جۇما, 29 ناۋرىز 2013 1:07
وسى ءۇش ۇعىم بىرىكسە, بىتپەيتىن شارۋا جوق
وتكەندى ەسكە الماي, جاڭانىڭ باعاسىن بىلە بەرمەيمىز. ويتكەنى, ءبىزدىڭ ەشكىمگە ۇقسامايتىن تاريحىمىز ءالى قالىپتاسا الماي كەلەدى. تاۋەلسىزدىك العاننان بەرى جيىرما جىلدان اسسا دا كەيىنگى ۇرپاق ءوزىنىڭ ءتىلىن, ءدىلىن تولىق مەڭگەرىپ كەتكەن جوق. شالاعايلىق باسىم بۇل ىستە.
جۇما, 29 ناۋرىز 2013 1:07
وسى ءۇش ۇعىم بىرىكسە, بىتپەيتىن شارۋا جوق
وتكەندى ەسكە الماي, جاڭانىڭ باعاسىن بىلە بەرمەيمىز. ويتكەنى, ءبىزدىڭ ەشكىمگە ۇقسامايتىن تاريحىمىز ءالى قالىپتاسا الماي كەلەدى. تاۋەلسىزدىك العاننان بەرى جيىرما جىلدان اسسا دا كەيىنگى ۇرپاق ءوزىنىڭ ءتىلىن, ءدىلىن تولىق مەڭگەرىپ كەتكەن جوق. شالاعايلىق باسىم بۇل ىستە.
كوڭىل حوشى
قازاقستان دەگەندە كەڭ-بايتاق دالا, شەتسىز-شەكسىز جازيرا كوز الدىڭدا كولبەپ تۇرادى. دالا – قازاقتىڭ التىن بەسىگى بولعاندا, اۋىلدارى – التىن تامىرلارى. قازاق بار قۋاتتى دالادان العان. قازاق سايىن دالانىڭ سەڭگىر تاۋلارىنان, شالقىعان كولدەرىنەن, سۋسىعان قۇمدارىنان, ءنارلى توپىراعىنان, كۇن كوزىنىڭ اسىل نۇرىنان جارالعان. قازاقتىڭ حاندارى مەن باتىرلارى, عالىمدارى مەن قايراتكەرلەرى, قالامگەرلەرى مەن ونەر ساڭلاقتارى وسى كەڭ دالادا تۋىپ, وسى دالادان قانات قاعىپ قياعا ۇشقان.
وتكەن عاسىردىڭ تاريحىن ءبىر شولىپ شىعايىقشى. اۋىلعا دەگەن قامقورلىقتىڭ, ىنتا-ىقىلاستىڭ از بولماعانىن بايقايمىز. بىراق بۇل دالا ارقاشان ەل نازارىندا بولسا دا, «قىسقا ءجىپ كۇرمەۋگە كەلمەي», قيىندىقتان قۇتىلا الماعاندىعى تاعى راس.
برەجنەۆ ءوز تۇسىندا «قازاقستاندا قوي سانىن 50 ميلليونعا جەتكىزەيىك» دەپ كوكىدى. ونىڭ ءبارى بوداندىقتىڭ بوپساسى ەدى. مومىن حالىق بۇعان دا كوندى. «قازاق, شىركىن, قالعىماس, قالعىسا دا جىعىلماس» دەپ ءجۇرىپ, قويدىڭ سانىن 80-ءشى جىلداردا 36 ميلليون باسقا زورعا جەتكىزدى. سودان كەيىن جاپپاي رەفورما اسىعىس ءجۇرىپ, شارۋاشىلىقتار تاراتىلىپ, ۇساق قوجالىقتار ورنىن باستى. قازاقستانداعى 3 مىڭ ءىرى سوۆحوز بەن كولحوزدىڭ ورنىندا 300 مىڭ ۇساق شارۋا قوجالىقتارى پايدا بولدى. بىراق اۋمالى-توكپەلى كەزەڭدە نارىق رەفورماسى ىشكە كىرىپ, قوعامدىق مال «حانتالاپايعا» ءتۇسىپ, اينالاسى 4-5 جىلدىڭ ىشىندە 36 ميلليون قويدان 9 ميلليونداي عانا قالدى. مۇنىڭ ءبارىن «قارا بازار» سۋشا ءسىمىردى. بۇل دالاداعى جاعىمسىز كورىنىس بولدى.
