قازىرگى تاڭدا ەلىمىزدىڭ بارلىق ايماقتارىندا «التىن كۇز» تاقىرىبىندا ءتۇرلى مەرەكەلىك شارالار ۇيىمداستىرىلۋدا. بارشامىزعا بەلگىلى, كۇز ماۋسىمىندا جەر انانىڭ ادام بالاسىنا ۇسىنار مول ىرىس-نەسىبەسى ديقانداردىڭ تاڭنىڭ اتىسى, كۇننىڭ باتىسى تىنباي ەڭبەك ەتۋىنىڭ ارقاسىندا قامباعا قۇيىلادى. سوندىقتان دا استىق ءپىسىپ, ونى شاشپاي-توكپەي جيناپ الۋ ءىسى ءدال وسى كۇز ايلارىندا جۇزەگە اسىرىلاتىندىقتان, وسى ماۋسىمعا حالقىمىز «التىن كۇز» دەپ ايدار تاققان.
بۇل مەزگىلدە حالىق نەسىبەسى, ەل ىرزىعى عانا جينالىپ قويمايدى, سونداي-اق ونىڭ وسى كەزەڭدە ۇرپاقتى ەڭبەككە, وتانسۇيگىشتىككە باۋلۋ, تابيعاتتى تانۋ, جەر انانىڭ قاسيەتىن ءبىلۋ جانە باسقا دا يگى ىستەر نەگىزىندە تاربيەلەۋ ىسىندە ورنى ايقىندالا تۇسەدى.
ماسەلەن, جىل سايىن مول بايلىعىن ۇسىنار كۇز ماۋسىمى كەلگەندە مەكتەپتەر, بالاباقشالار تاقىرىپقا سايكەس بەزەندىرىلىپ, وسى باعىتتاعى ءتۇرلى تانىمدىق-مەرەكەلىك شارالار تاربيەلىك ءمانى زور قۇرالعا اينالادى. ءسوزىمىز دالەلدى بولۋ ءۇشىن ايتا كەتەيىك, تاياۋدا نۇر-سۇلتان قالاسىنداعى №18 «اياجان» بالاباقشاسىندا «التىن كۇز» شاراسى ۇيىمداستىرىلىپ, جاس وسكىندەردىڭ تانىم-تۇسىنىگىنە وڭ اسەرىن تيگىزەتىن ماعلۇماتتار بەرىلدى, تاربيەلەنۋشىلەر وزدەرى جاتتاعان تاقپاقتارىن ايتىپ, كورىنىستەر قويدى. سونىڭ ىشىندە, اتالعان بالاباقشانىڭ ء«بۇلدىرشىن» توبىنداعى تاربيەلەنۋشىلەر «التىن كۇز» مەرەكەسىنە تىڭعىلىقتى دايىندالعاندارىن كورسەتتى.
ء«بۇلدىرشىن» توبىنىڭ تاربيەشىسى, ۇزاق جىلدار ءبىلىم بەرۋ, جاستار تاربيەسى سالاسىندا بار قاجىر-قايراتىن جۇمساپ ەڭبەك ەتىپ كەلە جاتقان تاجىريبەلى مامان تۇردىگۇل الدامۇراتقىزى حوجاباەۆانىڭ ايتۋىنشا, №18 «اياجان» بالاباقشاسىنىڭ ۇجىمى بالالاردى جاقسىلىققا ۇندەۋ, يگى ىستەرگە باۋلۋ باعىتىنداعى شارالاردى ۇيىمداستىرۋ بارىسىندا ەلىمىز ءۇشىن ماڭىزى زور اتاۋلى كۇندەردىڭ, ءتۇرلى مەرەكەلەردىڭ ءمان-ماڭىزىن اشىپ كورسەتە وتىرىپ, ولاردى ءتيىمدى پايدالانۋعا باسىمدىق بەرەدى.
«جىل سايىن مامىراجاي جەتەتىن كۇز مەزگىلىنىڭ حالىق ءۇشىن قاشاندا ماڭىزى زور. ونىڭ ارتىقشىلىقتارىن ايتىپ تاۋىسا المايسىز... ءبىز ءاربىر كۇز ماۋسىمى كەلگەن سايىن بالالارعا ونىڭ ءمان-ماڭىزىن, ىرزىق-نەسىبەسىن ءتۇسىندىرۋ ماقساتىندا ءتۇرلى شارالار ۇيىمداستىرامىز. مۇنداي شارالار كەزىندە بالالار وزدەرىنە ۇنايتىن جەمىس-جيدەكتەر, ءداندى داقىلدار, كوكونىستەر بەينەلەنگەن نەمەسە سولارعا ۇقساستىرىلا تىگىلگەن كيىمدەر كيىپ, تاقپاقتار ايتىپ, قويىلىمدار كورسەتەدى. بۇل ءوز كەزەگىندە جاس وسكىننىڭ ءوز تۋعان جەرىنىڭ قاسيەتىن ۇعىنۋعا, تابيعاتتى ءسۇيۋدى ۇيرەنۋگە كومەكتەسەدى», دەيدى ت.حوجاباەۆا.