سەيسەنبى, 12 ناۋرىز 2013 6:43
وماروۆتاردىڭ ۇيىمشىل اۋلەتىن بۇل ءوڭىردىڭ جۇرتشىلىعى جاقسى بىلەدى. ولار «قازاقمىس» كومپانياسىنا قاراستى باتىس جەزقازعان كەنىشىنىڭ № 73 شاحتاسىندا ەڭبەك ەتىپ ەل يگىلىگىن ەسەلەۋگە ۇلەستەرىن قوسىپ ءجۇر. قاشاندا جۇمىلىپ جۇمىس ىستەۋدى داستۇرگە اينالدىرعان اعايىندى وماروۆتاردىڭ العان اسۋلارى مەن جەتكەن جەتىستىكتەرى كوپكە ونەگە. باقىتىن ەڭبەكتەن تاپقان ولاردىڭ جان دۇنيەلەرى دە تازا. شىرايلى جۇزدەرىنەن مەيىرىم شۋاعى توگىلىپ, ىزگىلىكتىڭ لەبى ەسىپ تۇرادى. كەلبەتتەرىنە قاراساڭ, كوز تويادى. سويلەسە قالساڭ, جىلى سوزدەرىمەن باۋراپ الادى.
سەيسەنبى, 12 ناۋرىز 2013 6:43
وماروۆتاردىڭ ۇيىمشىل اۋلەتىن بۇل ءوڭىردىڭ جۇرتشىلىعى جاقسى بىلەدى. ولار «قازاقمىس» كومپانياسىنا قاراستى باتىس جەزقازعان كەنىشىنىڭ № 73 شاحتاسىندا ەڭبەك ەتىپ ەل يگىلىگىن ەسەلەۋگە ۇلەستەرىن قوسىپ ءجۇر. قاشاندا جۇمىلىپ جۇمىس ىستەۋدى داستۇرگە اينالدىرعان اعايىندى وماروۆتاردىڭ العان اسۋلارى مەن جەتكەن جەتىستىكتەرى كوپكە ونەگە. باقىتىن ەڭبەكتەن تاپقان ولاردىڭ جان دۇنيەلەرى دە تازا. شىرايلى جۇزدەرىنەن مەيىرىم شۋاعى توگىلىپ, ىزگىلىكتىڭ لەبى ەسىپ تۇرادى. كەلبەتتەرىنە قاراساڭ, كوز تويادى. سويلەسە قالساڭ, جىلى سوزدەرىمەن باۋراپ الادى.
الدىمەن اڭگىمەلەسۋ رەتى № 35 ءوندىرۋ ۋچاسكەسىنىڭ باستىعى ەرمەك وماروۆقا ءتۇستى. ەرمەك مارس ۇلى ءوز تاعدىرىن كەن ءوندىرۋ ونەركاسىبىمەن تىعىز بايلانىستىرعانىنا وتە ريزا. ويتكەنى, ءبىر كەزدە اتاسى دا, ودان كەيىن اكەسى دە وسىنداعى شاحتادا كەن قوپارىپ قاجىر-قايرات تانىتىپتى. س.سەيفۋللين اتىنداعى گيمنازيانى بىتىرگەن ەرمەك ەندى جوعارى ءبىلىم الۋدى ۇيعارىپ, جەزقازعان مەملەكەتتىك ۋنيۆەرسيتەتىنىڭ تابالدىرىعىن اتتادى. وقۋدى ويداعىداي اياقتاپ, كەن ينجەنەرى ماماندىعىن الىپ شىقتى. ءسويتىپ, ەڭبەك جولىن باتىس كەنىشىندەگى قوپارۋشىلار توبىندا ۇيرەنۋشى بولىپ باستادى. زىمىراعان ۋاقىت. ارادا ون ءبىر جىل ءوتتى. مىنە, سودان بەرى وسىندا تابان اۋدارماي جۇمىس ىستەپ كەلەدى. ارينە, باستاپقىدا ءبارى وڭاي بولعان جوق. قيىندىق تا كەزدەستى. وسىنداي ساتتەردە تالىمگەرى الەكساندر كيم قامقورلىعىن ايامادى. كوپ جىل بويى جيناقتاعان باي تاجىريبەسىن شاكىرتىنە ۇيرەتۋدەن جالىقپادى. جاستايىنان زەرەك جىگىت جۇمىستىڭ قىر-سىرىنا ابدەن قانىعىپ, ءبىلىكتى مامانعا اينالدى. جارقىن بولاشاققا جول اشىلدى. ۋچاسكە باستىعىنىڭ ورىنباسارى قىزمەتىنە تاعايىندالدى. جاۋاپكەرشىلىك جۇگى اۋىرلادى. مۇنى جەتە تۇسىنگەن ول جۇكتەلگەن مىندەتتى ءمىنسىز اتقارۋدى باستى ماقسات ەتىپ قويدى. ىزدەنىس پەن ىسكەرلىك قاتار جۇرگەندە عانا جەتىستىككە جول اشىلاتىنى انىق ەكەن. قىزمەت باسپالداعى تاعى دا بيىكتەدى.
