جۇما, 24 مامىر 2013 2:01
وسىدان ءۇش جىل بۇرىن الماتى وبلىسى اكىمدىگى مەن «قازترانسگاز» اكتسيونەرلىك قوعامى اراسىندا جەتىسۋلىقتاردى گازبەن قامتاماسىز ەتۋ تۋرالى بىرىككەن ءىس-شارالار مەموراندۋمىنا قول قويىلىپ, مەملەكەتتىك ساياساتقا ساي جۇيەلى جۇمىس باستالعان ەدى. وسى اپتادا الماتى وبلىسىنىڭ اكىمى اڭسار مۇساحانوۆ پەن «قازترانسگاز» اق باس ديرەكتورى سەرىك سۇلتانعالي تالدىقورعاندا كەزدەسۋ وتكىزىپ, اتالعان ءوڭىردى گازداندىرۋ جۇمىسىن جىلدامداتۋ ءۇشىن قوسىمشا مەموراندۋمعا قول قويدى. بۇل جۇمىسقا بيۋدجەت قاراجاتىنان تىس اكتسيونەرلىك قوعام تاراپىنان 5 ملرد. تەڭگە قارجى سالىندى.
جۇما, 24 مامىر 2013 2:01
وسىدان ءۇش جىل بۇرىن الماتى وبلىسى اكىمدىگى مەن «قازترانسگاز» اكتسيونەرلىك قوعامى اراسىندا جەتىسۋلىقتاردى گازبەن قامتاماسىز ەتۋ تۋرالى بىرىككەن ءىس-شارالار مەموراندۋمىنا قول قويىلىپ, مەملەكەتتىك ساياساتقا ساي جۇيەلى جۇمىس باستالعان ەدى. وسى اپتادا الماتى وبلىسىنىڭ اكىمى اڭسار مۇساحانوۆ پەن «قازترانسگاز» اق باس ديرەكتورى سەرىك سۇلتانعالي تالدىقورعاندا كەزدەسۋ وتكىزىپ, اتالعان ءوڭىردى گازداندىرۋ جۇمىسىن جىلدامداتۋ ءۇشىن قوسىمشا مەموراندۋمعا قول قويدى. بۇل جۇمىسقا بيۋدجەت قاراجاتىنان تىس اكتسيونەرلىك قوعام تاراپىنان 5 ملرد. تەڭگە قارجى سالىندى.
«2010 جىلدان بەرى الماتى وبلىسى, ىلە اۋدانىنىڭ 7 ەلدى مەكەنى گازداندىرىلدى. سونىمەن قاتار, الماتى-بايسەركە-تالعار ماگيسترالدى گاز قۇبىرى قۇرىلىسىنىڭ ءبىرىنشى كەزەگىندە 2,5 ملرد. تەڭگە يگەرىلسە, ەكىنشى كەزەگىنە 2,2 ملرد. تەڭگە ءبولىندى. قۇرىلىس جۇمىسىن اعىمداعى جىلى تولىق اياقتاۋ ءۇشىن 1,4 ملرد. تەڭگە تاعى قاراستىرىلدى. 2012 جىلى باستالعان الماتى-تالدىقورعان ماگيسترالدى گاز قۇبىرىنىڭ جالپى قۇنى 19,9 ملرد. تەڭگەگە باعالانعانى ءمالىم. بىلتىر وبلىستىق بيۋدجەتتەن وسى جۇمىسقا 2,2 ملرد. تەڭگە ءبولىندى. تۇتاستاي العاندا, تالدىقورعان قالاسى مەن 180 ەلدى مەكەندى گازبەن قامتاماسىز ەتەتىن بۇل جوباعا سايكەس جۇمىس وسى قارقىنىنان تايماي ءجۇرگىزىلسە, سول يگىلىكتى ءىس 2015 جىلى تولىق اياقتالادى», دەدى الماتى وبلىسىنىڭ اكىمى اڭسار مۇساحانوۆ.
ءوز كەزەگىندە ءسوز العان «قازترانسگاز» اكتسيونەرلىك قوعامىنىڭ باس ديرەكتورى سەرىك سۇلتانعالي: «رەسپۋبليكامىزدا ەڭ از گازداندىرىلعان ولكە الماتى وبلىسى ەدى. وبلىستىق اكىمدىك پەن ءبىزدىڭ اكتسيونەرلىك قوعام اراسىندا جاسالعان مەموراندۋمنىڭ ناتيجەسىندە, بۇل جۇمىستى ءۇش پايىزدان 13 پايىزعا جەتكىزدىك. ەگەر ابونەنت سانىمەن ايتساق, 1500-دەن 10 000-عا ءوستى. بۇل ورلەۋ ديناميكاسىنىڭ بار ەكەندىگىن كورسەتەدى. ەلباسىنىڭ تىكەلەي باقىلاۋىنداعى وڭتۇستىك وبلىستار بويىنشا ۇلكەن الەۋمەتتىك ماسەلەلەردى شەشەتىن بەينەۋ – بوزوي – شىمكەنت اتتى تاريحي جوبا اياقتالۋعا جاقىن قالدى. اعىمداعى جىلدىڭ قازان ايىندا ءبىز قازاق جەرىندە ءبىرىنشى رەت قازاق گازىن پايدالاناتىن بولامىز. ءسويتىپ, وسىناۋ الىپ قۇرىلىس ارقىلى تەك وڭتۇستىك وبلىستار عانا ەمەس, بۇكىل قازاقستاندى گازداندىرۋ ديناميكاسى وسەدى. ايتا كەتەر جايت, بيىل قىستىڭ قاتتى بولۋىنا بايلانىستى ەلباسىنىڭ تاپسىرماسىمەن قىرعىز باۋىرلارعا امانگەلدى گازىن ارزانداتىلعان باعامەن بەرىپ كومەكتەستىك. جالپى العاندا, ەلىمىزدە گازدىڭ باعاسى كومىردەن ارزان بولادى», دەدى باس ديرەكتور.
كەزىندە زاڭناما شەڭبەرىندە جەكە تۇلعالار مەنشىگىنە ءوتىپ كەتكەن جەر تەلىمدەرىن بۇگىندە گاز قۇبىرلارى باسىپ ءوتۋى ءۇشىن الماتى قالاسىنىڭ ىرگەسىندەگى تالعار اۋدانىندا بىرقاتار پروبلەمالار تۋىنداعان ەدى. بۇل ماسەلەنى الماتى وبلىسى اكىمدىگى ارالاسىپ, زاڭعا سايكەس رەتتەگەن-ءتىن. باستالعان جۇمىستىڭ توقتاۋسىز ءجۇرۋى ءۇشىن تۇلعالار مەموراندۋمعا قول قويىسقان كۇنى دە جەر تەلىمىنە بايلانىستى جۇمىستار ءوز شەشىمىن تاپتى. وسى تۇرعىدا «قازترانسگاز» اكتسيونەرلىك قوعامى ىسكەرلىك تانىتتى. سونداي-اق, الماتى وبلىسىندا بوي كوتەرگەن زاۋىتتار گازدان ەكى-ەكى جارىم ەسە قىمبات جانارماي پايدالانىپ وتىر. ەكونوميكالىق تۇرعىدان العاندا گازداندىرۋ ارقىلى كوپتەگەن كىرىس كوزى اشىلارى حاق. تاريفتىك ساياسات تا وڭتۇستىك وبلىستاردا تەڭ ساقتالاتىنى كوڭىل تولتىرادى.
نۇربول الدىباەۆ,
«ەگەمەن قازاقستان».
تالدىقورعان.