بەيسەنبى, 7 اقپان 2013 7:35
«قازاقتۇرىكمۇناي» جشس ەڭبەك پەن الەۋمەتتىك پارىزعا ادالدىقتىڭ ۇلگىسىن تانىتىپ كەلەدى
جۋىقتا ەلىمىزدىڭ مۇناي-گاز سالاسىنا ينۆەستيتسيا تارتىپ, شەتەلدىكتەرمەن بىرلەسكەن كاسىپورىن قۇرۋدىڭ العاشقى قارلىعاشى سانالاتىن «قازاقتۇرىكمۇناي» جشس-ءنىڭ قۇرىلعانىنا 20 جىل تولدى. وسى ماسەلەگە وراي اتالعان كاسىپورىننىڭ باس ديرەكتورى نۇرپەيىس ماقاشەۆتى اڭگىمەگە تارتتىق.
بەيسەنبى, 7 اقپان 2013 7:35
«قازاقتۇرىكمۇناي» جشس ەڭبەك پەن الەۋمەتتىك پارىزعا ادالدىقتىڭ ۇلگىسىن تانىتىپ كەلەدى
جۋىقتا ەلىمىزدىڭ مۇناي-گاز سالاسىنا ينۆەستيتسيا تارتىپ, شەتەلدىكتەرمەن بىرلەسكەن كاسىپورىن قۇرۋدىڭ العاشقى قارلىعاشى سانالاتىن «قازاقتۇرىكمۇناي» جشس-ءنىڭ قۇرىلعانىنا 20 جىل تولدى. وسى ماسەلەگە وراي اتالعان كاسىپورىننىڭ باس ديرەكتورى نۇرپەيىس ماقاشەۆتى اڭگىمەگە تارتتىق.
– نۇرپەيىس ماقاش ۇلى, ەل تاۋەلسىزدىگىنىڭ, ونىڭ دەربەس ساياسي جانە ەكونوميكالىق سۋبەكت رەتىندە شەتەلدەرمەن ءوزارا ءتيىمدى قارىم-قاتىناس ورناتۋىنىڭ ءتولتۋماسى رەتىندە ومىرگە كەلگەن ءسىزدىڭ كاسىپورىننىڭ قۇرىلعانىنا 20 جىل تولىپ وتىر ەكەن. ءسىز باسقارعان ۇجىمدى وسى مەرەيلى مەرەكەلەرىڭىزبەن قۇتتىقتايمىز. وسى 20 جىل ىشىندە كاسىپورىن قانداي جۇمىستاردى جۇزەگە اسىردى؟ وسىعان توقتالا كەتسەڭىز.– ءبىزدىڭ كاسىپورىننىڭ قۇرىلۋىنا ەلباسىمىز نۇرسۇلتان نازارباەۆتىڭ باۋىرلاس تۇرىك ەلىمەن تاۋەلسىزدىگىمىزدىڭ العاشقى ساتىندە-اق ىنتىماقتى قارىم-قاتىناس ورناتۋى سەبەپ بولعاندىعىن ايتا كەتۋىمىز پارىز. ەكى ەل باسشىلىعىنىڭ بارىس-كەلىس جاساپ, ەكونوميكالىق مۇددەلەرىمىزدىڭ ءتيىمدى نۇكتەلەرىن ايقىنداۋىنىڭ ناتيجەسىندە ءبىزدىڭ ەلىمىزدىڭ گەولوگيا جانە جەر قويناۋىن قورعاۋ مينيسترلىگى مەن تۇرىك ۇلتتىق كومپانياسى اراسىندا 1993 جىلدىڭ 9 قاڭتارى كۇنى بىرلەسكەن كاسىپورىن قۇرۋ تۋرالى كەلىسىم-شارتقا قول قويىلعان ەكەن. ءسويتىپ, ءبىزدىڭ ەلىمىزدە مۇناي بيزنەسى سالاسىنداعى قۇرىلعان تۇڭعىش بىرلەسكەن كاسىپورىن رەتىندە «قازاقتۇرىكمۇناي» جشس 1993 جىلدىڭ 4 اقپانىندا اتالعان مينيسترلىكتىڭ ەسەبىندە №1 حاتتاما بويىنشا تىركەۋدەن وتكەن. مۇنىڭ ءوزى «قازاقتۇرىكمۇناي» جشس-ءنىڭ ەلىمىزدىڭ مۇناي-گاز سالاسىندا قۇرىلعان ءبىرىنشى بىرلەسكەن كاسىپورىن ەكەندىگىن دالەلدەيتىن قۇجات.1997 جىلدان باستاپ قازاقستان تاراپىنان كاسىپورىن قۇرىلتايشىسى بولىپ «قازاقويل» ۇلتتىق مۇناي كومپانياسى بەلگىلەنسە, قازىرگى كۇنى بۇل ءمىندەتتى «قازمۇنايگاز» ۇك» اق اتقارىپ كەلەدى. كاسىپورىننىڭ اكتسيالارى پاكەتىنىڭ 51 پايىزى قازاقستان جاعىندا, 49 پايىزى تۇرىك ەلىنە تيەسىلى. ياعني, باسقارۋ تىزگىنى قازاقستاننىڭ قولىندا دەپ ايتۋعا بولادى.بىرلەسكەن كاسىپورىننىڭ ءبىرىنشى باس ديرەكتورى باقتىقوجا ىزمۇحامبەتوۆ ونى قۇرىپ قالىپتاستىرۋدا ەلەۋلى جۇمىستاردى جۇزەگە اسىردى. مۇنان كەيىن ونى نۇرلان نوعاەۆ باسقاردى. وسى ەكى ازامات تا قازىرگى كۇنى وبلىستاردى باسقارۋدا. وسىعان قاراپ-اق بىرلەسكەن كاسىپورىننىڭ جۇمىسى كادرلار ءۇشىن شىڭدالۋ مەكتەبى بولعاندىعىن اڭعارۋعا بولادى.جاسالعان كەلىسىم-شارتقا سايكەس كاسىپورىننىڭ الدىنا ەلىمىزدىڭ باتىس وڭىرلەرىندە مۇناي قورلارىن ىزدەستىرۋ جانە بارلاۋ جۇمىستارىن جۇرگىزۋ, اشىلعان كەن ورنىن وندىرىستىك تۇرعىدان يگەرىپ, ەكونوميكالىق پايدا اكەلۋ مىندەتى جۇكتەلگەن. وسى ىسكە جۇمسالاتىن شىعىنداردى تۇرىك جاعى ءوز موينىنا الىپ, كاسىپورىندى قارجىلاندىرۋ ءۇشىن 270 ملن. دوللار ينۆەستيتسيا سالعان. بۇل شىعىنداردى مۇنايدى يگەرگەن كەزدە تۇسەتىن پايدا ەسەبىنەن قايتارۋ كوزدەلگەن.«قازاقتۇرىكمۇناي» جشس مۇنايدى ىزدەستىرۋ جۇمىستارىن باتىس قازاقستاننىڭ 4 وبلىسىنىڭ (اقتوبە, باتىس قازاقستان, اتىراۋ جانە ماڭعىستاۋ وبلىستارى) 25,9 مىڭ شارشى شاقىرىمدى قامتيتىن 45 بارلاۋ الاڭىندا جۇرگىزدى. ولاردىڭ 14 الاڭىنان وڭ ناتيجەلەر بايقالىپ, بەلگىلى بولعان كومىرسۋتەك قورلارى مەملەكەتتىك ەسەپكە ەنگىزىلدى. وسى كەزەڭدە بىرلەسكەن كاسىپورىننىڭ قۇرىلۋى كوپتەگەن ەڭبەك ۇجىمدارىن ساقتاپ قالۋعا جانە بۇرىن باستالعان مەملەكەتتىك گەولوگيالىق باعدارلامالاردىڭ ۇشتاسىپ ورىندالۋىنا مۇمكىندىك تۋعىزدى. ويتكەنى, كاسىپورىن تاپسىرىستارى بويىنشا ءبىرقاتار مەردىگەر مەكەمەلەر جۇمىستار جۇرگىزدى.