مەملەكەت باسشىسىنىڭ اقش-تا بۇۇ باس اسسامبلەياسىنىڭ 74-ءشى سەسسياسىنىڭ جۇمىسىنا قاتىسۋ ساپارى قارساڭىندا سىرتقى ىستەر ءمينيسترى مۇحتار تىلەۋبەردى «س5+1» ديالوگىنىڭ مينيسترلىك كەزدەسۋىنە قاتىستى. ديالوگقا اقش مەملەكەتتىك حاتشىسى مايكل پومپەو, قىرعىزستاننىڭ سىرتقى ساياسي ۆەدومستۆوسىنىڭ باسشىسى چينگيز ايداربەكوۆ, تاجىكستاننىڭ سيرودجيددين مۋحريددين, وزبەكستاننىڭ ابدۋلازيز كاميلوۆ جانە تۇرىكمەنستاننىڭ اقش-تاعى ەلشىسى مەرەد ورازوۆ قاتىستى. بۇل تۋرالى سىرتقى ىستەر مينيسترلىگىنىڭ ءباسپاسوز قىزمەتى حابارلادى.
تاراپتار ساۋدا-ينۆەستيتسيالىق بايلانىستاردى كەڭەيتۋ جولدارىن, سونداي-اق, ينتەگراتسيالىق ۇدەرىستەر مەن ورتالىق ازياداعى سىن-قاتەرلەرگە دەن قويۋ جونىندەگى بىرلەسكەن كۇش-جىگەردى تالقىلادى.
م. تىلەۋبەردى «س5+1» پلاتفورماسى ورتالىق ازيادا ەكونوميكالىق ءوزارا ءىس-قيمىلدى ۇلعايتۋدىڭ جانە ءوڭىردىڭ ترانزيتتىك ينفراقۇرىلىمىن دامىتۋعا اقش رەسۋرستارىن تارتۋدىڭ, قورشاعان ورتانى ساقتاۋ جونىندەگى جۇمىستاردىڭ, سونداي-اق, ايماقتىق قاۋىپسىزدىك پەن تۇراقتىلىقتى نىعايتۋدىڭ ءتيىمدى قۇرالى بولىپ تابىلاتىنىن اتاپ ءوتتى.
قازاقستان سىرتقى ساياسي ۆەدومستۆوسىنىڭ باسشىسى «س5+1» الاڭىنداعى پروگرەسس اقش پەن ورتالىق ازيانىڭ ىسكەر قوعامداستىقتارىنا سيگنال بەرۋ قاجەت ەكەنىن جانە «س5+1» ديالوگىنىڭ اياسىندا امەريكالىق ينۆەستيتسيالار مەن تەحنولوگيالاردى ورتالىق ازياعا تارتۋ بويىنشا جۇمىستى جالعاستىرۋدىڭ ماڭىزدىلىعىن اتاپ ءوتتى.
اقش مەملەكەتتىك حاتشىسى م. پومپەو ورتالىق ازيا ءوزىنىڭ ازاماتتارىن قاقتىعىس ايماقتاردان قايتارۋ بويىنشا بۇكىل الەم ءۇشىن ۇلگى بولىپ تابىلاتىنىن ايتتى. اقش مەملەكەتتىك حاتشىسى ورتالىق ازيا ەلدەرىنىڭ ەكونوميكالىق ارىپتەستىگىنىڭ ماڭىزدىلىعىن اتاپ ءوتىپ, ءوڭىردىڭ اقش-پەن ينفراقۇرىلىمدىق دامۋ سالاسىنداعى, ونىڭ ىشىندە اقش-تىڭ حالىقارالىق دامۋدى قارجىلاندىرۋ بويىنشا قۇرىلاتىن كورپوراتسيا قاراجاتى ارقىلى ىنتىماقتاستىعىنىڭ پەرسپەكتيۆالارىن اتاپ ءوتتى.
م. پومپەو وڭىردەگى تۇراقتىلىق پەن تۇراقتى ءوسۋدى ورناتۋ فاكتورلارىنىڭ ءبىرى رەتىندە ورتالىق ازيا ەلدەرىنىڭ اۋعانستانمەن ىنتىماقتاستىعىن نىعايتۋ قاجەتتىگىنە نازار اۋداردى.
«س5+1» فورماتى ورتالىق ازيانىڭ بەس ەلى مەن اقش اراسىنداعى ءوزارا ءىس-قيمىلدىڭ كوپجاقتى تەتىگى بولىپ تابىلادى. التى ەلدىڭ سىرتقى ساياسي ۆەدومستۆولارى باسشىلارىنىڭ قۇرىلتايلىق جينالىسى 2015 جىلدىڭ قىركۇيەگىندە نيۋ-يوركتە بۇۇ باس اسسامبلەياسىنىڭ الاڭىندا وتكەن.
ورتالىق ازيا سىرتقى ساياسي ۆەدومستۆولارىنىڭ باسشىلارى مەن اقش مەملەكەتتىك حاتشىسىنىڭ ورىنباسارى دەۆيد حەيلدىڭ قاتىسۋىمەن جوعارى دەڭگەيدەگى سوڭعى كەزدەسۋ وسىدان ءبىر اي بۇرىن نۇر-سۇلتان قالاسىندا ءوتتى.