بۇل تۋرالى پارلامەنت سەناتىنىڭ ءباسپاسوز قىزمەتى حابارلادى.
الەمدىك جانە ءداستۇرلى دىندەر ليدەرلەرى سەزى حاتشىلىعىنىڭ XVIII وتىرىسى اياسىندا داريعا نازارباەۆا ءدىني كوشباسشىلاردىڭ وكىلدەرىمەن كەزدەستى.
سەنات توراعاسى, حاتشىلىق باسشىسى داريعا نازارباەۆا ۆاتيكان مەملەكەتىنىڭ دىنارالىق ديالوگ جونىندەگى پاپا كەڭەسى يسلام ماسەلەلەرى جونىندەگى بيۋروسىنىڭ باسشىسى, مونسەنور حالەد اكاشەمەن كەزدەسۋدە ەلىمىزدەگى بەيبىتشىلىك پەن كەلىسىمدى نىعايتۋداعا قازاقستاندىق كاتوليكتەردىڭ ۇلەسىن اتاپ ءوتتى.
ح.اكاشەنىڭ ايتۋىنشا كيەلى تاق الەمدەگى كونفەسسياارالىق جانە دىنارالىق كەلىسىمدى ۇدايى قولداپ كەلەدى. سوندىقتان قازىرگى كەزدە پاپا كەڭەسى كونفەسسياارالىق جانە وركەنيەتارالىق ۇنقاتىسۋدى دامىتۋ جونىندەگى ن.نازارباەۆ ورتالىعىمەن ىنتىماقتاستىق مەموراندۋمىن جاساۋعا بايلانىستى جۇمىستار ءجۇرىپ جاتىر.
پاپا كەڭەسىنىڭ وكىلى حالەد اكاشە سونداي-اق 2001 جىلى ريم پاپاسىنىڭ قازاقستانعا كەلگەنىن ايتا كەلىپ, بۇل تاريحي ساپاردىڭ وتكەنىنە 20 جىل تولعانىن اتاپ ءوتتى. وسىعان وراي 2021 جىلى وتەتىن VII سەزگە پونتيفيكتىڭ كەلۋى ىقتيمال.
حاتشىلىق باسشىسى ءيزرايلدىڭ اشكەنازيلىك باس ءراۆۆينىنىڭ وكىلى, نەتانيا ورتالىعىنىڭ ءراۆۆينى م.لاۋ جانە ءيزرايلدىڭ سەفاردتىق باس ءراۆۆينىنىڭ وكىلى, يەرۋساليمدەگى وڭتۇستىك امەريكا قاۋىمىنىڭ ءراۆۆينى ي.لورينتسپەن كەزدەسۋدە حاتشىلىقتىڭ الداعى جوسپارلارى تۋرالى ءسوز ەتتى. سەنات توراعاسىنىڭ ايتۋىنشا وسى جىلدار ارالىعىندا سەزد سەنىم جانە ءوزارا تۇسىنىستىك شارالارىن قالىپتاستىرۋدىڭ ەرەكشە الاڭىنا اينالدى.
«وسى ەلدە وتكىزگەن بىرنەشە ساعاتتا بارلىق ءدىن جانە ۇلت وكىلدەرىنە كورسەتىلگەن جىلى شىراي مەن دوستىق پەيىلگە كۋا بولدىق. ءسىز باسقارىپ وتىرعان حاتشىلىق الەمدى تولعاندىرىپ وتىرعان كونفەسسياارالىق جانە دىنارالىق تاقىرىپتاردى تالقىلاۋعا دايىن ەكەنىن كورسەتتى. بۇل ۇنقاتىسۋ الاڭى قازىرگى كەزدەگى بارلىق كەلەڭسىزدىكتەرگە تويتارىس بەرە الاتىن قورعان بولاتىنىنا ءۇمىت ارتامىز», - دەپ اتاپ ءوتتى ءيزرايلدىڭ اشكەنازيلىك باس ءراۆۆينىنىڭ وكىلى, نەتانيا ورتالىعىنىڭ ءراۆۆينى م.لاۋ.
قىتاي بۋدداشىلار قاۋىمداستىعى باس حاتشىسىنىڭ ورىنباسارى شي چۋنۆەن جاڭادان قۇرىلعان كونفەسسياارالىق جانە وركەنيەتارالىق ۇنقاتىسۋدى دامىتۋدىڭ ن.نازارباەۆ ورتالىعىنىڭ جۇمىسىن اتاپ ءوتىپ, قىتاي الەمدىك جانە ءداستۇرلى دىندەر ليدەرلەرى سەزىنىڭ جوعارى باستامالارىن تولىق قولدايتىنىن جەتكىزدى.
سەنات توراعاسى الەمدىك جانە ءداستۇرلى دىندەر ليدەرلەرى سەزى جۇمىسىنىڭ ماڭىزىن اتاپ ءوتتى.
«بۇگىنگى كۇنى سەزد بارلىق دىندەر, حالىقارالىق ۇيىمدار, ساياسي قايراتكەرلەر مەن ساراپشىلاردىڭ باسىن قوسقان ەرەكشە وكىلەتتى ۇنقاتىسۋ الاڭى. ءدىني كوشباسشىلاردىڭ كەزدەسۋى جاقسى ءداستۇر بولىپ وتىر. العاشىندا جاڭالىق بولعانى راس. بۇگىنگى كۇنى بارلىعى دا مۇمكىن ەكەنىنە كۋا بولدىق. باستىسى – ءتۇزۋ نيەت», - دەدى د.نازارباەۆا.