«ەل ءىشى – ونەردىڭ كەنىشى» دەگەن راس. التىن بەسىك اۋىلداردى ارالاساڭ ەل مەن جەردىڭ جاقسىلىعىن دارىپتەيتىن, ۇلتىمىزدىڭ نەشە ءتۇرلى ونەرىن تۋ ەتكەن دارىندى جانداردى ءجيى كەزدەستىرىپ جاتاسىڭ. سونداي تالانتتاردىڭ ءبىرى – جەتىسۋدىڭ ءتورى سانالاتىن اسپانتاۋ ولكەسىنىڭ تۋماسى, نارىنقول اۋىلىندا تۇراتىن قىلقالام شەبەرى نۇربولات ىسقاقوۆ. قازاقستان رەسپۋبليكاسىنىڭ مادەنيەت قايراتكەرى, قازاقستان سۋرەتشىلەر وداعىنىڭ مۇشەسى, كوركەمسۋرەت اكادەمياسىنىڭ كوررەسپوندەنت-مۇشەسى, اتالعان اكادەميانىڭ «تاراندا ۆەليكوگو ەليا» اتتى مەدالىنىڭ يەسى نۇربولات ىسقاقوۆتى كوپ جۇرت بىلە بەرمەگەنىمەن, ءوز سالاسىنىڭ بىلگىر مامانى رەتىندە ەلگە ەلەۋلى قىزمەت ەتىپ كەلەدى.
رايىمبەك اۋدانىنىڭ ءبىر ارتىقشىلىعى, مەرەيلى تويلار كەزىندە سۋرەتشى نۇربولات ىسقاقوۆتىڭ سالعان سۋرەتتەرىنەن ۇنەمى كورمە ۇيىمداستىرىپ وتىرادى. ويتكەنى سۋرەتشىنىڭ بۇكىل شىعارماشىلىق الەمى تۋعان ەل مەن جەرگە, سول ولكەدەن شىققان دارا تۇلعالارعا ارنالعان.
جالپى, ن.ىسقاقوۆتىڭ جىلداپ سالعان, كوزىنىڭ قاراشىعىنداي ارنايى جيناپ قويعان شىعارماشىلىق الەمىنە كوز توقتاتپاي كەتۋ مۇمكىن ەمەس. رەسپۋبليكامىزدىڭ ەڭ كورىكتى جەرلەرىنىڭ ءبىرى, الىس-جاقىن شەتەلدەردەن ارنايى قىزىعىپ كەلىپ كورىپ جاتاتىن ايگىلى ءحانتاڭىرى شىڭى اعامىزدىڭ قىلقالامىندا نەشە ءتۇرلى كەلبەتىمەن كوز تارتىپ تۇرعاندا, ماقتانىش سەزىمىنە شىن بەرىلىپ كەتەسىڭ. حانتاڭىرىمەن قوسا, وسىناۋ سىرلى دا نۇرلى ولكەدەن شىققان مۇقاعاليداي اقيىق اقىنىمىز بار. نۇربولات ىسقاقوۆتىڭ شىعارماشىلىعىندا شايىر بەينەسى شىنايى كورىنىس تاپقان. اقىننىڭ تەرەڭ ويلى ءارى شابىتىنا بەرىلگەن ساتتەرى قىلقالامنىڭ قۇدىرەتىمەن وتە وزگەشە كورسەتىلگەن. اۋىلدا تۇراتىن سۋرەتشى بۇل ءۇشىن قانشاما ۋاقىتىن, ساعاتتارعا سوزىلعان كۇندەرى مەن تۇندەرىن جۇمسادى دەسەڭىزشى؟! ءيا, بۇل ۇلكەن ەڭبەك, ۇلكەن دۇنيە.
ەڭبەگىنە قاراي ازدى-كوپتى اتاققا قول جەتكىزگەنى بولماسا, قاراپايىم سۋرەتشى نارىنقول اۋىلىنان ەش ۇزاعان ەمەس. بيىل كوكتەمدە عانا زەينەت دەمالىسىنا شىققان ونەر يەسى ورتا مەكتەپتى تامامداعان سوڭ, الماتى قالاسىنداعى كوركەمسۋرەت ۋچيليششەسىن كەسكىندەمە ماماندىعى بويىنشا ءبىتىرىپ, سودان بەرگى ۋاقىتتا ب.سوقپاقباەۆ اتىنداعى ورتا مەكتەپتە وقۋشىلارعا سۋرەت پانىنەن ءدارىس بەرىپ كەلدى. شاكىرتتەرىنە ۇيرەتكەنى كوپ, ۇسىنعانى جەتەرلىك. بۇگىندە نۇر-سۇلتان قالاسىندا تۇراتىن بەلگىلى سۋرەتشى, الماس سىرعاباەۆتاي شاكىرتىنەن باستاپ, ماقپال دىلداەۆا, فارحات سارتباەۆ, اقىلبەك شاكەنوۆ, الۋا انۋارقودجا, ءنۇسىپ سۇلتان, راۋان باقتيار, ءمادي كەنجەبەك سەكىلدى شاكىرتتەرى بولاشاعىنان ءۇمىت كۇتتىرەتىن سۋرەتشىلەر.