– تاپسىرىلعان جۇمىستى تاپ-تۇيناقتاي ورىنداۋدى العاشقى كۇننەن-اق داعدىعا اينالدىردىم. ىسكە ءجۇردىم-باردىم قاراۋ قيانات. وندىرىستە تارتىپتىلىكتىڭ ورنىعۋىنا ءبىراز كۇش جۇمسادىم. سونىڭ ناتيجەسىندە ەڭبەك ءونىمدىلىگى ءوسىپ, بەلگىلەگەن مەجەدەن ۇنەمى شىعىپ ءجۇرمىز, – دەيدى ەرمەك وماروۆ. – ءبىزدىڭ ۇجىمداعى بۇرعىلاۋ قوندىرعىلارىنىڭ بەساسپاپ جەتەكشىلەرى قايرات بايىسوۆ پەن باقتيار جانالينوۆ ءتارىزدى تارلانداردىڭ ەڭبەكتەرىن ەرەكشە باعالاعان ءجون. ءوندىرىستى ورگە سۇيرەپ جۇرگەندەر دە مىنە وسى ازاماتتار. ال شاحتا باستىعى رۋسلان ەلكەەۆتىڭ جالپى جۇرگىزىپ وتىرعان جۇمىسىن بولە-جارا ايتۋعا بولادى. ول وندىرىستە كەزدەسەتىن كەز كەلگەن كۇردەلى ماسەلە ءتۇيىنىن شەبەرلىكپەن شەشەدى.
ەرمەك وماروۆتىڭ ءوزى دە سىي-سياپاتتان قۇرالاقان ەمەس. ءالدەنەشە رەت ءتۇرلى دەڭگەيدەگى قۇرمەت گراموتالارىمەن ماراپاتتالدى. ەرمەك مارس ۇلىنىڭ مۇنداي بيىكتەرگە قول جەتكىزۋىنە زايىبى قۇرالايدىڭ دا كومەگى كوپ ءتيدى. وماروۆتاردىڭ باقىتتى وتباسىندا جەلكىلدەپ ءۇش بالا ءوسىپ كەلەدى. قىزى كاميلا, ۇلدارى ءاليحان مەن ميراس تاتۋ-ءتاتتى شاڭىراقتىڭ كوزايىمى. جايدارى مىنەزدى قۇرالايدىڭ قامقورلىعىنىڭ ارقاسىندا ەرمەك وماروۆ وسىنداي دارەجەگە كوتەرىلىپ وتىر.
ەرمەكتىڭ تۋعان اعاسى ەركەن وماروۆتىڭ باتىس جەزقازعان كەنىشىندە جۇمىس ىستەگەنىنە ءبىرنەشە ايدىڭ ءجۇزى تولىپتى. ول بۇعان دەيىن شىعىس جەزقازعان كەنىشىندە كەن قوپارعان ەكەن. 1998 جىلى مەكتەپتى بىتىرىسىمەن ءبىردەن جۇمىسقا ورنالاسىپتى. ەركەن مارس ۇلى كەنىشتىڭ №57 شاحتاسىندا قايناعان جۇمىستىڭ ورتاسىندا ءجۇرىپ مول تاجىريبە جيناقتاعان. الدىمەن قوپارعىش ماتەريالداردى جەتكىزۋشى بولىپ ىستەگەن. سودان كەيىن قوپارۋشى رەتىندە تالاي قاۋىپتى جۇمىستىڭ ورتاسىندا ءجۇرىپتى. كەيىنىرەك كاسىبىن وزگەرتىپ, ەلەكتروۆوز ءماشينيسى بولادى. مايتالمان ماماننىڭ ەڭبەگى ەلەنىپ, 2011 جىلى جەزقازعان قالاسىنىڭ كەنشىلەر الاڭىندا ورىن تەپكەن مادەنيەت ۇيىنە تاقاۋ جەردەگى قۇرمەت تاقتاسىنا سۋرەتى ءىلىنىپتى.
– ماعان باتىس جەزقازعان كەنىشىنىڭ №73 شاحتاسىنا جۇمىسقا اۋىسۋىما قايىن اتام حاميت بەكەجانوۆ كەڭەس بەردى, – دەپ اڭگىمەسىن ودان ءارى جالعاستىردى ەركەن وماروۆ. – مەن بۇعان قۋانا كەلىستىم. قازىر ەلەكتروۆوز ماشينيستەرىنىڭ بريگاديرىمىن.
