان مۇنداي سياپات كۇتپەسە كەرەك. ولار ءتۇس اۋا مادەنيەت جانە دەمالىس باعىنا جول تارتتى.
مەرەكەلىك جيىننان سوڭ پاۆلودار قالاسىنان كەلگەن قاتارداعى جاۋىنگەر بەكزات ابىشەۆتىڭ اناسى گۇلميرا سارسەنقىزىن سوزگە تارتتىق. ول ءوز سوزىندە: «بۇگىن تۇڭعىش ۇلىم بەكزاتتىڭ وتان الدىنداعى اسكەري انت بەرگەن ساتىنە كۋاگەر بولدىم. ۇلىمىزدىڭ وسى ورال شاھارىندا 5517 اسكەري ءبولىمىنىڭ ىشكى اسكەرلەر ساپىندا قىزمەت ەتەتىنىنە ريزامىن. جاس ساربازداردىڭ اسكەري ومىرگە قادام باسقان جولى اق بولسىن! اسكەري ءبولىمنىڭ باسشىلارىنا ايتارىم, بالالارىمىزدى وتانسۇيگىشتىككە, جولداستىققا ۇيرەتە بەرسىن. ساربازدار بەرگەن انتتارىنا زاتى لايىق ازاماتتار بولا بەرسىن! اتا-انالارىنىڭ ساعىنىپ جۇرگەنىن ءبىلىپ, ازعانا ۋاقىتتا وسى اسكەري مىندەتىن ابىرويلى اتقارسىن دەمەكپىن», – دەدى.
مىنەكي, 5517 اسكەري بولىمدەگى انت قابىلداۋ ءراسىمى وسىلاي ءوتتى. ەلىمىزدىڭ ىشكى اسكەرلەرىنىڭ قاتارى جاڭادان كەلگەن 154 جاس تولقىنمەن تولىقتى.
ەربولات سۇلتانوۆ,
مايور.
ورال.