ءيا, نۇربولات ىسقاقوۆ زەينەتكەرلىك جاسىنا كەلگەنشە ايتارلىقتاي ەڭبەك ەتكەن جان. جاپ-جاقسى شىعارماشىلىق الەمى بار. الماتى قالاسىندا ەكى دۇركىن شىعارماشىلىق كورمەسىن وتكىزگەن نۇرەكەڭنىڭ ءا. قاستەەۆ اتىنداعى رەسپۋبليكالىق مۇراجايدا «جايلاۋعا اۆتوكلۋب كەلدى» اتتى تۋىندىسى تۇرعانىن دا ايتا كەتكەنىمىز ءجون.
جالپى, رايىمبەك پەن كەگەن اۋداندارى تاريحي قۇندىلىققا تولى ءوڭىر. 1916 جىلعى ۇلت-ازاتتىق كوتەرىلىسىنىڭ ءبىر وشاعى قارقارا جەرىندە تۇتانعانى بەلگىلى. نۇربولات ىسقاقوۆتىڭ ءبىراز دۇنيەسى ءدال وسى قارقارا كوتەرىلىسىنە ارنالعان. ونىڭ سىرتىندا حالىقتىڭ ۇرانىنا اينالعان حاس باتىر رايىمبەك بابامىز جونىندە سۋرەتتەرى دە بارشىلىق. اسىرەسە باتىر بابامىزدىڭ كوكمويناعىمەن بەرىلگەن سۋرەتى اسەرلى شىققان. راس, باتىر بابامىزدىڭ ءوز تۇسىندا ىلە وزەنىن كەشىپ وتكەنى تۋرالى اڭىز اڭگىمەلەر بارشىلىق. سۋرەتشى ءوزىنىڭ «ىلە بويىندا» اتتى تۋىندىسىندا باتىر بابامىزدىڭ جورىعىن ءبىر قىرىنان كورسەتە بىلگەن. كەنەپكە مايلى بوياۋمەن سۋرەت سالاتىن اعامىزدىڭ بىرقاتار شىعارماشىلىعى تاۋەلسىزدىگىمىزگە, جەلتوقسان كوتەرىلىسىنە ارنالعان. ال تۋعان جەردىڭ تاماشا تابيعاتىن مولدىرەتە تىزگەن تاڭعاجايىپ تۋىندىلارى ءوز الدىنا جەكە الەم. ولاردى كورىپ ءبىر قۋانىپ, ءبىر كوتەرىلىپ سالا بەرەسىڭ. سول تۇستا تۋعان ولكەنى كوركەم دە كورنەكتى شىعارمالارىنا ارقاۋ ەتىپ جۇرگەن سۋرەتشى اعامىزعا دەگەن ريزاشىلىعىمىز ارتا تۇسەدى.
«كانيكۋلعا كەتىپ بارامىن» دەپ العاشقى سۋرەتىن سالعان سۋرەتشى بۇل كۇندە ۇلتىمىزدىڭ تاريحي تاعدىرى تۋرالى قۇندى دۇنيەسىن سالۋمەن اينالىسىپ جاتىر. بۇل جۇمىسپەن شۇعىلدانا باستاعانىنا ەكىنشى جىل ءوتىپتى.
نۇربولات ىسقاقوۆ شىعارماشىلىعىنان بولەك, وتباسىندا دا ونەگەلى, سىيلى ادام. جۇبايى بالجان وماروۆا بار عۇمىرىن ۇستازدىققا ارناعان, كوپ ۋاقىتىن مەكتەپ باسقارۋ ىسىنە جۇمساعان ۇلاعاتتى ۇستاز. رايىمبەك اۋدانىنىڭ قۇرمەتتى ازاماتى, ى. التىنسارين اتىنداعى مەدالدىڭ يەسى. ەرلى-زايىپتى ەكەۋى اسقار, ماقپال, راۋشان, نۇرسۇلتان سەكىلدى ۇلدارى مەن قىزدارىن قاناتتاندىرعان.
– زەينەت دەمالىسىنا شىققان سوڭ تەك قانا شىعارماشىلىقپەن اينالىسۋدى قالادىم. الدا تۇرعان ىستەرىم كوپ. قازاقستان رەسپۋبليكاسى سۋرەتشىلەر وداعىنىڭ تاراپىنان دا ءتۇسىپ جاتقان ۇسىنىستار از ەمەس. نە دەيىن, مىنانداي تاماشا تابيعاتى بار ەل مەن جەردى شامامنىڭ كەلگەنىنشە سۋرەتتەي بەرەيىن. ءبىزدىڭ ولكە ولمەس جىر مەن انگە, سۋرەتكە لايىقتى جەر. مەن تۋعان اۋىلىمدى, اتامەكەنىمدى جانىمداي جاقسى كورەمىن. سول ءۇشىن دە ءبىر ءسات تە الىس ۇزاعىم كەلمەيدى. دەنساۋلىعىما قاراماستان, شوعانساي وڭىرىنەن ءحانتاڭىرى شىڭىن جاقىن جەردەن كورۋگە بارعانىمدى ۇمىتپايمىن. ونىڭ ماعان بەرگەنى كوپ, –دەيدى نۇربولات اعامىز.
شالعاي اۋىلدا تۇراتىن بۇكىل ەلى-جۇرتى بىلەتىن سۋرەتشىنىڭ ءومىر جولى وسىنداي.
قانات ءبىرجانسال,
جۋرناليست
الماتى وبلىسى