باستاپقىسىندا عىلىمعا نەگىزدەلمەگەن جەكەشەلەندىرۋ ناۋقانى قالالارداعى ءوندىرىس ورىندارىن دا كۇل-تالقان جاسادى. قايران شاحتالار مەن بولات قورىتىپ, ۇشقىن شاشقان, جەر استىنان مۇناي تارتقان الىپ زاۋىتتار شەتەلدىكتەرگە قولدى بولىپ, «ۇستاعاننىڭ قولىندا, تىستەگەننىڭ اۋزىندا» كەتە بارعاندىعى دا شىندىق ەدى.
جاھاندانۋ بىزگە جات پا؟
جاھاندانۋ تۋرالى سوڭعى جىلداردا ءجيى ايتىلىپ ءجۇر. بۇل – بۇرىنعى-سوڭدى ءبىزدىڭ ويىمىزدا جوق ۇعىم. ەگەر بۇل قازاق ومىرىنە ءتيىمدى بولسا, ودان نەگە ۇركۋگە ءتيىسپىز؟ بايقاپ وتىرساق, جاھاندانۋ كەزىندە ءبىر ەلدەن ءبىر ەل قالىپ قالماۋ ءۇشىن ءوزارا باسەكەگە تۇسەدى ەكەن. نامىستى قازاق ەمەسپىز بە؟ ونىڭ دا ەسىگىن ەركىن اشۋعا نارتاۋەكەل جاساۋعا ءتيىستى سياقتىمىز. ويتكەنى, تايىنساڭ, جاسقانساڭ باسقالاردان كەيىن قالاسىڭ. بۇل دا ساياساتتىڭ وليمپياداسى ءتارىزدى.
ماسەلەن, اقش, جاپونيا, انگليا, كانادا, فرانتسيا, گەرمانيا سياقتى ەلدەر ايدارىنان جەل ەسىپ, ءوز ىقپالىن جاساپ وتىر. بۇلارعا رەسەي دە قوسىلدى. قىتاي مەن ءۇندىستان دا وسىعان ۇمتىلۋدا. ەلباسى اتاپ كورسەتكەندەي, قازىرگى تاڭدا دامىعان ەلدەردە جاڭا تەحنولوگيا, جاڭا ءبىلىم نەگىزىندەگى ءونىمنىڭ 75-80 پايىزى شىعارىلادى. ال بۇكىل الەمدە عىلىمي نەگىزىندە شىعارىلاتىن ءونىمنىڭ مولشەرى 2 تريلليون 300 ميلليارد دوللاردان اسادى ەكەن. ولاردىڭ دەنى جوعارىدا اتالعان الىپتاردىڭ ەنشىسىندە. دەگەنمەن, باسقا ەلدەر دە قاراپ وتىرعان جوق. ەۋروپادا فينليانديا, شۆەتسيا, نورۆەگيا, شىعىستا سينگاپۋر, وڭتۇستىك كورەيا, مالايزيا, گونكونگ سەكىلدى ەلدەردە قارقىن باسىم. مىنە, وسىنداي دامىعان الەم ەلدەرىنىڭ قاتارىنا قوسىلۋعا ءبىز دە ۇمىتكەرمىز. ول – وتىزدىق بەلەسى. وعان جەتۋ – شەبەر باسقارۋ جۇيەسىن, تەرەڭ ءبىلىمدى, جوعارى بىلىكتىلىكتى, جان-جاقتى دايىندىقتى, قاجىماس ەڭبەكتى, ۇلكەن ىزدەنىستەردى تالاپ ەتەدى.
