جۇما, 29 ناۋرىز 2013 1:31
ەكونوميكالىق بايلانىستار ءۇزىلىپ, كاسىپورىندار توقتاپ, جاپپاي جەكەشەلەندىرۋ باستالعان كەزدە كەشەگى دۇركىرەپ تۇرعان ءوندىرىس ورىندارى ۇستاعاننىڭ قولىندا, تىستەگەنىڭ اۋزىندا كەتكەنىن قازىر وكىنىشپەن ەسكە الۋدان باسقا قايران جوق. دەگەنمەن, سول تالان-تاراجعا تۇسكەن كاسىپورىنداردىڭ اراسىندا ءىستىڭ ۇتىرىن بىلەتىن كاسىپكەردىڭ قولىنا تاپ بولعاندارى شارۋاسىن تۇزەپ, ەكىنشى تىنىسى اشىلعانىن دا كورىپ ءجۇرمىز. حرومتاۋ اۋدانى ورتالىعىنداعى ءدوڭ استىق قابىلداۋ ەلەۆاتورى دا قولدان-قولعا ءوتىپ سىيىمدىلىعى 75 مىڭ توننا استىق قابىلداۋعا مۇمكىندىك بەرەتىن كاسىپورىن دا تالان-تاراجعا ءتۇستى, قۇر سۇلباسى عانا قالدى. 2004 جىلى ونى استىقتى ەكسپورتقا شىعارۋمەن اينالىساتىن «ستك كومپاني» فيرماسى ساتىپ الىپ, دەرەۋ قالپىنا كەلتىرۋ جۇمىستارىنا كىرىستى. «اقتوبە نان ونىمدەرى كومبيناتى» جشس بولىپ قايتا قۇرىلعان كاسىپورىن تىزگىنىن نارىقتىق قاتىناستاردا جۇمىس ىستەپ ىسىلعان تاجىريبەلى مامان ابزال جۇبانىشەۆ ۇستادى.
جۇما, 29 ناۋرىز 2013 1:31
ەكونوميكالىق بايلانىستار ءۇزىلىپ, كاسىپورىندار توقتاپ, جاپپاي جەكەشەلەندىرۋ باستالعان كەزدە كەشەگى دۇركىرەپ تۇرعان ءوندىرىس ورىندارى ۇستاعاننىڭ قولىندا, تىستەگەنىڭ اۋزىندا كەتكەنىن قازىر وكىنىشپەن ەسكە الۋدان باسقا قايران جوق. دەگەنمەن, سول تالان-تاراجعا تۇسكەن كاسىپورىنداردىڭ اراسىندا ءىستىڭ ۇتىرىن بىلەتىن كاسىپكەردىڭ قولىنا تاپ بولعاندارى شارۋاسىن تۇزەپ, ەكىنشى تىنىسى اشىلعانىن دا كورىپ ءجۇرمىز. حرومتاۋ اۋدانى ورتالىعىنداعى ءدوڭ استىق قابىلداۋ ەلەۆاتورى دا قولدان-قولعا ءوتىپ سىيىمدىلىعى 75 مىڭ توننا استىق قابىلداۋعا مۇمكىندىك بەرەتىن كاسىپورىن دا تالان-تاراجعا ءتۇستى, قۇر سۇلباسى عانا قالدى. 2004 جىلى ونى استىقتى ەكسپورتقا شىعارۋمەن اينالىساتىن «ستك كومپاني» فيرماسى ساتىپ الىپ, دەرەۋ قالپىنا كەلتىرۋ جۇمىستارىنا كىرىستى. «اقتوبە نان ونىمدەرى كومبيناتى» جشس بولىپ قايتا قۇرىلعان كاسىپورىن تىزگىنىن نارىقتىق قاتىناستاردا جۇمىس ىستەپ ىسىلعان تاجىريبەلى مامان ابزال جۇبانىشەۆ ۇستادى.