ەركەن مارس ۇلى ءجۇرىپ وتكەن ەڭبەك جولىن ولەگ چەرنىشوۆپەن, الەكساندر پەترەنكومەن, الەكساندر تاراتىنكينمەن تىكەلەي بايلانىستىرادى. سەبەبى, اتالعان ازاماتتار جاستارعا قامقورلىق كورسەتىپ, كوپ نارسەگە باۋلىدى. ەركەن وسى كىسىلەرگە ءالى كۇنگە العىسىن جاۋدىرادى.
– ەگەر دە قاراماعىڭدا قىزمەت ىستەيتىن ادامدارمەن ورتاق ءتىل تاپپاساڭ, العاشقى كەزەكتە وزىڭە دە قيىن بولارى ءسوزسىز, – دەيدى ەركەن وماروۆ. – سوندىقتان دا بۇكىل ۇجىمنىڭ قولداۋىنا سۇيەنىپ, ءىستى بايىپپەن شەشكەن ابزال. مەنىڭ قاراماعىمدا بەس ادام ەڭبەك ەتەدى. ولاردىڭ ىشىندە, اسىرەسە, اۋىسىم شەبەرى اندرەي شوروحوۆتىڭ ورنى بولەك. اندرەيمەن كەڭەسۋدىڭ ءوزى ءبىر عانيبەت. ازىرگە بريگادامىز ەسكى تەحنيكامەن جۇمىس ىستەپ ءجۇر. تاياۋداعى ۋاقىتتا ءبىزدىڭ №40 رەلس ۋچاسكەسى تەحنيكالىق قايتا جاراقتاندىرۋدان وتەدى دەپ سەنەمىن.
ەركەن مارس ۇلىنىڭ ەڭبەكتەگى جەتىستىگىن ايەلى اقتورعىن, ۇلى قۋانىش, قىزى شاحيدا ماقتانىش تۇتادى. ال وسىدان ءۇش اي بۇرىن كەنجە قىزى ايجەر دۇنيەگە كەلىپ, قۋانىشتارىن ودان ءارى اسقاقتاتتى.
سەرىك وماروۆ – اعايىندى ۇشەۋدىڭ ەڭ كەنجەسى. ول دا جاستايىنان ءوز ءومىرىن شاحتاداعى جەراستى جۇمىستارىمەن بايلانىستىرۋدى ۇيعارىپتى. №27 مەكتەپتىڭ ون ءبىرىنشى سىنىبىن ءتامامداپ كاسىبي-تەحنيكالىق ۋچيليششەگە جول تارتتى. ونداعى ماقساتى بۇرعىلاۋ قوندىرعىسىنىڭ ءماشينيسى ءارى بۇرعىلاۋشىنىڭ كومەكشىسى ماماندىعىن الۋ ەدى. ول باتىس جەزقازعان كەنىشىنە جۇمىسقا تۇرماستان بۇرىن ەلەكتر سلەسارلارىن دايىندايتىن قىسقا مەرزىمدى كۋرستان دا ءوتىپ الدى.
– مەن №73 شاحتاعا 2002 جىلى جۇمىسقا ورنالاستىم, – دەيدى سەرىك مارس ۇلى. – العاشقىدا TORO-سەرۆيستە سلەسار بولىپ ەڭبەك ەتتىم, سودان كەيىن مونتاجداۋ ۋچاسكەسىنە ەلەكترسلەسار-مونتاجداۋشى بولىپ اۋىستىم. بۇرىن وجاۋى بار تەحنيكاعا قىزمەت كورسەتسەم, قازىر سورعىلاردىڭ قالىپتى جۇمىس ىستەۋىن قاداعالايمىن. ماماندىعىم وزىمە ۇنايدى. ارا-تۇرا كەزدەسىپ قالاتىن قيىندىقتاردى سىرتتان كومەك سۇراماي-اق ەڭسەرىپ تاستايمىن.
TORO-سەرۆيستە قىزمەت ىستەپ جۇرگەن كەزىندە-اق تالاي مارتە ماداقتالدى. ەڭبەكسۇيگىشتىگىمەن كوپتىڭ كوزىنە ءتۇسىپ, العىسقا كەنەلىپ ءجۇردى.
– مەن ءالى دە ىزدەنىس ۇستىندەمىن. ءوز سالامنىڭ ءمانىسى مەن ماعىناسىنا تەرەڭ بويلاۋدى ادەتكە اينالدىردىم. سونىڭ ناتيجەسىندە تاجىريبە جيناقتاپ, كاسىبىمدى شيراتا ءتۇستىم. تاپسىرىلعان مىندەتتى ابىرويمەن اتقارساڭ, ماراپاتتىڭ ءوزى ىزدەپ كەلەرى ءشۇباسىز. ەڭ باستىسى – جۇمىسقا ادالدىق تانىتۋ كەرەك, – دەيدى سەرىك.
