پارلامەنت سەناتىنىڭ الەۋمەتتىك-مادەني دامۋ جانە عىلىم كوميتەتىنىڭ مۇشەلەرى سەنات اپپاراتىندا تاعىلىمدامادان وتكەن «جاستار كادرلىق رەزەرۆى» رەسپۋبليكالىق جوبا جەڭىمپازدارىمەن كەزدەسۋ وتكىزدى. بۇل تۋرالى پارلامەنت سەناتىنىڭ ءباسپاسوز قىزمەتى حابارلادى.
كەزدەسۋگە سونداي-اق «بولاشاق» قازاقستان رەسپۋبليكاسىنىڭ پرەزيدەنتىنىڭ حالىقارالىق ستيپەندياسى ستيپەندياتتارى قاۋىمداستىعىنىڭ وكىلدەرى قاتىستى.
كوميتەت حاتشىسى سەرىك بەكتۇرعانوۆ سەناتتىڭ قۇرىلىمى مەن قىزمەتى تۋرالى ايتىپ, سەناتورلاردىڭ جۇمىسىنا قىسقاشا شولۋ جاسادى.
«بولاشاق» قازاقستان رەسپۋبليكاسىنىڭ پرەزيدەنتىنىڭ حالىقارالىق ستيپەندياسى ستيپەندياتتارى قاۋىمداستىعىنىڭ اتقارۋشى ديرەكتورى لاۋرا دەمەسينوۆا جاس ماماندار ءۇشىن كادرلىق رەزەرۆتىڭ جاقسى باستاما ەكەنىن اتاپ ءوتتى. قازىرگى ۋاقىتتا رەزەرۆ قۇرامىندا 500-دەن استام مامان بار.
كەزدەسۋ بارىسىندا دەپۋتاتتار جاس مامانداردىڭ سۇراقتارىنا جاۋاپ بەرىپ, ۇسىنىستارىن تىڭدادى.