زاڭمەن بەكىتىلگەندەي, مەملەكەتتە وتباسىلىق توي مەن شارالاردى ساعات 6:00-دەن 23:00-گە دەيىن عانا وتكىزۋگە بولادى. سونىمەن قاتار پالاۋ تارتۋدان باسقا جاعدايلاردا, تويدى بىرنەشە كۇنگە سوزۋعا تىيىم سالىنعان. قالالىق جانە اۋداندىق كەڭەستەر پالاۋ تارتۋ ۋاقىتىن «جەرگىلىكتى جاعدايعا بايلانىستى» بەلگىلەي الادى.
ەندى توي ۋاقىتىنا عانا ەمەس, قوناقتار سانىنا دا زاڭمەن شەكتەۋ قويۋعا مۇمكىندىك بار. ەندىگى جيىن-تويلارعا 200-دەن اسا, پالاۋ تارتۋعا 250-دەن اسا قوناق شاقىرۋعا بولمايدى. سونداي-اق ۇيلەنۋ تويلارىنا قاتىستى دا جەكەلەگەن نورما بەكىتىلگەن. ول بويىنشا, توي قوناقتارىنىڭ قاتارىنا تاعى 50 ادامدى قوسۋعا رۇقسات.
سونىمەن قاتار جاڭا زاڭ بويىنشا, ۇيلەنۋ تويلارىندا جەڭىل اۆتوكولىك سانى 3-ەۋدەن اسپاۋى ءتيىس جانە تويعا ەكىدەن كوپ ءانشى مەن مۋزىكالىق توپتى شاقىرۋعا رۇقسات جوق.
مۇنداي زاڭنىڭ قابىلدانۋ ماقساتى – وتباسىلىق سالتاناتتى شارالارداعى ىسىراپشىلدىقپەن كۇرەس. دەپۋتاتتار زاڭ جوباسىن تالقىلاۋ بارىسىندا «ىسىراپقا تولى جانە سالتاناتتى» ۇيلەنۋ تويلارىن وتكىزۋ ءۇشىن, ازاماتتاردىڭ قارىزعا باتىپ, ارتىنشا تابىس تابۋ ءۇشىن شەتەلدەرگە كەتەتىنىن ايتىپ شاعىمدانعان.
سوڭعى ون-ون بەس جىلدا قازاقتىڭ تويى تاربيەلىك مانىنەن ايىرىلىپ, باقتالاستىق پەن باسەكەلەستىكتىڭ, ىسىراپشىلدىق پەن استامشىلىقتىڭ الاڭىنا اينالعانىن كوزىمىز كورىپ ءجۇر. بۇگىندە كورپەسىنە قاراي ەمەس, جۇرتتىڭ سوزىنە قاراي ارەكەت ەتەتىندەر نەسيەگە بەلشەدەن باتىپ, دۇبىرلەتىپ توي جاسايدى. ءتىپتى انە ءبىر جىلدارى تويدان تۇسكەن توي شىعىنىن جاپپاعان وتباسىندا ءدامحانا يەلەرى كەلىنىن كەپىلزات رەتىندە الىپ قالدى دەگەن اڭگىمەلەر الەۋمەتتىك جىلەدە جەلدەي ەسكەنى ەلدىڭ ەسىندە.
قازاق تويىنداعى ىسىراپشىلدىق – قوعامدا بۇرىننان قىزۋ تالقىعا ءتۇسىپ جۇرگەن وزەكتى ءارى جاۋىر بولعان تاقىرىپ. تالايدان بەرى ءسوز بولىپ جۇرگەن ماسەلەگە مەملەكەت باسشىسى قاسىم-جومارت توقاەۆ تا 2018 جىلعى 4 قازان كۇنى تۆيتتەردەگى پاراقشاسىندا: "باق-تا ۇيلەنۋ جانە باسقا دا تويلاردى جاڭا ۇلگىدە وتكىزۋگە قاتىستى پىكىرتالاستاردى قولدايمىن. كوزبوياۋشىلىق, داڭعازالىق, ىسىراپشىلدىققا جول بەرمەي, باۋىرلاس وزبەك, تۇرىك, تۇرىكمەن xالىقتارى سياقتى ۇلتتىق داستۇرگە باسا ءمان بەرۋىمىز قاجەت", — دەپ جازعان ەدى.
بىراق قازاق قوعامى توي مەن جانازانى وتكىزۋ فورماتى جانە وعان جۇمسالاتىن قارجى كولەمى تۋرالى ءالى تولىققاندى پىكىرگە كەلە الماي جۇرگەندە ءوز-اعالارىمىز تويدىڭ ەتەك-جەڭىن زاڭمەن قىمتاپ الۋعا كىرىسىپ كەتتى.
الماتى
.