بۇگىن ەلوردا اكىمدىگىندە ەل پرەزيدەنتى قاسىم-جومارت توقاەۆتىڭ توراعالىعىمەن نۇر-سۇلتان قالاسىن ودان ارى دامىتۋ ماسەلەلەرى جونىندەگى ءماجىلىس ءوتىپ جاتىر.
مەملەكەت باسشىسى ءوز سوزىندە ەلوردا ەلىمىزدىڭ نەگىزگى ءارى اسا ماڭىزدى جوباسى ەكەنىن اتاپ ءوتتى.
«بۇكىل الەمگە نازارباەۆ مودەلى نەمەسە قازاقستان جولى دەپ مويىندالعان ستراتەگيا ءدال وسى شاھاردان باستالدى. ەلباسى نۇرسۇلتان نازارباەۆتىڭ باستاماسىمەن سالىنعان استانا جىلدان جىلعا دامىپ كەلە جاتىر. بۇگىندە ەۋرازيانىڭ جۇرەگىندە ورنالاسقان ەلوردامىز ءىرى ساياسي-ەكونوميكالىق, مادەني جانە ءبىلىم ورتالىعى بولىپ قالىپتاستى», - دەدى مەملەكەت باسشىسى.
قاسىم-جومارت توقاەۆ باس قالانىڭ بىرقاتار جەتىستىگىنە, ونىڭ ىشىندە قالا ينفراقۇرىلىمىنىڭ قارقىندى دامىپ كەلە جاتقانىنا توقتالا كەلە, وسى دامۋ قارقىنىن باسەڭدەتپەي, ارى قاراي كۇشەيتۋ كەرەكتىگىن باسا ايتتى.