ەلباسىنىڭ ايتۋىنشا, ەندىگى ماقسات – بۇكىلالەمدىك ساۋدا ساحناسىنا شىعۋ. بۇل وڭاي جول ەمەس. دامىعان ەلدەر ساپالى بۇيىمدارىمەن كەز كەلگەن تالاپكەردى يتەرىپ جىبەرەدى. ولارمەن تەكەتىرەسكە ءتۇسۋ ءۇشىن نەعۇرلىم سۇرانىسقا يە, ساپالى ونىمدەر شىعارۋ كەرەك. ول ءبىلىمسىز كەلمەيدى. قازىر ءبىلىم بەرۋ سالاسىنا قازاقستان ىشكى ۇلتتىق ءونىمنىڭ ايتارلىقتاي بولىگىن جۇمساپ وتىرسا, بۇل دا الەمدىك جاھاندانۋ ۇدەرىسىنە قول سوزعانىمىز. قازىرگى جاس ۇرپاقتىڭ تەرەڭ بىلىمگە يە بولىپ, الەمدىك ءوندىرىس تەحنولوگياسىن ۇرشىقشا ۇيىرەتىن كۇن دە الىس ەمەس شىعار.
بايلىقتى باسىپ وتىرامىز با؟
راسىندا, قازاقتىڭ قاسپاعى بەس ەلى. بىراق بويىمىزدا ەنجارلىق باسىم. بىزدە ءبارى دە بار, تاۋەلسىزدىك العاننان بەرى «مۇنايى باردىڭ قۇدايى بار», «كومىرى باردىڭ ءومىرى بار», «مالى باردىڭ ءالى بار», «بيدايى باردىڭ بەرەكەسى بار», «تەمىرى باردىڭ قورعاسىنى مىقتى», دەپ سويلەيتىن بولدىق.
بىراق قولداعى التىننىڭ قادىرىن بىلەمىز بە؟ بىلسەك, كولەڭكە ساعالاعان كۇشىكتەي كوزدى جۇمىپ قاشانعى جاتامىز. اسپاننان قۇيماق جاۋمايتىنىن بىلەمىز. بىلسەك تە «الما ءپىس, اۋزىما ءتۇس» دەگەن ادەتىمىز قالار ەمەس. ىرگەلى ەلدىڭ قۇنارلى جەرى بار. وعان نە ەكسەڭ, سونى وراسىڭ. مال – باققانعا بىتەدى. ءبىزدىڭ بايلىعىمىزدى بىرەۋ كەلىپ ۇقساتىپ بەرمەيدى. قازىنانى قازاتىن دا, ونى وڭدەيتىن دە ءوزىمىز. ويتكەنى, ونىڭ يگىلىگىن قازاقستان حالقى كورەدى. قازاقستان پرەزيدەنتىنىڭ حالىققا ارناعان جولداۋى جىگەرلى ەڭبەككە شاقىرىپ وتىر.
ەندىگى جەردە شارۋالار ناتيجەلى ءىستى نەدەن باستاۋى كەرەك؟ ەڭ الدىمەن, شاعىن جانە ورتا بيزنەستى مىقتاپ قولعا الۋى كەرەك.
الەمدە جايىلىمى جان باسىنا شاققاندا بىزدەن اساتىن ەل جوق. بىزدە ەگىندىككە, شابىندىققا, جايىلىمدىققا جارايتىن 180 ملن. گەكتار جەر بار. تابيعاتتىڭ ءوزى قازاقتىڭ جەرىن مالىڭدى ءوسىر, ەگىنىڭدى سال دەپ جاراتقانداي. بىلايعى جۇرت ايتىپ جۇرگەندەي, مال ءوسىرۋ ءبىزدىڭ اتاكاسىبىمىز. وعان نەسىنە نامىستانامىز. ءتىپتى زيالى قاۋىمنان سۇراڭىز, اۋىلدا, دالادا كىندىك قانى تامعان ۇرپاق ەسەيگەندە دالانىڭ سامالىن, جىلقىنىڭ جالىن, قوشقاردىڭ ءمۇيىزىن ساعىنارى دا شىندىق. سول مالدى ءوسىرۋ, وسىرگەندە ولاردىڭ اسىلدىعىن ارتتىرۋ – بۇگىنگى ۇرپاقتىڭ مىندەتى.