قازىرگى كۇنى كاسىپورىن اقتوبە وبلىسىنداعى لاقتىباي جانە وڭتۇستىك قاراتوبە كەن ورىندارىندا مۇنايدا ونەركاسىپتىك ءوندىرۋ جۇمىستارىن جۇرگىزىپ كەلەدى. سونىمەن قاتار, ماڭعىستاۋ وبلىسىنىڭ باتىس ەلەمەس, شىعىس سازتوبە, وڭتۇستىك-شىعىس سازتوبە, سولتۇستىك-شىعىس سازتوبە كەن ورىندارىندا ونەركاسىپتىك وڭدەۋ جۇمىستارىن قولعا الىپ وتىر. ءوزى قۇرىلعان ۋاقىتتاردان بەرى جيىنى 3 ملن. 780 مىڭ توننادان استام مۇناي ءوندىردى.تۇرىك تاراپىنان سالىنعان ينۆەستيتسيانى كەرى قايتارۋ 2000 جىلدان باستالدى جانە ءوندىرىستى بۇدان ءارى دامىتۋعا ءوز قاراجاتى ەسەبىنەن قارجى سالا باستادى. وتكەن جىلدىڭ سوڭىنداعى مالىمەت بويىنشا ينۆەستيتسيا بويىنشا قارىز 57 ملن. دوللاردى قۇراپ وتىر. بۇل قارىزدى كەشىكتىرمەي وتەيتىندىگىمىزگە سەنىم زور.قازىرگى كۇنى كاسىپورىندا 400 ادام ەڭبەك ەتەدى. ەگەر ولاردىڭ وتباسىندا 5 ادام بار دەپ ەسەپتەگەننىڭ وزىندە كاسىپورىنىمىز 2000 ادامنىڭ تۇرمىس جاعدايىنا تىكەلەي ىقپال ەتەدى ەكەن. مۇنىڭ سىرتىندا بيۋدجەتكە تولەيتىن سالىعىمىز, ءوزىمىز ەڭبەك ەتەتىن وڭىرلەرگە كورسەتەتىن دەمەۋشىلىك كومەگىمىز, باسقا دا كاسىپورىندارعا بەرەتىن تاپسىرىستارىمىز بار. وسىلاردىڭ ءبارىنىڭ باسىن قوساتىن بولساق, كاسىپورىن ءوزىنىڭ 20 جىلدىق تاريحىندا ونداعان مىڭ ادامنىڭ تۇرمىسىن تۇزەتۋىنە ىقپال ەتكەندىگىن بايقاۋعا بولادى. ياعني, ول وزىنە جۇكتەلگەن مىندەتتى بارىنشا ادال جانە جۇيەلى جۇزەگە اسىرۋ ۇستىندە.– كاسىپورىندى سوڭعى 6 جىلدان بەرى ءسىز باسقارىپ كەلەسىز. وسى 6 جىلدا مۇنداعى مۇنايشىلاردىڭ الەۋمەتتىك جاعدايىن جاقسارتۋدا ۇلكەن جۇمىستاردىڭ جۇزەگە اسىرىلعاندىعىنا, مۇنىڭ سىرتىندا كاسىپورىن ەڭبەك ەتكەن وڭىرلەردە ءىرى-ءىرى الەۋمەتتىك جوبالار جۇزەگە اسىپ, حالىقتىڭ كوزايىمىنا اينالعاندىعىنا كۋا بولىپ وتىرمىز. سونىڭ ءبىر جارقىن دالەلى «قازاقتۇرىكمۇناي» جشس-ىنە 2011 جىلى ەلباسىنىڭ «پارىز» سىيلىعىنىڭ بەرىلۋى بولىپ تابىلادى. وسى تۋرالى اشىپ اڭگىمەلەي كەتسەڭىز.