قازاقستان رەسپۋبليكاسى قورعانىس مينيسترلىگىندە V ارميالىق حالىقارالىق ويىندارى-2019 جەڭىمپازدارى مەن جۇلدەگەرلەرىن سالتاناتتى تۇردە ماراپاتتاۋ مەن قۇتتىقتاۋ ءراسىمى ءوتتى.
قورعانىس ءمينيسترىنىڭ باسشىلىعىمەن وتكەن سالتاناتتى شاراعا قورعانىس مينيسترلىگى مەن باس شتابتىڭ باسقارۋ قۇرامى, قارۋلى كۇشتەردىڭ اسكەر تەكتەرى قولباسشىلارى مەن تۇرلەرىنىڭ باس قولباسشىلارى, بولىمشەلەر قۇرىلىمىنىڭ باسشىلارى قاتىستى.
قورعانىس ۆەدومستۆوسىنىڭ باسشىسى ماراپاتتاۋ جۇلدەلەرىن اسكەري سالادا جەكە جانە كوماندالىق ەسەپتە ۇزدىك ونەر كورسەتكەن, كاسىبيلىگىن دالەلدەگەن 13 اسكەري قىزمەتشىگە تابىستادى.
«I دارەجەلى ەل قورعانى» ۆەدومستۆو مەدالى «اۆيادارتس» حالىقارالىق سايىسىنىڭ مايداندىق اۆياتسيياسىنىڭ ۇشقىشتارى مايور م.داۋلەتباەۆ پەن د.كوروبكينگە, «اسكەري-مەديتسينالىق ەستافەتا» قاتىسۋشىسى دارىگەر-حيرۋرگ مەديتسينالىق قىزمەتىنىڭ كاپيتانى ا.تاڭاتاروۆاعا, «سۇڭقار اڭشىلىعى» ۇشقىشسىز ۇشاتىن اپپاراتى شتۋرمان ءبولىمىنىڭ اعا لەيتەنانتى م.بەسپاەۆقا تابىس ەتىلدى.
ال «II دارەجەلى ەل قورعانى» ۆەدومستۆو مەدالى «تانك بياتلونى» كونكۋرسىنىڭ قاتىسۋشىلارى اعا سەرجانت ا.الپامىسوۆ پەن ا.شوينباەۆقا, «قارۋ شەبەرى» سايىسىنان اعا سەرجانت ە.بەكتاسوۆقا, «ارتيللەريالىق وق اتۋ شەبەرلەرىن» سايىسىنان سەرجانت گ.داۋلەتوۆ پەن ەفرەيتور گ.ابدىراحمانوۆقا, «مەرگەن شەبى» جارىسىندا كىشى سەرجانت ا.ءادىلوۆ پەن ەفرەيتور د.يلينوۆكە, «سەنىمدى قابىلداۋ» بويىنشا كىشى سەرجانت د.سەيسەباەۆ جانە «الەم جاۋىنگەرى» سايىسىنىڭ قاتىسۋشىسى ەفرەيتور م.سافاكوۆاعا بۇيىردى.
«حالىقارالىق ارميا ويىندارىنا قاتىسۋ بارلىق ساناتتاعى اسكەري قىزمەتشىلەردىڭ كاسىبي دايىندىعىنىڭ ماڭىزدى جانە پراكتيكالىق قۇرامداس بولىگى بولىپ تابىلادى. ولاردىڭ كاسىبي مانساپتىق وسۋىنە جانە وقۋ كەزەڭىندە ىنتالاندىرۋعا قوسىمشا جاعداي جاسايدى. سوندىقتان جارىسقا جاقسى دايىندالعان جەكە قۇرام قاتىستى», دەدى ءوز سوزىندە قورعانىس ءمينيسترى نۇرلان ەرمەكباەۆ.
ايتا كەتەيىك, 2019 جىلدىڭ 3 جانە 17 تامىزى ارالىعىندا مەرەيتويلىق بەسىنشى ارميالىق حالىقارالىق ويىندارى ءوتتى. 32 كونكۋرستان تۇرعان جارىس 10 ەلدىڭ 21 اسكەري پوليگونىندا بولدى.
قازاقستان قارۋلى كۇشتەرىنىڭ قۇراماسى 32 كونكۋرستىڭ ىشىنەن 16-سىنا قاتىسىپ, ۇزدىك ويىن كورسەتكەن قۇراما رەتىندە تانىلدى.
ءبىزدىڭ اسكەري قىزمەتشىلەر جارىستىڭ العاشقى كەزەڭىنەن-اق باسا وزىپ, ۇزدىك ۇشتىكتىڭ قاتارىنان كورىندى. ناتيجەسىندە ارميالىق حالىقارالىق ويىنداردىڭ جالپى قورىتىندىسى بويىنشا قازاقستاندىق اسكەري قىزمەتشىلەر 39 مەملەكەتتىڭ اراسىنان كوماندالىق قۇرامدا ءۇشىنشى ورىنعا تۇراقتادى. بايراقتى باسەكەدە ەلىمىزدىڭ قۇراماسى تەك رەسەي مەن قىتاي كومانداسىنا باسىمدىق بەردى.