ول كەزدەگى ەلەۆاتوردىڭ قاڭىراعان عيماراتىنا قاراۋدىڭ ءوزى جۇرەگىڭدى شايلىقتىرار ەدى. «كوز قورقاق, قول باتىر» دەگەن راس ەكەن. ىسكە ءبىر كىرىسىپ كەتكەن سوڭ, شەگىنەر جەر قالمادى, قايتا جاراقتاندىرۋدى باستاپ كەتتىك, دەپ ەسكە الادى كاسىپورىن باسشىسى تاۋەكەلمەن شارۋا جاساعان ءساتتى قازىر.
فيرماعا كاسىپورىندى ءىسكە قوسۋ ءۇشىن قىرۋار قارجى ينۆەستيتسيا سالۋعا تۋرا كەلدى. ەلەۆاتوردىڭ عيماراتى كۇردەلى جوندەۋدەن وتكىزىلدى. كاسىپورىنعا گاز, ەلەكتر جەتكىزىلدى, سۋ قۇبىرى جانە كاناليزاتسيا تارتىلدى. تەك قانا تەحنولوگيالىق زەرتحاناعا نەمىستىڭ زاماناۋي قوندىرعىلارىن ورناتۋ 100 مىڭ ەۋروعا ءتۇستى. استىق قابىلداۋ جانە تيەۋ, وڭدەۋ جانە ساقتاۋ ۋچاسكەلەرى جاڭعىرتىلدى, 1,5 شاقىرىم كىرمە جول, ليفت قالپىنا كەلتىرىلدى. بۇرىنعى مەحانيكالىق تارازى قالپىنا كەلتىرىلىپ, كومپيۋتەرمەن باسقارىلاتىن تارازى پايدالانۋعا بەرىلدى. جاڭادان اكىمشىلىك عيماراتى, اسحانا, قوناق ءۇي سالىندى. ءسويتىپ, ەلەۆاتور ىسكە قوسىلىپ, الىس-جاقىنداعى شارۋالاردان استىق قابىلداي باستادى.
2007 جىلى ديىرمەن قۇرىلىسىن سالۋ باستالىپ, ءبىر جىلدان كەيىن تۇرىكتىڭ وزىق تەحنولوگيالىق قوندىرعىسى ورناتىلعان ۇن تارتۋ زاۋىتى ىسكە قوسىلدى. بۇل ديىرمەن تاۋلىگىنە 200 توننا بيداي ۇنىن وندىرۋگە مۇمكىندىك بەردى. سەرىكتەستىكتىڭ «راحات» جانە «ستارت» ماركالى ۇندارى ىشكى رىنوكتى عانا قامتاماسىز ەتىپ قويماي, ەكسپورتقا دا شىعارىلا باستادى.
الايدا, ءونىمدى شيكىزات ءتۇرىندە وتكىزۋدىڭ تيىمسىزدىگىن ەسكەرگەن كاسىپورىن باسشىلارى ماكارون تسەحىن سالۋدى قولعا الىپ, ول ۇدەمەلى يندۋستريالىق-يننوۆاتسيالىق دامۋ باعدارلاماسى اياسىندا ءجۇزەگە اسىرىلدى. ءوندىرىستى وسىلاي جاڭعىرتۋعا باعىت ۇستالدى. بۇل جوبانى جۇزەگە اسىرۋعا 750 ميلليون تەڭگە قارجى سالىندى. ەلەۆاتور اۋماعىندا سالىنعان فابريكاعا يتاليالىق راvاپ فيرماسىنىڭ تەحنولوگيالىق جەلىسى ورناتىلعان. ونىڭ قۋاتى ساعاتىنا 2 توننا قىسقا ماكارون ونىمدەرىن شىعارۋعا مۇمكىندىك بەرەدى. قازىر «ستاتۋس», «بوتا» ماركالى ون ءتۇرلى ماكارون وندىرىلەدى. بولاشاقتا ماكارون تۇرلەرىن 20-عا جەتكىزۋ كوزدەلۋدە. سونداي-اق, ەكىنشى جانە ءۇشىنشى جەلىلەردى ىسكە قوسىپ, سپاگەتتي, جايما شىعارۋ دا الداعى كۇندەردىڭ ەنشىسىندەگى شارۋالار. مۇندا 60 ادام ەڭبەككە تارتىلدى. جەرگىلىكتى مامانداردى شەتەلدىك ارىپتەستەرى وقىتىپ, تاجىريبە جيناقتاتتى.