– «قازاقتۇرىكمۇناي» جشس-ىنە كەلگەنگە دەيىن دە تالاي باسشىلىق قىزمەت اتقاردىق. اتىراۋ قالاسىنىڭ اكىمى, وبلىس اكىمىنىڭ ورىنباسارى, «ەمبىمۇنايگاز» وندىرىستىك فيليالىنىڭ ديرەكتورى, پارلامەنت ءماجىلىسىنىڭ دەپۋتاتى سەكىلدى قىزمەتتەردە بولدىق. ەلمەن ارالاسا ءجۇرىپ, ەڭبەك ەتكەندەگى ءبىر بايقاعانىم ەگەر باسشى ادام الەۋمەت قامىن دۇرىس ويلاپ, وزىمبىلەمگە سالىنباي, كوپ ماسەلەنى ۇجىممەن اقىلداسىپ وتىرىپ شەشەتىن بولسا, ونىڭ ءىسى ءونىمدى بولماق.وسى كاسىپورىنعا باس ديرەكتور بولىپ تاعايىندالعاننان كەيىن ۇجىم جاعدايىمەن جەتە تانىسۋ ءۇشىن كاسىپورىننىڭ باسشىلىق قۇرامىن بىرگە ەرتىپ الىپ, ءوندىرىستىڭ باسىندا بولىپ, مۇنايشىلارمەن بىرنەشە كەزدەسۋ جاسادىم. وندا كاسىپورىننىڭ الدىندا تۇرعان مىندەتتەرى تۋرالى ايتىلىپ, سول مىندەتكە قول جەتكىزۋ ءۇشىن ۇجىمعا قانداي جاعداي كەرەگى جان-جاقتى ءسوز بولدى.وسى ساپارلاردىڭ قورىتىندىسىندا ءبىز قازاقستاندا العاشقىلاردىڭ ءبىرى بولىپ كاسىپورىنداعى جۇمىسشىلارمەن ۇجىمدىق الەۋمەتتىك كەلىسىم-شارت جاساسۋ ءىسىن قولعا الدىق. وسى شارت بويىنشا ۇجىمداعى بارلىق ەڭبەككەرلەرگە كورسەتىلەتىن الەۋمەتتىك جاردەم پاكەتتەرىنىڭ توپتاماسىن جاساپ ۇسىندىق. وندا جۇمىسشىلاردى تەگىن مەديتسينالىق ساقتاندىرۋدان باستاپ, ولاردىڭ ەڭبەك جانە تۇرمىس جاعدايىنا اسەر ەتەتىن باسقا دا بىرقاتار جەڭىلدىكتەر قاراستىرىلدى.مۇنىڭ سىرتىندا كاسىپورىندا ەڭبەك ەتكەن ادامداردىڭ جالاقىلارىن ءار جىل سايىن 10 پايىزعا ءوسىرىپ وتىرۋ ءداستۇرىن ەنگىزدىك. ءسويتىپ, سوڭعى 5 جىلدىڭ وزىندە عانا جۇمىسشىلاردىڭ جالاقىلارى 50 پايىزعا ءوسىپ وتىر. مۇنىڭ سىرتىندا ادامنىڭ كاسىپورىندا ىستەگەن ەڭبەك وتىلىنە بايلانىستى ۇستەمە تاعى قوسىلادى. ماسەلەن, ءبىزدىڭ كاسىپورىندا ەڭبەك ەتكەن ءار جىلىنا 1 پايىزدان قوسىپ وتىرامىز. ەگەر 10 جىل ەڭبەك ەتەتىن بولسا 10 پايىز ۇستەمە الادى. بۇل ۇستەمەنى 30 پايىزعا دەيىن وسىرۋگە بولادى.ءبىزدىڭ كاسىپورنىمىز سونشاما ۇلكەن ەمەس, بار-جوعى 400 ادام ەڭبەك ەتەدى. بىراق, كاسىپورىن جۇمىسشىلارىنا ءبىزدىڭ جاساپ وتىرعان قامقورلىعىمىز مۇناي الپاۋىتتارىنىكىنەن كەم ەمەس. وسىنى ۇجىم مۇشەلەرى دۇرىس باعالاپ كەلە جاتىر دەپ ەسەپتەيمىن.ايتا كەتەرلىك ءبىر ماسەلە, ءبىزدىڭ كومپانيادا بىردە-ءبىر ادام جۇمىستان قىسقارعان ەمەس. قايتا ءوندىرىستى كەڭىتۋ نەگىزىندە جاڭا ادامداردى جۇمىسقا قابىلداۋدى ويلاستىرامىز. ماسەلەن, مەن كەلگەن كەزدە بۇل ۇجىمدا 379 ادام ەڭبەك ەتىپ جاتىر ەكەن. قازىر ولاردىڭ سانى, جوعارىدا ايتقانىمىزداي, 400 ادامعا جەتىپ وتىر.