«Kazakh Tourism» ۇلتتىق كومپانياسى ۇيىمداستىرعان ءۇشىنشى رەسپۋبليكالىق اقپاراتتىق تۋر ءوز مارەسىنە جەتتى. قاراشانىڭ 22-24 ارالىعىنداعى ءۇش كۇندىك تۋر اياسىندا ەلىمىزدىڭ تۇكپىر-تۇكپىرىنەن كەلگەن 23 تۋر وپەراتور ششۋچينسك-بۋراباي كۋرورتتىق ايماعىن ارالادى. الماتى, قىزىلوردا, قاراعاندى, تاراز, شىمكەنت, قوستاناي, پەتروپاۆل, سەمەي, وسكەمەن جانە ەلوردانىڭ وكىلدەرى جەرگىلىكتى ءتۋرونىمدى پىسىقتاپ, جاڭا ۇسىنىستارمەن تانىستى. بۇل تۋرالى مادەنيەت جانە سپورت مينيسترلىگىنىڭ ءباسپاسوز قىزمەتى حابارلادى.
اقپاراتتىق تۋردىڭ العاشقى كۇنى اقمولا وبلىسى مەن ششۋچينسك-بۋراباي كۋرورتتىق ايماعىنىڭ تانىستىرىلىمى جانە b2b كەزدەسۋلەر ۇيىمداستىرىلدى. ناتيجەسىندە, وڭىرلەردەن كەلگەن تۋر وپەراتورلار جەرگىلىكتى تۋريستىك بيزنەس وكىلدەرىمەن ارىپتەستىك جونىندەگى مەموراندۋمدارعا قول قويدى.
كۋرورتتىق ايماقپەن تەرەڭىرەك تانىسۋ ءۇشىن تۋرعا قاتىسۋشىلار بىرقاتار تۋريستىك نىساندارعا ات باسىن بۇرعان ەدى. ولاردىڭ ىشىندە, اشىق اسپان استىنداعى بوتاي ءداۋىرىنىڭ تۇراعى «بوتاي بۋراباي» مۋزەيى, تاس اۋىلى, ابىلاي حان الاڭدارى بار.
سونداي-اق ەكسكۋرسيا بارىسىندا تۋر وپەراتورلار بولەكتاۋدىڭ باسىنا شىعىپ, سوقپاق جولمەن ءجۇردى. بۇدان كەيىن, مارال وسىرەتىن شارۋاشىلىق مەن پانتوكرين نەگىزىندە مەديتسينالىق ەم- دوم جاسايتىن ءساناتوريدىڭ جۇمىسىمەن تانىسىپ, «Burabayland» وتباسىلىق دەمالىس ساياباعىنداعى جەكە رەزيدەنتسياسى بار اياز اتامەن كەزدەستى.
اقپاراتتىق تۋردىڭ ەكىنشى كۇنى تۋر وپەراتورلار توبى وقجەتپەس باۋرايىنداعى شيپاجاي جانە بۋراباي, بولشوە چەباچە كولدەرى جاعاسىنداعى دەمالىس ورىندارىنا ات باسىن بۇردى. تۋر وپەراتورلار كۇن ۇزاق ءار قوناقۇيدىڭ ۇسىنار اس ءمازىرى, ويىن-ساۋىق باعدارلاماسى مەن باعاسىن باعامدادى. بۇدان بولەك, بىلتىر قولدانىسقا بەرىلگەن تاۋ-شاڭعى ءترامپلينىن تاماشالادى. وسىلايشا, اقپاراتتىق تۋردىڭ ەكىنشى كۇنىندە تۋر وپەراتورلار قول جەتىمدى باعاداعى جانە ليۋكس ساناتىنا ەنەتىن قوناقۇيلەردىڭ ءتىزىمىن جاساقتادى.
باعدارلامانىڭ ءۇشىنشى كۇنى اقپاراتتىق تۋرعا قاتىسۋشىلار زەرەندى اۋدانىنىڭ تۋريستىك الەۋەتىنە زەر سالدى. قاراعايلى ورماننىڭ ساياسىنداعى نىسانداردىڭ دەنى وتباسىلىق دەمالىستى ۇيىمداستىرۋعا لايىقتالعان. سونداي-اق مەكتەپ دەمالىسى كەزىندە وقۋشىلاردى قابىلداۋعا ارنالعان نىساندار دا قاراستىرىلعان. ايتا كەتەرلىگى, مۇنداعى بۇرىنعى دەمالىس نىساندارىن اباتتاندىرىپ, جاڭعىرتۋعا, سونىمەن قاتار, جاڭا ۇلگىدەگى قوناقۇيلەردى سالۋعا مەملەكەتتىك قولداۋ سەپ بولىپ وتىر.
