سارسەنبى, 8 مامىر 2013 1:43
وبلىستا الىس-جاقىن شەتەلدەرمەن ارىپتەستىك قاتىناستاردى نىعايتۋعا باعىت ۇستالۋدا. اسىرەسە, كورشىلەس ەلدەرمەن تىعىز ىنتىماقتاستىق بايلانىس ورناتۋدا تىم ءتاۋىر باستامالار ومىرگە كەلۋدە. بۇرىن رەسەيدىڭ شەكارالاس ايماقتارىمەن ەكونوميكالىق ارىپتەستىك قاتىناس جاقسى جولعا قويىلعان بولاتىن. سوڭعى جىلدارى ارىپتەستىك بايلانىس كوكجيەگىن كەڭەيتۋگە قادام جاسالا باستادى.
سارسەنبى, 8 مامىر 2013 1:43
وبلىستا الىس-جاقىن شەتەلدەرمەن ارىپتەستىك قاتىناستاردى نىعايتۋعا باعىت ۇستالۋدا. اسىرەسە, كورشىلەس ەلدەرمەن تىعىز ىنتىماقتاستىق بايلانىس ورناتۋدا تىم ءتاۋىر باستامالار ومىرگە كەلۋدە. بۇرىن رەسەيدىڭ شەكارالاس ايماقتارىمەن ەكونوميكالىق ارىپتەستىك قاتىناس جاقسى جولعا قويىلعان بولاتىن. سوڭعى جىلدارى ارىپتەستىك بايلانىس كوكجيەگىن كەڭەيتۋگە قادام جاسالا باستادى. وتكەن جىلى وبلىستىڭ جەرگىلىكتى اتقارۋشى بيلىك وكىلدەرى جانە كاسىپكەرلەرىنەن قۇرالعان دەلەگاتسياسى تاتارستاننىڭ استاناسى قازاندا جانە ازەربايجاننىڭ استاناسى باكۋدە بولىپ, ىسكەرلىك بايلانىستاردىڭ ءتىنىن بەكىتىپ, ءوزارا تاجىريبە الماسىپ, ەكونوميكالىق ىنتىماقتاستىققا نەگىز قالاپ كەلگەن-ءدى. بۇل جولى وبلىس اكىمى ارحيمەد مۇحامبەتوۆ باسقارعان دەلەگاتسيا رەسەيدىڭ مەيلىنشە قارقىندى دامىپ كەلە جاتقان ءوڭىرلەرىنىڭ ءبىرى – كالۋگا وبلىسىندا رەسمي ساپارمەن بولىپ قايتتى. ونداعى ماقسات قازىرگىدەي نارىقتىق جاعدايدا جۇمىس ىستەۋدە ءوزارا تاجىريبە الماسۋ جانە ايماقتاردىڭ يندۋستريالىق-يننوۆاتسيالىق دامۋ ماسەلەلەرىن تالقىلاۋ بولىپ تابىلادى.
– مۇنداي ىسكەرلىك بايلانىستاردىڭ بەرەرى مول. اقتوبەلىكتەر, اسىرەسە, ماشينا جاساۋ جانە اۋىل شارۋاشىلىعى سالالارىنا كوبىرەك نازار اۋداردى. ىسكەرلىك دەلەگاتسيا الدىمەن كەدەندىك تەرمينال, لوگيستيكالىق كەشەن ءجانە «روسۆا» يندۋستريالىق پاركى جۇمىستارىمەن تانىستى. سونداي-اق, تەك يندۋستريالىق پاركتى اشىپ قانا قويماي, وندا جۇمىس ىستەيتىن كادر ماسەلەسىن شەشۋ دە كەشەندى جۇرگىزىلەدى ەكەن. پاركتە قاجەتتى ماماندىقتارعا جۇمىسشىلار دايارلاۋدىڭ ۇلگىلى ءۇردىسى قالىپتاسقان. مامانداردىڭ ءبارىن شەتەلدە دايارلاۋ مۇمكىن بولمايتىندىقتان, ولار وزدەرىندە وقۋ ورتالىقتارىن اشۋدى ءجون كورىپتى. مۇندا تاپسىرىس بەرۋشىنىڭ بەلگىلەۋىمەن جيناقتاۋشى, مەحانيك, دانەكەرلەۋشى, تاعى دا باسقا ماماندىقتار بويىنشا وقىتۋ قامتاماسىز ەتىلگەن. ينۆەستوردىڭ ءوز بيزنەسىن اشۋعا دەگەن ويىن جۇزەگە اسىرۋدىڭ دا تەتىكتەرى جەڭىلدەتىلگەن, – دەيدى وبلىستىق كاسىپكەرلىك جانە ونەركاسىپ باسقارماسىنىڭ باستىعى مارات بالمۇقانوۆ.
ساپار بارىسىندا وبلىس اكىمى ارحيمەد مۇحامبەتوۆ كالۋگا وبلىسىنىڭ گۋبەرناتورى اناتولي ارتامونوۆپەن كەزدەستى. ولار ءوزارا اڭگىمە بارىسىندا قازاقستان مەن رەسەي پرەزيدەنتتەرى نۇرسۇلتان نازارباەۆ پەن ۆلاديمير پۋتين ۇستانعان ستراتەگيالىق باعىتتاردى بەكەم قولدايتىندىقتارىن ءبىلدىردى. سونداي-اق, ءوزارا ىنتىماقتاستىق تۇرعىسىنان ماڭىزدى ماسەلەلەردى تالقىلاپ, بىرلەسىپ جۇمىس ىستەۋدىڭ مۇمكىندىكتەرىن قاراستىردى.
ساپار بارىسىندا ەكى وبلىستىڭ ساۋدا-ونەركاسىپ پالاتالارى اراسىندا ۇزاق مەرزىمدى نەگىزدە, تەڭ ءارىپتەستىك, ءبىر-ءبىرىنىڭ مۇددەسىن ەسكەرۋ جاعدايىندا ىنتىماقتاستىقتى دامىتۋ تۋرالى كەلىسىمگە قول قويىلدى.
ساتىبالدى ءساۋىرباي,
«ەگەمەن قازاقستان».
اقتوبە وبلىسى.