قارقارالى قىران ۇلىن ۇلىقتادى

بيىل – باتىردىڭ 100 جىلدىعى. وسى ايتۋلى مەرەيتويدى ۇلىقتاۋ ماقساتىندا تۋىپ-وسكەن نۇركەن اۋىلىندا ءدۇبىرلى دۋمان ءوتتى.

التى الاشقا ساۋىن ايتىلعان توي سالتاناتتى ميتينگپەن باستالدى. باتىر جەرلەسىمىزدىڭ كەسكىندى ءمۇسىنى مەن جاۋعا شاپقان قاناتتى تۇلپار ۇشاعى بەينەلەنگەن ەسكەرتكىش الاڭىنا ەلىمىزدىڭ ءار تۇكپىرىنەن قالىڭ ەل جينالدى. ءدۇبىرلى جيىننىڭ شىمىلدىعىن اۋدان اكىمى حالەل ماقسۇتوۆ اشىپ, قاراعاندى وبلىسى اكىمىنىڭ ورىنباسارى سەرىك شايداروۆ, قازاقتىڭ تۇڭعىش عارىشكەرى, كەڭەس وداعىنىڭ باتىرى, حالىق قاھارمانى توقتار اۋباكىروۆ, قاراعاندى وبلىسىنىڭ پروكۋرورى مارات سەكسەنباەۆ, باتىردىڭ ءىنىسى اۋكەن ءابدىروۆ پەن بولەسى ساعادات دۇيسەبەكوۆ, قازاقستان رەسپۋبليكاسىنىڭ قورعانىس مينيسترلىگىنە قاراستى اۋە قارۋلى كۇشتەرىنىڭ باس قولباسشىسىنىڭ ورىنباسارى ەۆگەني پودگايسكي, نۇركەن ءابدىروۆ اۋىلدىق وكرۋگى ارداگەرلەر كەڭەسىنىڭ توراعاسى جەڭىس كوپجاسار باستاعان قۇرمەتتى قوناقتار سالتاناتتى شارادا ەر ەسىمىنىڭ ەل تاريحىندا التىن ارىپتەرمەن جازىلعانىن ايتىپ ءوتىپ, باتىردىڭ جاۋىنگەرلىك ايبىنىن, ەرجۇرەكتىك پەن باتىلدىقتىڭ ۇلگىسىن كورسەتەتىندىگىن ۇمىتپاۋ ماقساتىندا ەل اعالارى وسكەلەڭ ۇرپاققا ۇلىقتاۋ ەكەندىگىن اتاپ ءوتتى.

الدىمەن باتىر ەسكەرتكىشىنىڭ الدىنا الاۋلاعان گۇل شوقتارىن قويىپ, باستارىن ءيىپ تاعزىم ەتكەن قالىڭ توپ جاۋجۇرەك ءباھادۇردى ەسكە الىپ, ەرلىگىنىڭ ەشقاشان ۇمىتىلمايتىندىعىن ايتتى. شارا بارىسىندا قاھارمان باتىر نۇركەن ءابدىروۆتىڭ رۋحىنا قۇرمەت كورسەتكەن قاراعاندى اۆياپولكىنىڭ جەكە قۇرامى ساپ تۇزەپ, شەرۋ وتكىزدى جانە وسى اسكەري ءبولىمنىڭ پيلوتتارى ءۇش ۇشاقپەن اۋە كەڭىستىگىندە شەبەرلىكتىڭ حاس ۇلگىسىن كورسەتىپ, نەشە ءتۇرلى بەينەلەر جاساپ, جينالعان جۇرتقا تاڭداي قاقتىرا باتىردىڭ سوڭعى ۇرىسىنان كورىنىس ۇسىندى. قاراقۇرىم حالىق جيىلىپ, اۋىلدان ون شاقىرىم جەردەگى قىرىقتان استام اقشاڭقان كيىز ۇيلەر تىگىلگەن اۋىلعا بەتتەدى. اۋىلدىڭ ايماعى اۋەلەگەن انگە, كۇمبىرلەگەن كۇيگە تولدى, ساحنادا باتىر جايىندا تەاترلاندىرىلعان قويىلىم قويىلدى. ۇلتتىق سپورتتى ۇلىقتاعان شارادا بالۋان جىگىتتەر قىزىل كىلەمدە قابىلانداي بەلدەستى, جامبى اتىلدى, قوي مەن گىر تاسىن كوتەرۋدەن سايىس وتكىزىپ, الامان مەن توپ بايگەدە كىل جۇيرىكتە كىم جۇيرىك ەكەنىن انىقتادى.

جاۋ جاعادان العاندا فاشيستىك زالىمدارمەن قازاقتىڭ قايسار جىگىتتەرى جەردە دە, كوكتە دە قايسارلىقپەن ايقاستى. جانكەشتىلىك اتاعى كۇللى كەڭەس وداعىنىڭ شارتارابىنا جايىلعان باتىر نۇركەن ءابدىروۆ بار بولعانى جيىرما ءۇش جىل عۇمىرىندا ەرلىك پەن وتانسۇيگىشتىكتىڭ سيمۆولىنا اينالدى. وسىنداي باھادۇرلەرىمىزدى ۇلىقتاۋعا اتسالىسقان اتپال ازاماتتار مەن قالىڭ قاۋىم ءبىر-بىرىنە ريزاشىلىعىن ءبىلدىرىپ, ءدۇبىرلى تويدان رۋح الىپ قايتتى.

گۇلبارشىن جۇماحانوۆا,

قارقارالى اۋدانى اكىمىنىڭ ءباسپاسوز حاتشىسى

 قاراعاندى وبلىسى,

قارقارالى اۋدانى