تۇڭعىش پرەزيدەنت كۇنى مەرەكەسى قارساڭىندا قاراعاندى وبلىستىق تاريحي-ولكەتانۋ مۇراجايىندا ء«بىر وتان. ءبىر تاعدىر. ءبىر ەلباسى» اتتى كورمە اشىلدى. تاربيەلىك ءمانى زور بۇل مادەني شارا اياسىندا جۇرت نازارىنا تاريحي تۇرعىداعى قۇندىلىعى جىلدان جىلعا ارتىپ كەلە جاتقان جادىگەرلەر ۇسىنىلعان.
ناقتىراق ايتقاندا, كورمە سورەلەرىن تەمىرتاۋ قالاسىنداعى تۇڭعىش پرەزيدەنتتىڭ تاريحي-مادەني ورتالىعىنان الىنعان ەكسپوناتتار تولىقتىرعان. ولاردىڭ اراسىندا نۇرسۇلتان نازارباەۆقا قاتىستى ءتۇرلى كەزەڭدەردەگى فوتوسۋرەتتەر مەن قۇجاتتار, سونداي-اق ەلباسىنا وزگە مەملەكەتتەر باسشىلارى تابىس ەتكەن ەستەلىك سىيلىقتار بار. مىسالى كورمە قوناقتارى بۇل جەردەن ريم پاپاسى يوانن پاۆەل ءىى-ءنىڭ سىيلىعىن, 2010 جىلى رەسەي پرەزيدەنتى دميتري مەدۆەدەۆ سىيعا تارتقان كۇمىس مەدالدى كورۋگە بولادى.
سونىمەن قاتار, كورمە سورەسىنەن قازاقستانعا ساپارى كەزىندە بەلارۋس پرەزيدەنتى الەكساندر لۋكاشەنكو سىيلاعان اسپالى تارەلكە دە ورىن العان. شەتى ويۋ-ورنەكپەن كومكەرىلگەن, ورتاسىندا شاعىن بەدەرلى شەڭبەرى بار بۇل كادەسىي قازاقستان مەن بەلارۋس حالىقتارىنىڭ دوستىعى مەن ءوزارا تۇسىنىستىگىن بەينەلەيدى.
سونداي-اق كەلۋشىلەر نازارىنا 2011 جىلى ەلباسىنا قىرعىز رەسپۋبليكاسىنىڭ دەلەگاتسياسى تابىس ەتكەن ارقار مۇيىزىنەن جاسالعان كادەسىي كومپوزيتسياسى دا ۇسىنىلعان. بۇل قولونەر تۋىندىسىندا باۋىرلاس تۇركى حالىقتارىنىڭ تۋىسقاندىعى اسقان شەبەرلىكپەن كەسكىندەلگەن.
جادىگەرلەردىڭ اراسىنان «قازاقستان» كادەسىي كومپوزيتسياسىنا دا ورىن ءتيىپتى. مۇنداعى «نايزالى سالت اتتى» تۋىندىسىن «اتريۋم» ورتالىعى سىيعا تارتقان.
قاراعاندى وبلىستىق تاريحي-ولكەتانۋ مۇراجايى مەن تەمىرتاۋ قالاسىنداعى تۇڭعىش پرەزيدەنتتىڭ تاريحي-مادەني ورتالىعى اراسىنداعى ىنتىماقتاستىق اياسىندا ۇيىمداستىرىلعان كورمەنىڭ ەسىگى 10 جەلتوقسانعا دەيىن كەلۋشىلەرگە اشىق بولادى.
قايرات ءابىلدا,
«Egemen Qazaqstan»
قاراعاندى وبلىسى