ازاماتتىق اۆياتسيا اكادەمياسى حالىقارالىق تالاپتارعا ساي كەلەتىن بىلىكتى ۇشقىشتاردى دايارلاۋعا قاۋقارسىز. بۇل تۋرالى سالالىق بىلىكتىلىك شەڭبەرىن جانە كاسىپتىك ستاندارتتاردى ازىرلەۋ ماسەلەلەرى بويىنشا بىلىكتىلىك جونىندەگى ۇلتتىق كەڭەستىڭ وتىرىسىندا ايتىلدى. سول سەبەپتى وتاندىق اۋە كومپانيالارى اۆياتسيا ماماندارىن شەتەلدەردە وقىتۋعا ءماجبۇر.
ۇلتتىق كەڭەس وتىرىسىندا مۇنداي سىندى Air Astana كومپانياسىنىڭ وكىلى ەۆگەنيا ني جەتكىزدى. ونىڭ ايتۋىنشا, قازاقستاندا ۇشقىشتاردىڭ كاسىبي بىلىكتىلىگىن ارتتىراتىن وقىتۋ ورتالىقتارى جوقتىڭ قاسى. بار ورتالىقتاردىڭ دەڭگەيى ەۋروپالىق اۆياتسيالىق قاۋىپسىزدىك اگەنتتىگىنىڭ ستاندارتتارىنا ساي كەلمەيدى. سوندىقتان اۋە كومپانيالارى قارجىلاي سالماق تۇسىرسە دە اۆياتسيا كادرلارىن سىرتتا دايىنداپ ءجۇر. ويتكەنى نارىقتاعى ورنىنان ايىرىلۋدى ەشكىم قالامايتىنى انىق.
– بۇگىندە Air Astana بارلىق قاجەتتى مامانداردى ءوز ەسەبىنەن دايىندايدى. ولاردىڭ قاتارىندا ۇشقىش, ينجەنەر, بورتسەرىك جانە باسقا دا ماماندار بار. وكىنىشكە قاراي, ازاماتتىق اۆياتسيا اكادەمياسىنىڭ تۇلەكتەرى ءبىزدىڭ تالاپتارىمىزعا ساي كەلمەيدى. سەبەبى ءبىزدىڭ كومپانيا ەۋروپالىق اۆياتسيالىق قاۋىپسىزدىك اگەنتتىگىنىڭ ستاندارتىمەن جۇمىس ىستەيدى. سايكەسىنشە وسى ستاندارت نەگىزىندە قاجەتتى مامانداردى وزىمىزگە دايىنداۋعا تۋرا كەلدى. وسىلايشا اۆياتسيالىق وقىتۋ ورتالىعىن اشتىق. قازىر وندا باسقا اۋە كومپانيالارىنىڭ ۇشقىشتارى دا بىلىمدەرىن جەتىلدىرىپ ءجۇر. وسى رەتتە مەملەكەتتىك جانە جەكەمەنشىك ءبىلىم بەرۋ مەكەمەلەرىنىڭ ايىرماشىلىعىنا توقتالعىم كەلەدى. ماسەلەن, جەكەلەگەن وقىتۋ ورتالىقتارى بۇگىنگى زاماننىڭ سۇرانىسىنا ساي يكەمدەلە بىلەدى. ال مەملەكەتتىك ءبىلىم بەرۋ ۇيىمدارى جايلى ايتۋ قيىن. ازاماتتىق اۆياتسيا ۇشقىشى اتانۋ ءۇشىن جوعارى ءبىلىمدى كۋالاندىراتىن قۇجاتتىڭ كەرەگى شامالى. قازىر بارلىعى ليتسەنزيامەن جۇمىس ىستەيدى. سوندىقتان كومپانيا ءوز قاراجاتىنا ۇشقىشتاردى ەۋروپانىڭ وقۋ ورىندارىنا جىبەرۋگە ءماجبۇر. بۇعان قوماقتى اقشا جۇمسالادى, – دەيدى Air Astana كومپانياسىنىڭ پەرسونالدى باسقارۋ جانە اكىمشىلىك سۇراقتار جونىندەگى ۆيتسە-پرەزيدەنتى ە.ني.
ول ءبىر ۇشقىشتى دايىنداۋعا شامامەن 80-100 مىڭ اقش دوللارى جۇمسالاتىنىن ايتىپ, بولاشاق اۆياتورلاردى دايىنداۋدا بىرىڭعاي ستاندارتتار ەنگىزىلسە دەگەن ۇسىنىسىن جەتكىزدى. اۋە ۇيىمىنىڭ وكىلى ەلىمىزدەگى 450 ۇشقىشتىڭ 350-ءى قازاقستاندىق مامان ەكەنىن ايتتى.
سونىمەن ازاماتتىق اۆياتسيا اكادەمياسى بولا تۇرا نەلىكتەن ۇشقىشتار باسقا ەلدە ءبىلىمىن شىڭداۋعا ءماجبۇر؟ بۇل سۇراقتى ۇكىمەت باسشىسىنىڭ ورىنباسارى بەردىبەك ساپارباەۆ اتالعان ءبىلىم ورداسىنىڭ جۋىردا تاعايىندالعان رەكتورى بەكەن سەيداحمەتوۆكە توتەسىنەن قويدى.
– ول ءۇشىن ەۋروپالىق تالاپتارعا سايكەس وقىتۋ ورتالىعىن قۇرۋىمىز قاجەت. سول سەكىلدى بىلىكتى نۇسقاۋشىلار مەن ۇشقىشتاردى وسى ىسكە تارتىپ, وقۋ-جاتتىعۋ بازاسىن جولعا قويۋ كەرەك. اۋە كەمەلەرىن الدىق. اەرودرومدى رەتتەۋ جۇمىستارى اياقتالۋعا جاقىن. ەندى ەڭ باستىسى, كادر ماسەلەسىن شەشۋ قاجەت. ويتكەنى سەرتيفيكاتتالعان نۇسقاۋشىلار جانە ۇشقىشتار تاپشىلىعى بايقالىپ وتىر. ەۋروپالىق ستاندارتتارعا ساي بولماۋىمىزدىڭ سەبەبى وسىندا جاتىر, – دەدى ب.سەيداحمەتوۆ.