28 قازاندا لوندوندا قازاقستان رەسپۋبليكاسى مادەنيەت جانە سپورت مينيسترلىگى, قازاقستان رەسپۋبليكاسىنىڭ ۇلىبريتانيا مەن سولتۇستىك يرلانديا قۇراما كورولدىگىندەگى ەلشىلىگى جانە ش.ايمانوۆ اتىنداعى «قازاقفيلم» كينوستۋدياسىنىڭ ۇيىمداستىرۋىمەن قازاق كينوسىنىڭ اپتالىعى وتەدى. بۇل تۋرالى مادەنيەت جانە سپورت مينيسترلىگىنىڭ ءباسپاسوز قىزمەتى حابارلادى.
قازاق كينوسى كۇندەرى اۋعانستاننان ەلگە ورالعان قانداستارىمىز تۋرالى باياندايتىن «ورالمان» فيلمىمەن اشىلادى. كورەرمەندەرگە بۇل تۋىندىنى قازاقستاننىڭ ەڭبەك سىڭىرگەن قايراتكەر, ءفيلمنىڭ ستسەناري اۆتورى نۇرلان سانجار تانىستىرادى.
سونداي-اق قازاق كينوسىنىڭ اپتالىعى شەڭبەرىندە «قازاقفيلم» كينوستۋدياسى شىعارعان وزگە دا كينوتۋىندىلار كورسەتىلەدى.
-29 قازان رەجيسسەر قازاقستاننىڭ ەڭبەك سىڭىرگەن قايراتكەرى, باستى ءرولدى سومداعان اكتەر ءادىل احمەتوۆ تانىستىرۋىمەن اقان ساتاەۆتىڭ «اناعا اپارار جول» تاريحي دراماسى كورسەتىلەدى.
-30 قازان ساتىبالدى نارىمبەتوۆتىڭ «امانات» ءفيلمى ۇسىنىلادى. تاريحي كينوتۋىندىنى قازاقستاننىڭ ەڭبەك سىڭىرگەن قايراتكەرى, باستى ءرولدى سومداعان اكتەر بەرىك ايتجانوۆ تانىستىرادى.
-31 قازان ەرمەك تۇرسىنوۆتىڭ «شال» ءفيلمى كورەرمەنگە جول تارتادى. ءفيلمدى قازاقستاننىڭ ەڭبەك سىڭىرگەن قايراتكەرى, پروديۋسەر قانات تورەباي تانىستىرادى.
ال 1 قاراشادا قازاق كينو اپتالىعىنىڭ جابىلۋ سالتاناتىندا «ايكا» ءفيلمى كورسەتىلەدى. بۇل ءفيلمنىڭ كورسەتىلىمىنە رەجيسسەر سەرگەي دۆورتسەۆوي جانە اكتريسا سامال ەسلياموۆا قاتىسادى.
ءاربىر كينوكورسەتىلىمىنەن سوڭ لوندونداعى بەدەلدى جوو پروفەسسورلارى مەن كينوسىنشىلارى فيلم تۋرالى وي پىكىرلەرىمەن بولىسەدى.
قازاق كينوسى لوندونداعى Vue West End كينوتەاترىندا كورسەتىلەدى.