شاراعا ورال قالاسىندا تۇراتىن بەلگىلى دومبىراشى, قازاق كۇي ونەرىنىڭ التىن قورىنا ءبىرنەشە شىعارمانى جەتكىزىپ, جازىپ قالدىرعان وتەگەن جۇماشەۆ, ارداگەر كۇيشى, دومبىراشى ۇلمەكەن باتىروۆا, «قۇرمەت» وردەنىنىڭ يەگەرى, قازاقستاننىڭ ەڭبەك سىڭىرگەن مادەنيەت قىزمەتكەرى, داۋلەسكەر كۇيشى ەرمەك قازيەۆ, كۇيشى-دومبىراشى ءارى دومبىرا جاساۋشى شەبەر ەدىگە نابيەۆ سەكىلدى بەلگىلى ونەر تۇلعالارى قاتىستى. مەرەكەگە قاتىسۋشىلار «ناعىز قازاق – قازاق ەمەس, ناعىز قازاق – دومبىرا!» دەگەن قاناتتى ءسوزدىڭ اۆتورى, اقىن قادىر مىرزا ءالىنىڭ ەسكەرتكىشىنە گۇل شوعىن قويدى.
بۇگىنگى كۇننىڭ باستى جاڭالىعى – قادىر ورتالىعىنان دەربەس كۇي بولمەسىنىڭ اشىلۋى بولدى. ونىڭ لەنتاسىن باتىس قازاقستان وبلىستىق مادەنيەت باسقارماسىنىڭ باسشىسى قادىربولات مۇساعاليەۆ پەن كۇيشى ەرمەك قازيەۆ قيدى. قالي جانتىلەۋوۆتىڭ تۋعان جيەنى, دومبىراشى تولەگەن قايىرعالي ۇلى «كۇيشىلەر بولمەسىنەن» بولاشاقتا قۇرمانعازى, سەيتەك, دينا, داۋلەتكەرەي سەكىلدى داۋلەسكەر كۇيشىلەر شىعۋىن اللادان تىلەپ, اق باتاسىن بەرسە, ۇلمەكەن انامىز شاشۋ شاشتى.
– قادىر ورتالىعىنىڭ جەتەكشىسى باۋىرجان حاليوللانىڭ قولداۋىمەن بەرىلگەن بولمەمىزدى بارىنشا مازمۇندى بەزەندىرۋگە تىرىستىق. «ايدار» شارۋا قوجالىعىنىڭ جەتەكشىسى ايدار عافۋ ۇلى دەمەۋشى بولىپ, دومبىرا مەن قازاق كۇي ونەرىنىڭ تاريحىنا, جەرگىلىكتى كۇيشىلىك مەكتەپتەردىڭ ساباقتاستىعىنا ارنالعان بىرنەشە كورنەكىلىك تاقتا جاسادىق. ورالدىق دومبىرا جاساۋشى شەبەرلەردىڭ اعا بۋىنى سانالاتىن باقىتكەرەي سۇلەيمەنوۆ, ەدىگە نابيەۆ, سانسىزباي احمەتوۆ, اسىلان سەرىكباەۆتاردىڭ ونەرىن ناسيحاتتاۋعا دا كوڭىل بولدىك. دەگەنمەن, ءبۇگىنگى ەڭ باستى جاڭالىق – كۇي بولمەسىندە ورناتىلعان «ەلەكتروندى دومبىرا» بولدى. باتىس قازاقستان وبلىستىق بالالار تەحنيكالىق شىعارماشىلىعى ورتالىعىنىڭ «روبوتتىق تەحنيكا» ۇيىرمەسىنىڭ جەتەكشىسى مارس ماقسوت جاساعان بۇل دومبىرانىڭ ەرەكشەلىگى – شەگىنەن شەرتىپ قالساڭىز, كۇي ءتوگىلە جونەلەدى. ءىس-شاراعا قاتىسقان حالىقتىڭ ءبارى وسى ەلەكتروندى دومبىراعا قاتتى قىزىقتى, وزگە وڭىرلەردەن دە تاپسىرىس ءتۇسىپ جاتىر, – دەيدى اسقار كەنجەعاليەۆ.
اقجايىق وڭىرىندە ءبىراز جىلدان بەرى دومبىرا, كۇي ونەرىن دامىتۋ, تاريحي تۇلعالاردى ءدارىپتەۋ جولىندا قىزمەت ەتىپ, بەلگىلى ونەرپاز مۇحيت ايتقاليەۆ حاقىندا كىتاپ شىعارعان اسقار كەنجەعاليەۆ ەلىمىزدە ۇلتتىق دومبىرا كۇنى مەرەكەسى پايدا بولعانىنا ەرەكشە ريزا. «قازاق كۇيشىلەرى رەسپۋبليكالىق دەڭگەيدە قولداۋعا ءزارۋ» دەگەن اسقار مۇحامبەتقالي ۇلى ارداگەر كۇيشىلەردى قولداۋ, سابيلەرگە بالاباقشادان باستاپ دومبىرا الىپپەسىن ۇيرەتۋ سەكىلدى ناقتى ۇسىنىستارىن ايتىپ وتىر.
كۇي بولمەسىندە دومبىرا ۇيرەتۋ مەكتەبى جۇمىس ىستەيدى. سونداي-اق مۇندا دومبىرا, كۇي تاريحىنا, كۇيشىلەردىڭ ءومىرى مەن شىعارماشىلىعىنا ارنالعان ءتاربيە ساعاتتارى, تانىمدىق كەشتەر ۇيىمداستىرىلماق.
باتىس قازاقستان وبلىسى