سەرىكتەستىكتىڭ ۇنى مەن ماكارون بۇيىمدارىنا وبلىس ورتالىعىنداعى سۋپەرماركەتتەردە, ءىرى كاسىپورىندا, كوتەرمە ساۋدا بازارلارىندا سۇرانىس جوعارى. قازىر كاسىپورىننىڭ ونىمدەرىنىڭ 70 پايىزى اۋعانستان, وزبەكستان, تاجىكستان, تۇركىمەنستان سياقتى الىس-جاقىن شەتەلدەرگە, قالعانى ەلىمىزدىڭ التى وبلىستارىنا وتكىزىلەدى. اقتوبە نان ونىمدەرى كومبيناتىنىڭ ءونىمدەرىنىڭ ساپالىلىعىن 2011 جىلى «قازاقستاننىڭ ۇزدىك تاۋارلارى» كونكۋرسىندا ەكىنشى ورىن يەلەنىپ, ال, وتكەن جىلى جەڭىمپازى بولعانىن, رەسپۋبليكالىق «التىن ساپا» كونكۋرسىنا قاتىسقانىنىڭ ءوزى دالەلدەي تۇسسە كەرەك. قازىر سەرىكتەستىككە قاراستى بارلىق ءوندىرىس بۋىندارىندا 200 ادام جۇمىس ىستەيدى. سەرىكتەستىك ديرەكتورى ابزال جۇبانىشەۆتىڭ ايتۋىنشا, بۇگىن-ەرتەڭ تاعى ءبىر وندىرىستىك جەلى – نان-بولكە ءجانە كونديتەر بۇيىمدارىن ءوندىرەتىن تسەح ىسكە قوسىلماق. ونىڭ تاۋلىكتىك قۋاتى 15 مىڭ دانا نان ونىمدەرىن شىعارۋعا ەسەپتەلگەن. وعان ەلەۆاتوردىڭ بۇرىنعى كەڭسەسى ىڭعايلاستىرىلىپ سالىنىپ, تسەحقا تۇرىكتىڭ زاماناۋي قوندىرعىسى ورناتىلدى. بۇل جوباعا 4 ميلليون اقش دوللارى جۇمسالدى. ناۋرىز ايىنىڭ اياعىنا تامان اشىلاتىن بۇل تسەحتا وندىرىلگەن نان-بولكە, كونديتەر بۇيىمدارى حرومتاۋلىقتاردىڭ سۇرانىسىن 60 پايىزعا قامتاماسىز ەتەتىن بولادى.
ءوز شيكىزاتىڭ بولماي ءوندىرىستىڭ ورگە باسپايتىنىن ءتۇسىنگەن سەرىكتەستىك باسشىلارى قۇدىقساي سەلولىق وكرۋگى اۋماعىنان 10 مىڭ گەكتار ەگىستىكتى 49 جىلعا پايدالانۋعا جالعا الىپ, ءداندى داقىلدار وسىرۋدە. «قازاگروقارجى» اق ارقىلى ونىمدىلىگى جوعارى ءۇش دجون دير ەگىس كەشەنىن, وسىنشاما كومباين ساتىپ الدى. جەرگىلىكتى تۇرعىنداردىڭ اراسىنان تاجىريبەلى مەحانيزاتورلاردى جۇمىسقا تارتىپ, ولاردى جاڭا تەحنيكادا جۇمىس ىستەۋگە وقىتىلدى.
ءسويتىپ, القاپ – ەلەۆاتور – ديىرمەن جۇيەسىن قالىپتاستىردى. قازىر سەرىكتەستىك كوكتەمگى ەگىسكە تياناقتى دايىندالۋدا. تۇقىمدىق استىق بار, جەر وڭدەۋ, تۇقىم سەبۋ تەحنيكالارى, تراكتورلار دايىندىق ساپىنا قويىلعان. كوكتەم شىعىسىمەن القاپقا شىعۋعا قۇلشىنىپ وتىرعان سەرىكتەستىك ەگىنشىلەرى بيىل مول ونىمنەن ءۇمىتتى.
ساتىبالدى ءساۋىرباي,
«ەگەمەن قازاقستان».
اقتوبە وبلىسى.