تەمىر جول تاسىمالى جەتىلدىرىلە تۇسەدى

«قازاقستان تەمىر جولى» ۇك» اق ءباس­پاسوز قىزمەتىنىڭ حابارلاۋىنشا, تمد ەل­دەرى تەمىر جولدارى جەلىسىندە 2019 جىل­دىڭ توعىز ايىنىڭ قورىتىندىسى بويىن­شا 1 ملرد 506 ملن توننادان استام جۇك تاسىمالداندى. بۇل بىلتىرعى سايكەس كەزەڭ­نىڭ دەڭگەيىمەن سالىستىرعاندا 6%-عا تومەن­دەگەنىن كورسەتەدى. دەسە دە تەمىر جول اكىم­شىلىكتەرىنىڭ كوپشىلىگى مىندەتتەمەلەرىن تولىق ورىنداپ وتىر. دوستاستىق ەلدەرى تەمىر­جولدارىمەن كونتەينەرلىك جۇك تاسىمالى وتكەن جىلدارداعى كورسەتكىشتەرمەن سالىستىرعاندا 14,3%-عا وسكەن.

وتىرىس بارىسىندا مەملەكەتارالىق ءتۇيىسۋ پۋنكتتەرىنىڭ جۇمىستارىن جەتىلدىرۋ, كونتەينەرلىك قۇرامدار قوزعالىسىنىڭ كەستەسىن ورىنداۋ, پويىزداردى قۇراستىرۋ جانە وتكىزۋگە بايلانىستى, حالىقارالىق قاتىناستاعى جۇكتەردى تاسىمالداۋدا ۇيىمداستىرۋ جۇمىستارىن جاقسارتۋ جونىندەگى شارالار ايقىندالدى. 2020 جىلعا بارلىق جىلجىمالى قۇرام بو­يىنشا جۇك ۆاگوندارىن پايدالانۋداعى قازىرگى مولشەرلەمە كولەمىن ساقتاۋ تۋرالى شەشىم قابىلداندى. سونداي-اق تەمىر جول كولىگى سالاسىنداعى ءنورماتيۆتى-تەحنيكالىق قۇجاتتارىن وزەكتەندىرۋ ماسەلەلەرى قارالدى. 2019 جىلدىڭ 1 قاراشاسىنان باستاپ جۇك ۆاگوندارىن جەدەل قايتارۋ رەجىمىندە بۇزۋشىلىقتاردى ەسەپكە الۋ ءتارتىبى تۋرالى ادىستەمە جانە حالىقارالىق جولاۋشىلار قاتىناسىنا قاتىستى كەلىسىمگە وزگەرىستەر مەن تولىقتىرۋلار ەنگىزۋ كۇشىنە ەنەدى. 2019-2020 جىلدارعا ارنالعان حالىقارالىق قاتىناستاعى ۆاگون اعىنى باعىتىنىڭ ءتارتىبى, جۇك پويىزدارى مەن كونتەينەرلى ۆاگونداردى قۇرۋ جوسپارى, پويىزدار قوزعالىسىنىڭ كەستەسى بەكىتىلدى. 2019 جىلدىڭ 15 جەلتوقسانىنان جۇكتەردىڭ بىرىڭعاي تاريفتىك-ستاتيستيكالىق نومەنكلاتۋراسىنا وزگەرىستەر مەن تولىقتىرۋلار ىسكە اسا باستايدى. سونداي-اق ۆاگون مەن جولاۋشىلار شارۋاشىلىعىنا, جۇكتەردى تاسىمالداۋ ماسەلەلەرى بويىنشا بىرقاتار قۇجاتتارعا ەنگىزىلگەن وزگەرىستەر مەن تولىقتىرۋلار بەكىتىلدى.

قابىلدانعان شەشىمدەر مەملەكەتارالىق قاتىناستاعى تەمىر جول جەلىسى قىزمەتىنىڭ, جۇكتەر مەن جولاۋشىلار تاسىمالىنىڭ تيىمدىلىگىن ارتتىرۋعا, جىلجىمالى قۇرامدى تەحنيكالىق ۇستاپ تۇرۋ, جوندەۋ جونىندەگى جۇمىستاردى جاقسارتۋعا باعىتتالعان.وتىرىسقا قاتىسۋشىلار 2019 جىلدىڭ مامىرىندا وتكىزىلگەن, جۇك ۆاگوندارىنا نومەرلىك ساناق قورىتىندىسىن شىعاردى. يران تەمىر جول اكىمشىلىگىنە قاۋىمداستىرىلعان مۇشە ستاتۋسى بەرىلدى. بيىل قازان ايىنىڭ سوڭىندا تالليندە وتەتىن الداعى XXVIII تاريفتىك كونفەرەنتسيادا قابىلداناتىن 2020 فراحتالىق جىلىنا حالىقارالىق قاتىناستاعى جۇك تاسىمالىندا تمد مۇشە-ەلدەرى تەمىر جولدارىنىڭ تاريفتىك ساياساتى تۋرالى ماسەلە تالقىلاندى. جالپى, دوستاستىققا مۇشە-مەملەكەتتەردىڭ تەمىر جولى جەلىسى بويىنشا جولاۋشىلار مەن جۇك پويىزدارىنىڭ كەدەرگىسىز قوزعالىسىن, تەمىر جول كولىگىنىڭ ۇزدىكسىز جۇمىسىن قامتاماسىز ەتۋ جونىندەگى 10-نان اسا ماسەلە قارالىپ, كەلىسىلدى.

«ەگەمەن-اقپارات»