قوستانايلىق تۋر وپەراتورى الماگۇل ەسەنەەۆانىڭ پىكىرىنشە, زەرەندىدەگى ءتۋريزمدى دامىتۋعا جەرگىلىكتى كاسىپكەرلەردىڭ دەن قويعانى ءتانتتى ەتەدى. «تۋعان ولكەسىن جان-تانىمەن سۇيەتىن, ءارى سىرتتان كەلۋشى مەيمانداردى جىلى قارسى الاتىن جاناشىر ازاماتتاردى كورگەندە, بۇل وڭىردەگى ءتۋريزمنىڭ مىندەتتى تۇردە داميتىنىنا كوزىم جەتتى. دەمەك, الداعى ۋاقىتتا تۇرعىنداردى ەش الاڭسىز وسى جەرلەرگە جىبەرۋگە بولادى. ىشكى تۋريستەردى عانا ەمەس, شەتەلدىك تۋريستەردى دە بۋرابايعا شاقىراتىن بولامىز,» - دەيدى قوستانايلىق تۋر وپەراتور.
وسىلايشا, بۋرابايدىڭ تۋريستىك الەۋەتىمەن تانىس بولعان اقپاراتتىق تۋر قاتىسۋشىلارى ىشكى نارىقتا جاڭا ونىمدەردى ۇسىنۋعا بولاتىنىنا تاعى كوز جەتكىزدى. ءۇش كۇنگە سوزىلعان تۋر باعدارلاماسىنىڭ تىعىزدىعىنا قاراماستان, ايماقتىق تۋر وپەراتورلار قاجەت اقپاراتپەن الماسىپ, ءوزارا بايلانىس ورناتا الدى.
ەلوردالىق تۋر وپەراتور مەيرامگۇل جالعاسقىزىنىڭ ايتۋىنشا, مۇنداي اقپاراتتىق تۋرلاردىڭ تيگىزەر پايداسى مول. «قازاقستاننىڭ تۇكپىر-تۇكپىرىن ارالاپ, ىشكى تۋريزمدەگى ۇسىنىستاردى باعامداۋعا تۋر وپەراتورلاردىڭ وزدىگىنەن شاماسى كەلمەس ەدى. ەلىمىزدىڭ تۋر بيزنەس قاۋىمداستىعىنىڭ تالاپ-تىلەگىن جەرگە قالدىرماي, وسىنداي شاراپاتى مول شارانىڭ ۇيىمداستىرعان «Kazakh Tourism» ۇلتتىق كومپانياسى جانە قر تۋريزم يندۋسترياسى كوميتەتىنە العىسىمىز زور», - دەيدى مەيرامگۇل جالعاسقىزى.
اتاپ وتەرلىگى, بۋراباي كۋرورتتىق ايماعى تۋريستىك كارتانىڭ توپ-10 باسىم باعىتىنىڭ تىزىمىنە ەنسە, زەرەندى اۋدانى توپ-50 قاتارىندا. بۋرابايداعى تۋريزم ءتورت نەگىزگى ايماقتا, اتاپ ايتقاندا ساناتوريالىق-كۋرورتتىق ايماق, استانا ماڭىنداعى دەمالىس ايماعى, كيەلى جەرلەر مەن قورىق ايماعى, جانە تابيعي ايماقتا جۇزەگە اسپاق.
«بۋراباي كۋرورتىنىڭ تارتىمدىلىعىن ارتتىرىپ, جىل ون ەكى اي بويى جۇمىسىن قامتاماسىز ەتۋ ماقساتىندا كاسىپكەرلەردى ىسكە تارتا وتىرىپ, «Four seasons», ياعني, جىلدىڭ ءتورت بىردەي مەزگىلىندەگى جۇمىس تۇجىرىمداماسىن ازىرلەدىك», - دەيدى جەرگىلىكتى تۋريستىك اقپاراتتىق ورتالىق جەتەكشىسى, ەرلان مۋسيپوۆ. بيىلدىڭ وزىندە وبلىس اۋماعىندا 52 شارا ۇيىمداستىرىلعان.
ەستەرىڭىزگە سالا كەتسەك, وتاندىق تۋر وپەراتورلارعا ارنالعان اقپاراتتىق تۋر قر مادەنيەت جانە سپورت مينيسترلىگىنىڭ قولداۋىمەن ءۇشىنشى مارتە ۇيىمداستىرىلدى. جىل سوڭىنا دەيىن تاعى ءبىر تۋردى ۇيىمداستىرۋ جوسپاردا بار.