ەت پەن ءجۇن قاشان بولسا دا كەرەك. بىزدە قازاقستان جاعدايىندا ورتا ەسەپپەن 15-17 ملن. قويدى ەركىن وسىرۋگە بولادى. سوندا جان باسىنا ءبىر قويدان كەلەدى ەكەن. ەلىمىز دۇنيەجۇزىلىك ساۋدا ۇيىمىنا مۇشەلىككە كىرگەلى جاتقاندا قوي جارىقتىققا قالايشا كوڭىل بولە المايمىز. الەمدىك تۇتىنۋشىلار سارىارقانىڭ قۇيرىقتى قۇلا قويىن, ءۇستىرتتىڭ تۇلا بويىن ماي باسقان قاراكوك قويلارىن, جامبىل اتا جىرلاعان جەتىسۋدىڭ جىبەك ءجۇندى اق قويلارىن كورگەندە تامسانىپ, تاڭدايلارى قۇرعاپ قالادى ەكەن. ءتىپتى ساۋد ارابياسىنداعىلار سالماعى 70-90 كيلوگرامدىق قۇيرىقتى قويلاردى ۇشاقتارىنا سالىپ اكەتكەنى دە راس.
ولاي بولسا, الداعى جىلداردا قوي مالى الەمدىك ساۋدادا سۇرانىسقا يە بولىپ, ونىڭ ءار كيلوگرامدىق ەتى, ءسۇتى, ءجۇنى, التىنعا باعالاناتىنى كۇمان تۋعىزباۋعا ءتيىس. ارينە, قوي جۇرگەن جەردە جىلقى دا, تۇيە دە جۇرەدى. بۇلار – ايىرىلماس ءتۇلىكتەر. جىلقى مەن تۇيە قوزعالىس كولىگى عانا ەمەس, جىلقىنىڭ جال-جاياسى, قىمىزى, تۇيەنىڭ شۋداسى دەرتكە داۋا, وركەش مايى مەن شۇباتى دا الەمدىك ساۋدا بازارىندا اراق پەن شاراپتى, ءشوپ-شالامنان جاسالعان تاعامدى ىسىرىپ تاستاۋى داۋ تۋعىزباسى انىق.
ال بۇگىن تارتساڭ مايى شىعاتىن قازاقستان توپىراعىندا وسپەيتىن وسىمدىك جوق. بىزدە ماقتا دا, جۇگەرى مەن كۇرىش تە, قانت قىزىلشاسى دا وسەدى. ولاردى وڭدەيتىن كاسىپورىن دا بارشىلىق. ءبىر عانا الماتى وبلىسىندا قانت قايناتاتىن بىرنەشە كاسىپورىن جۇمىس جاسايدى. وكىنىشكە قاراي, تاۋلىگىنە 300 توننا قۇمشەكەر وڭدەيتىن ءوندىرىس ورىندارى ءالى دە باعالانبايدى. شاعىن اگرارلىق ۇيىمدار قىزىلشانى ءوسىرۋدىڭ قيىندىعىنان قاشىپ, سوڭعى جىلدارى ءبىر قيىرداعى لاتىن امەريكاسىنان ساپاسى الدەقايدا تومەن «قامىستارىن» اكەلىپ وڭدەۋدى ادەتكە اينالدىرىپ العان.
