جۇما, 17 مامىر 2013 1:50
كەدەن وداعى قۇرىلعالى سولتۇستىك قازاقستان وبلىسىنىڭ دا نارىقتىق اياسى كەڭەيىپ, الەمنىڭ 70-كە جۋىق ەلدەرىمەن ەكونوميكالىق قارىم-قاتىناس جاساۋ مۇمكىندىگىنە يە بولىپ وتىر. بىلتىر ولارمەن جالپى تاۋار اينالىمى 1,2 ميلليارد اقش دوللارىن قۇراسا, 25 پايىزدايى ەكسپورت ۇلەسىنە تيەدى. ايماقتىڭ كورشى رەسەيمەن تاۋار الماسۋ دەڭگەيى بىلتىر 200 ميلليون دوللارعا جەتتى. ەكىجاقتى ىسكەرلىك بايلانىستى ءوزارا مۇددەلەستىك تۇرعىدان دامىتۋ ماقساتىن كوزدەگەن تۇمەن وبلىسىنىڭ ىسكەرلىك دەلەگاتسيا وكىلدەرى قىزىلجار وڭىرىندە بولىپ, بايلانىس بيرجاسى شەڭبەرىندە كاسىپكەرلىك سالانى ءتيىمدى جالعاستىرۋ جولدارىن قاراستىردى.
جۇما, 17 مامىر 2013 1:50
كەدەن وداعى قۇرىلعالى سولتۇستىك قازاقستان وبلىسىنىڭ دا نارىقتىق اياسى كەڭەيىپ, الەمنىڭ 70-كە جۋىق ەلدەرىمەن ەكونوميكالىق قارىم-قاتىناس جاساۋ مۇمكىندىگىنە يە بولىپ وتىر. بىلتىر ولارمەن جالپى تاۋار اينالىمى 1,2 ميلليارد اقش دوللارىن قۇراسا, 25 پايىزدايى ەكسپورت ۇلەسىنە تيەدى. ايماقتىڭ كورشى رەسەيمەن تاۋار الماسۋ دەڭگەيى بىلتىر 200 ميلليون دوللارعا جەتتى. ەكىجاقتى ىسكەرلىك بايلانىستى ءوزارا مۇددەلەستىك تۇرعىدان دامىتۋ ماقساتىن كوزدەگەن تۇمەن وبلىسىنىڭ ىسكەرلىك دەلەگاتسيا وكىلدەرى قىزىلجار وڭىرىندە بولىپ, بايلانىس بيرجاسى شەڭبەرىندە كاسىپكەرلىك سالانى ءتيىمدى جالعاستىرۋ جولدارىن قاراستىردى. ونەركاسىپ جانە كاسىپكەرلىك باسارماسىنىڭ باسشىسى توتىكامال قۇلجانوۆانىڭ ايتۋىنشا, قازاقستان ۇكىمەتىنىڭ «بيزنەستىڭ جول كارتاسى-2020», «ەكسپورتتاۋشى-2020», «ونىمدىلىك-2020» باعدارلامالارى شاعىن جانە ورتا بيزنەستىڭ وركەندەۋىنە ۇلكەن سەرپىلىس تۋعىزىپ, جان-جاقتى قارجىلىق كومەك كورسەتىلىپ كەلەدى. وتكەن جىلى بيزنەستىڭ جول كارتاسى سالاسىنا 900 ميلليون, بيىل 1 ميلليارد تەڭگەدەن استام قارجى قۇيىلدى. ينۆەستورلارعا قولداۋ كورسەتۋ ورتالىعى ينۆەستيتسيالىق قىزمەتتى جانداندىرۋ, كاسىپكەرلەردى قارجىلاندىرۋ, نەسيەلەرگە كەپىلدىك بەرۋ ماسەلەلەرىمەن اينالىسادى. وسىعان وراي, جەرگىلىكتى تاۋار وندىرۋشىلەردىڭ ءتيىمدى جوبالاردى جۇزەگە اسىرۋعا ەرەن قۇلشىنىسىن بايقاۋ قيىن ەمەس. وڭىردەن ساپالى استىق, قيىرشىق تاس, ەلەكتر وقشاۋلاعىش ماتەريالدار رەسەيگە جونەلتىلسە, ودان قۇرىلىس تاۋارلارى, كولىك قۇرالدارى, مۇناي ونىمدەرى جەتكىزىلەدى. بۇگىندە ايماقتىڭ 60-تان استام ونەركاسىپ ورىندارى بيزنەس قۇرىلىمعا بىرىگىپ, كورشى ەلدەن 16 كاسىپورىن تارتىلعان.
«ەرا-98» ااق باس ديرەكتورىنىڭ ورىنباسارى ۆلاديمير گلازكوۆ, بالىق شارۋاشىلىعىن جانداندىرۋعا, بالىق ونىمدەرىن قالدىقسىز وڭدەۋگە ارىپتەستىك تانىتسا, «گورۆودستروي» ااق وكىلى قازاقستاندا قولعا الىنعان ەلدى مەكەندەردى گازبەن, سۋمەن جابدىقتاۋ باعدارلاماسىمەن جاقسى تانىستىعىن ايتا كەلىپ, بۇل ورايدا جەر استى كوممۋنيكاتسيا قۇرىلىستارىنا ارنايى تەحنيكالار مەن ماماندار جىبەرۋگە ىقىلاستىلىعىن تانىتتى. تەز تۇرعىزىلاتىن ۇيلەر جاساۋمەن جانە جابدىقتاۋمەن شۇعىلداناتىن وندىرىستىك-قۇرىلىس كومپانياسىنىڭ باس ديرەكتورى نيكولاي كوۆال وبلىستا ءوز فيليالىن اشۋ نيەتىن جاسىرمادى. «Urpag-tour» جسش باس ديرەكتورىنىڭ ورىنباسارى رومان گوسترەنكو ايىرتاۋ اۋدانى اۋماعىندا ەتنواۋىل قۇرىلىسىن جۇرگىزۋگە ارنالعان جوباعا تۇمەندىك كاسىپكەرلەر قىزىعۋشىلىق تۋدىرىپ وتىرعانىن جەتكىزدى.
مەيماندار مامليۋت اۋدانىنا قاراستى «ارقالىق» شارۋا قوجالىعىندا بولىپ, قىمىز وندىرىسىمەن تانىستى. ونىڭ جەتەكشىسى ناعاشىباي بارلىباەۆ تۇمەننىڭ سلادكوۆسكوە اۋدانىندا شيپالى سۋسىن وندىرەتىن تسەح اشۋ جوسپارىمەن ءبولىستى.
تۇمەندىك كومپانيالار سولتۇستىكقازاقستاندىقتارمەن ارىپتەستىك بايلانىس ورناتۋ كەلىسىمىنە قول قويدى.
ءومىر ەسقالي,
«ەگەمەن قازاقستان».
سولتۇستىك قازاقستان وبلىسى.