كەشە قازاقستاننىڭ تابيعاتى اسەم, تاريحى تاعىلىمدى قاسيەتتى جەرلەرى مەن رەسپۋبليكا ايماقتارىنىڭ رۋحاني-مادەني مۇراسىمەن تانىسۋدى ماقسات تۇتقان 700-گە جۋىق جاس ورەن «JASTAR KERÝENI» جوباسىنىڭ اياسىندا 7 باعىت بويىنشا تۋريستىك ساياحاتقا اتتاندى. وسىعان وراي ەلىمىزدىڭ تۇكپىر-تۇكپىرىنەن جينالعان بەلسەندى جاستار ەلوردا تورىندە باس قوسىپ, ەسىل وزەنى جاعالاۋىنداعى «امفيتەاتر» ساحناسىندا ايتۋلى شارانىڭ اشىلۋ سالتاناتىنا ارنالعان سلەت وتكىزدى.
قازاقستان جاستار كونگرەسى اقپارات جانە قوعامدىق دامۋ مينيسترلىگىنىڭ قولداۋىمەن جاستار جىلى جانە «ازاماتتىق باستامالاردى قولداۋ ورتالىعى» كەاق مەملەكەتتىك گرانتى اياسىندا وتكىزگەن سلەتكە رەسپۋبليكانىڭ بارلىق ايماعىنان 16-29 جاس ارالىعىنداعى دارىندى جاستار قاتىستى.
– بۇل جوبانى قولعا الۋىمىزدىڭ باستى سەبەبى – وتاندىق ىشكى ءتۋريزمدى دامىتۋ جانە جاستاردى تۋعان جەرىن سۇيۋگە باۋلۋ, سول ارقىلى ۇلتتىق ءپاتريوتيزمدى قالىپتاستىرۋ. ويتكەنى بۇگىنگى وسكەلەڭ ۇرپاق ەلىمىزدىڭ قاسيەتتى جەرلەرىنىڭ كوز تارتارلىق سۇلۋلىعىن بىلاي قويعاندا, تاريحي ءمانى مەن تاعىلىمىن دا جەتە بىلە بەرمەيدى. ونىڭ ءتۇرلى سەبەبى بولۋى مۇمكىن. اسىرەسە ناسيحات جۇمىسىنىڭ ازدىعى. وسىعان وراي ءبىر توپ بەلسەندى جاستى قاتارىمىزعا تارتىپ, نۇر-سۇلتان قالاسىنان ورال, شىمكەنت, الماتى وبلىسى, وسكەمەن (شىعىس قازاقستان وبلىسى), اقتوبە, پاۆلودار, قاراعاندى – بارلىعى 7 باعىت بويىنشا ارنايى باعدارمەن تۋريستىك ساياحات جاساۋدى كوزدەپ وتىرمىز. ءبىزدى قۋانتقانى – تۋعان ەلدىڭ تابيعاتى مەن قاسيەتتى جەرلەرىن تانۋعا دەگەن جاستارىمىزدىڭ بەلسەندىلىگى وتە جوعارى ەكەن. «JASTAR KERÝENI» جوباسىنا 1500-دەن استام جاستان ءوتىنىش كەلىپ ءتۇستى. ونىڭ ىشىنەن 680 قاتىسۋشى ارنايى كوميسسيا مۇشەلەرىنىڭ تورەلىگىمەن تاڭدالىپ, ساپارعا جولداما الدى. ايتۋلى جوبادا, اسىرەسە جۋرناليستەر مەن بلوگەرلەرگە باسىمدىق بەردىك. ساپاردان ورالعان سوڭ جاستاردىڭ كورگەنى مەن بىلگەنى, كوڭىلگە تۇيگەنى باق-تا كەڭىنەن جاريالانىپ, وتانىمىزدىڭ قاسيەتتى جەرلەرى جان-جاقتى ناسيحاتتالاتىن بولادى, – دەيدى قازاقستان جاستار كونگرەسىنىڭ اتقارۋشى ديرەكتورى توقتار بولىسوۆ.
بارلىعى 3000-نان استام ادام قاتىسقان ايتۋلى كەش قاتىسۋشى قوناقتار سانىنىڭ اۋقىمدىلىعىمەن عانا ەمەس, باعدارلامالىق مازمۇنىنىڭ جارقىندىعىمەن دە ەستە قالدى. كەشكى استانانى ءان مەن جىرعا بولەپ, ەركە ەسىلگە قوسىلا ءان شىرقاپ, تاماشا بيدەن شاشۋ شاشقان Raim&Artur, ميراس جۇگىنىسوۆ, زاماناۋي رەپ-ءانشى – Rick0407, DJ Angel باستاعان ونەرپازدار ونەرىنە جاستار قۋانا قول سوعىپ, قوسىلا بيلەدى. سونىمەن قاتار كەش باعدارلاماسىنا ەنگەن تەاتر جانە مۋزىكالىق قويىلىمدار, نەوندىق شوۋ دا ءوز ورنەگىمەن كوپشىلىك ەسىندە قالدى. كەزدەسۋدىڭ سوڭى اباي قۇنانباەۆتىڭ 175 جىلدىعىنا ارنالعان ەڭ اۋقىمدى چەللەندجدى تۇسىرۋمەن اياقتالدى. 700-دەن استام بەلسەندى جاس حاكىم ابايدىڭ «عىلىم تاپپاي ماقتانبا» ولەڭىن جاتقا ايتۋ ارقىلى ۇلى اقىن ونەرىنە تاعزىم ەتتى.
جوبا ۇيىمداستىرۋشىلارى اتاپ وتكەندەي, ءتول تاريحىن تانۋ ەڭ اۋەلى ادامنىڭ وزىنەن باستالۋى كەرەك. سوندا عانا قازاقتىڭ كوسەگەسى كوگەرمەك. ولاي دەيتىنىمىز, تۋعان جەر تاعىلىمىن تانىپ, ۇلاعاتىن ۇعىپ وسكەن ازامات ەرتەڭ وتان ءۇشىن ايانباي تەر توگىپ, قازاققا قالتقىسىز قىزمەت ەتەرى ءسوزسىز. ەندەشە, ءتول تاريحىن تانۋعا اتتانعان جاستارعا ءسات ساپار دەيمىز!