قازاقستاندا بيدايدىڭ كوپ تاراعان ءتۇرى – قاتتى بيداي, كۇشتى بيداي. بۇل – الەمدىك سۇرانىسقا يە بولعان داقىل. ونىڭ ساپاسى جاقسى, ءدانى ءدامدى. ءدان قامىرلىعى – 25 پايىز, بەلوگى 15 پايىزعا جەتەدى. ادام اعزاسىنا جۇعىمدى. ءبىزدىڭ جەتىسۋ وڭىرىندە وسەتىن «ميرونوۆسكايا», «بەزوستايا-100» سورتى دا سۇرانىسقا يە. مىنە, ءبىزدىڭ ەگىنشىلەرىمىز وسىنداي جوعارى ونىمدەردى وسىرۋگە كوڭىل بولسە دەر ەدىك.
بابامىز اسان قايعى «جەتىسۋ ءوڭىرى شىبىق شانشىسا دا شىعاتىن جەر ەكەن» دەگەندەي, مۇنداعى كۇننىڭ نۇرى, جەردىڭ ءنارى, تاۋدان اققان اعىندى وزەندەر, جەر استىنان اتقىلاپ جاتقان ءزام-ءزام سۋلارى كوكونىستىڭ, ءجۇزىمنىڭ, الما-المۇرتتىڭ, جيدە جەمىستەرىنىڭ نەشە ءتۇرىن وسىرۋگە دە قولايلى. ايدىندى كولدەر بالىق پەن قۇس وسىرۋگە مۇمكىندىك بەرەدى. جاسىراتىنى جوق, ءبىز, قازاقتار ءالى دە مارعاۋمىز. قولدا بار التىننىڭ قادىرىن بىلمەيمىز. سۋارمالى جەردىڭ ءار گەكتارىنان 10-15 تسەنتنەردەن ءونىم جيناساق, ءماز بولامىز. وركەنيەتتى ەلدەردە, اسىرەسە اقش-تا, كانادا مەن گەرمانيادا فەرمەرلەر ءار گەكتاردان ورتا ەسەپپەن 25 تسەنتنەردەن كەم ءونىم السا, وزدەرىن «بانكروت» دەپ جاريالايدى. ال بىزدە سۋارمالى جەرلەردەن 35-40 تسەنتنەردەن ءونىم الۋعا بولادى عوي.
بىزدە الىنعان ونىمدەردى وڭدەيتىن وندىرىستىك كاسىپورىندار از. بار بولسا, ساپالى ءونىم شىعارا المايدى. باستى كەمشىلىك – اۋىل شارۋاشىلىعىندا باسشىلىق جۇيەسى ءالى دە ءالسىز. اۋىل شارۋاشىلىعى دەپارتامەنتى مەن جەرگىلىكتى ۇيىمدار اراسىنداعى بايلانىس سىن كوتەرمەيدى. كۇز بولسا ديقاندار جازدايعى ونىمدەرىن قايدا وتكىزەرىن بىلمەي سابىلىپ جۇرەدى. ەلباسى حالىققا ارناعان جولداۋىندا ءبىزدىڭ قايناعان ومىرىمىزگە كەدەرگى بولعان كەمشىلىكتەردى قاداۋ-قاداۋ كۇيىندە اتاپ-اتاپ كورسەتتى. جەمقورلار مەن جەڭ ۇشىنان جالعاساتىن سىبايلاس قىلمىسكەرلەردىڭ بەلەڭ الىپ وتىرعانىن دا جاسىرعان جوق.
ءيا, كورەر كوزى, ەستىر قۇلاعى بار قازاقستاننىڭ سانالى ازاماتتارى توقسان اۋىز ءسوز ءتۇيىنىن وزدەرى تۇسىنەر دەپ سەنەمىز.