قاربالاسقا تولى كەزەكتى جۇمىستان كەيىن سەرىك وماروۆ ۇيىنە اسىعادى. ويتكەنى, وتاعاسىن زايىبى وكسانا داستارقانىن جايىپ, ال قىزى دارينا مەن ۇلدارى دانيل جانە دانيار قۋانىپ توسادى.
– ءوز ءۇيىم – ولەڭ توسەگىم, – دەپ جىميادى سەرىك مارس ۇلى.
اعايىندى ەركەن, ەرمەك جانە سەرىك وماروۆتار قارىنداستارى مەرۋەرتتى قادىرلەپ قۇرمەت تۇتادى. اعالارى ءتارىزدى مەرۋەرت تە باتىس جەزقازعان كەنىشىندەگى №73 شاحتانىڭ قىزمەتكەرى. قازىر ول دەكرەتتى دەمالىستا.
– ساتباەۆ قالاسىنداعى ورتا مەكتەپتىڭ 11-ءشى سىنىبىن ءبىتىرگەننەن كەيىن قازاقستان-رەسەي قازىرگى زامانعى گۋمانيتارلىق ۋنيۆەرسيتەتىنە ينفورماتيكا ماماندىعى بويىنشا وقۋعا ءتۇسۋگە قۇجات تاپسىردىم, – دەيدى مەرۋەرت. – الايدا وقۋدى اياقتاعان سوڭ №55 شاحتادا جۇمىس ىستەۋگە بەل بۋدىم. ءسويتىپ, جارىق ءتۇسىرۋشى بولىپ ورنالاستىم.
مەرۋەرت وماروۆا ءوز كاسىبىنىڭ قىر-سىرىن جەتىك مەڭگەرۋگە مامانداندىرىلعان كۋرستا وقىپ قول جەتكىزدى. مەرۋەرتتىڭ تولىسۋىنا ناتاليا بەككەر باي تاجىريبەسىمەن ءبولىسىپ, بىلىگىن ۇشتادى. دەگەنمەن, ءومىر ءبىر ورنىندا تۇرمايدى. ءوزگەرىستەر بولىپ جاتاتىنى بەلگىلى.
– مەن قاشاندا ادامدارمەن ارقا-جارقا ارالاسۋدى ۇناتامىن. ءارى جۇمىس ورنىمدى وزگەرتۋدى ۇيعاردىم, – دەيدى مەرۋەرت. – سونىمەن, №73 شاحتاعا اۋىسىپ, جانار-جاعارماي تاراتۋشى وپەراتور تىزگىنىن ۇستادىم. ماعان بۇل جۇمىستا جۇماكۇل ايتباەۆانىڭ شاراپاتى كوپ ءتيدى.
مەرۋەرت قازىر جۇبايى الماتپەن بىرگە ارۋجان جانە ايجان ەسىمدى قوس قىزىن ءتاربيەلەپ, قىزىقتارىنا قانىپ ءجۇر. تاياۋدا سۇيىكتى جۇمىسىنا ورالماق.
ساتباەۆ – كەنشىلەر قالاسى, ال جەزقازعان – مەتاللۋرگتەر قالاسى. جالپى العاندا, وڭىردە وماروۆتار سەكىلدى ونداعان تاتۋ-ءتاتتى ەڭبەك اۋلەتتەرى بار. ولاردىڭ اتالارى مەن اكەلەرى كەزىندە جەزقازعان ءوڭىرىنىڭ ءوسىپ-وركەندەۋىنە سۇبەلى ۇلەستەرىن قوسقانى ءشۇباسىز. قوس قالانىڭ قالىپتاسۋىنا سىڭىرگەن ەڭبەكتەرى ەرەكشە. مىنە, قازىرگى تاڭدا سول ساڭلاقتاردىڭ ۇرپاقتارى كەنشىلەردىڭ داڭقتى ءداستۇرىن لايىقتى جالعاستىرۋدا. جۇپتارى جاراسىپ, اتاكاسىپ ساباقتاستىعىن ۇزبەگەن اعايىندى وماروۆتاردىڭ بۇگىنگى قاجىرلى ەڭبەكتەرى سونىڭ ناقتى كۋاسى.
سۆەتلانا گۋمبولدت.
قاراعاندى وبلىسى,
ساتباەۆ قالاسى.
––––––––––––––––––
سۋرەتتى تۇسىرگەن
ءالينا جۇماشەۆا.