ۇلى كوش جۇگىن تۇزەدى
«ءبىز بىلە-بىلسەك, وسى ون جىلداعى ەلىمىزدىڭ ەڭ باستى قورىتىندىسى – ەل بولعانىمىز. ەل بولا العانىمىز. ءبىز مەملەكەت قۇردىق, قۇرعاندا اتى بار دا زاتى جوق مەملەكەت ەمەس, بۇكىل ادامزات تانيتىن, تانىپ قانا قويماي, مويىندايتىن, قۇرمەتتەيتىن مەملەكەت قۇرا الدىق».
بۇل – ەلباسىنىڭ ەگەمەن ەل بولعانىمىزعا 10 جىلعى اتالى ءسوزى. وسىناۋ اسىل ارماندى, ءبىزدىڭ اتا-بابالارىمىز كوز جاسىن توگىپ سان جۇزدەگەن جىل بويى كۇتتى عوي. تاۋەلسىزدىكتىڭ ءتاتتى سەزىمىنە بولەنە الماي, «مىڭ ءولىپ, مىڭ تىرىلگەن» قايران قازاقتىڭ باسىنان نە وتپەدى؟! ءتىپتى بەرتىندە, XX عاسىردىڭ باسىندا جەر مەن جەسىر داۋى ۇلى ابايدىڭ باسىنا دا ءيىر تاياق ويناتۋى قازاقتىڭ قانىنا سىڭگەن داڭعويلىعى دەمەسكە شارا جوق. بۇل نە, بوداندىقتان تۋعان ناداندىق پا؟ الدە حانى ولسە, تاعىنا تالاساتىن باقاي ەسەپ پە؟ وسىناۋ جيىركەنىشتى كورىنىس جاڭا عاسىرعا دا ءوز سىلىمتىگىن سۇيرەتە كەلگەندەي, كولەڭكەسى ەلەس بەرىپ قالادى. دەگەنمەن, بۇگىنگى كۇنىمىزگە شۇكىرشىلىك ايتا الامىز. ال ەرتەڭگى كۇنىمىز قانداي بولماق؟
دۇنيە جارالعالى تابيعات تىرشىلىك اتاۋلىعا بەيىمدەلىپ كورگەن ەمەس. كەرىسىنشە, تىرشىلىك اتاۋلى تابيعاتقا بەيىمدەلۋ ارقىلى عانا عۇمىرىن ۇزارتىپ كەلەدى. بۇل – اكسيوما. ياعني كەز كەلگەن مەملەكەت گۇلدەنىپ, كوركەيۋ ءۇشىن ءوزىنىڭ ماڭدايىنا بىتكەن ەكوجۇيەسىمەن مىقتاپ ساناسۋى كەرەك. جاسىراتىنى جوق, بىزدە, اسىرەسە, اۋىل شارۋاشىلىعىنا قاتىستى, سونىڭ ىشىندە مال شارۋاشىلىعىنا قاتىستى نارىقتىق ەكونوميكاعا بەت بۇرعان ساياساتىمىز تابيعي ورتانىڭ بولمىس-بىتىمىمەن ساناسا الماي, حالىق تاعدىرىن قاتال تابيعاتتىڭ تالكەگىنە تاڭىپ تاستاعانداي كورىنەدى.
قازاق دالاسى نەگىزىنەن ءاريدتى ايماققا جاتاتىنى بەلگىلى. جازى ىستىق, قىسى قاتال, جەرى قۋاڭ, سوڭعى ءۇش عاسىر بويى قازاق اۋىلدارىنىڭ بار تىرلىگى مال شارۋاشىلىعى بولدى. قاتال تابيعاتتىڭ اياسىندا مالدىڭ تىلىنە ەرىپ كۇن كورگەن اتا-بابامىز تەك قانا قاۋىمداسۋ ارقىلى بەرەكەلى تىرلىك قۇرا الدى. بۇل ارتىقشىلىعى دا, كەمشىلىگى دە ەمەس, ەكوجۇيەسىمەن ساناسقان قاجەتتىلىك بولاتىن. «اۋىل بولساڭ, قاۋىم بول», «كوپپەن كورگەن ۇلى توي», «التاۋ الا بولسا اۋىزداعى كەتەدى, تورتەۋ تۇگەل بولسا توبەدەگى كەلەدى» دەپ كەلەتىن وي-تۇجىرىمدار ءومىر ءسۇرۋدىڭ فورمۋلاسى. تۇپتەپ كەلگەندە, بۇل دالاداعى رۋلىق جۇيەنىڭ ەتنوستىق سيپاتىنان گورى, الەۋمەتتىك قاجەتتىلىگى باسىم بولدى. قازىر دە سول دالا. قازىر دە سول تابيعات…
بىراق سول دالا مەن تابيعات اياسىندا قاۋىمداسىپ قانا بەرەكە تابۋعا بولاتىن اينىماس زاڭدىلىقتىڭ شىرقىن وتكەن جىلدار ىشىندە بۇزىپ الا جازدادىق. وسى مەرزىمدە اۋىل تۇرعىندارى الەۋمەتتىك اۋىرتپالىقپەن جەكە-جەكە بەتتەسىپ قالدى. نارىقتىق ەكونوميكانى ەكوجۇيەگە بەيىمدەپ, حالىقتى ۇيىمداسقان ەڭبەككە جۇمىلدىرا الماي اۋرەگە ءتۇسىپ جاتىرمىز. ءبىرلى-جارىم اتقا مىنگەن قولى ۇزىندار جەكەشەلەندىرۋ ناۋقانى باستالعاندا تەگىن داۋلەتتى قامتىپ ۇلگەردى دە, وزدەرىنشە شارۋاشىلىعىن جۇرگىزىپ كەتكەن سياقتى. ال حالىقتىڭ باسىم بولىگى ونشاقتى تۇياق مالىنىڭ سۇمەسىن تالعاجاۋ ەتىپ قالدى. نارىقتىق ەكونوميكانىڭ ءجونى وسى ەكەن دەپ اۋىل شارۋاشىلىعىنىڭ ۇجىمدىق نەگىزىن بۇزعان كەزدە, ءتورت ت ۇلىك مالدى ساتۋدى عانا بىلەتىندەر قارا بازارعا بەت بۇردى. ءسويتىپ, قازاق ۇلتىنىڭ مايەگى بولىپ كەلگەن اۋىلدىڭ شىرقىن بۇزۋدى قولدان جاسادىق. ەندى موينىمىزبەن كوتەرىپ جاتىرمىز. ۇمتىلساق تا اۋىلداعى جاعداي ءالى دە اناۋ ايتقانداي ءماز ەمەس.
قازاق ءوزىنىڭ ەڭ جاقسى قاسيەتتەرىنە قاتەر تونگەن ساتتە بىرىگىپ, ۇيىمداسا ءبىلۋىنىڭ ناتيجەسىندە ەلدىگىن ساقتاپ قالدى. ەلباسىنىڭ ۇزاق مەرزىمدى ستراتەگياسىندا سول ەلدىگىمىزدى نىعايتىپ قانا قويماي, الەمدەگى وزىق دامىعان وتىز ەلدىڭ قاتارىنا قوسىلۋ ماقساتى بەلگىلەنىپ وتىر. ءبارىن دە جەڭە بىلگەن حالقىمىز بەن ەلىمىزدىڭ بۇل بيىك اسۋدى باعىندىراتىنى دا كۇمانسىز. تەك بار كۇش-جىگەرىمىزدى, ءبىلىم-بىلىگىمىزدى وسى ماقسات جولىنا العاۋسىز باعىتتاي بىلەيىك.
جەر بولسا, وعان يە ەر بولسا, توگىلەر تەر بولسا, بار مۇراتىمىزعا جەتەرىمىز انىق.
سەيداحمەت مۇحامەتشين,
الماتى وبلىسىنىڭ قۇرمەتتى ازاماتى.
تالدىقورعان.