مىنە, وسىنداي جاعدايلاردىڭ بارلىعى ۇجىمنىڭ تۇراقتىلىعىنا, ەڭبەك داۋلارىنىڭ بولماۋىنا قولايلى اسەر ەتۋدە.ەكىنشى ءبىر ايتا كەتەر دۇنيە, كاسىپورىن مۇناي سالاسىندا قىزمەت ەتەتىن بولعاندىقتان, ونىڭ اسەرىن جەرگىلىكتى حالىق تا سەزىنۋى ءتيىس. «قۇزعىن باۋىرىنا باسىپ جەيدى, سۇڭقار شاشىپ جەيدى» دەپ ايتىلعانداي, ءوز جەرلەرىنەن شىعىپ جاتقان مۇناي مەن گازدىڭ يگىلىگىن جەرگىلىكتى حالىق جاقسى سەزىنگەن جاعدايدا عانا ول ورتامەن تولىق تۇسىنىستىك ورناتۋعا بولادى دەپ ەسەپتەيمىن.مىنە, وسىنداي ماقساتتاردى العا قويا وتىرىپ, بايعانين اۋدانىنداعى وڭتۇستىك قاراتوبە كەن ورنىنا جاقىن ماڭدا ورنالاسقان جارقامىس اۋىلىنىڭ حالقىن تەگىن گازبەن جابدىقتاۋ ءىسىن قولعا الدىق. وسى ءۇشىن وڭتۇستىك قاراتوبە مەن جارقامىس اۋىلىنىڭ اراسىنداعى 5 شاقىرىمدىق قاشىقتىققا ديامەترى 159 مم-ءدى قۇرايتىن قۇبىر ورناتىلدى. وڭتۇستىك قارا توبەدەن ەلەكتر ەنەرگياسىن وڭدەۋ ءۇشىن گاز پورشەندى ەلەكتر ستانساسى سالىندى. جارقامىس اۋىلىنداعى قوسالقى ستانسا قايتا جاڭعىرتىلدى. باسقا دا جۇمىستار جۇزەگە استى. ءسويتىپ سوڭعى 5 جىلدان بەرى جارقامىس اۋىلىنىڭ تۇرعىندارى ءبىزدىڭ كاسىپورىن وندىرەتىن گازدى تەگىن پايدالانۋ مۇمكىندىگىنە يە بولىپ وتىر.مۇنىڭ سىرتىندا گاز جابدىقتاۋ جۇيەسىنىڭ اۋىل ىشىندەگى قۇرىلىسى ءۇشىن بايعانين اۋداندىق اكىمدىگىنە قوسىمشا 3 745 500 تەڭگە كولەمىندە دەمەۋشىلىك كومەك كورسەتىلدى. 2011 جىلدىڭ قىركۇيەك ايىنان باستاپ ماڭعىستاۋ وبلىسىنداعى كەن ورىندارىندا دا لەسپە گازدى كادەگە جاراتۋ جۇيەسى پايدالانۋعا بەرىلدى.بۇل جۇمىستىڭ تاعى ءبىر قىرى بۇرىن الاۋ بوپ جانىپ تۇراتىن ىلەسپە گازدى كادەگە جاراتۋ ەلىمىزدىڭ ەكولوگياسىنا دا اسەرى بار. قازىرگى ۋاقىتتا ۇكىمەتتىڭ مۇناي سالاسىنداعى كومپانيالارعا قوياتىن ۇلكەن ءبىر تالابى كەن ورىندارىندا لەسپە گاز ارقىلى جانىپ تۇرعان الاۋلاردى ءسوندىرىپ, ونى وڭدەپ, ىسكە جاراتۋ بولىپ تابىلادى. مىنە, ءبىز وسى ىسپەن تولىق كولەمدە شۇعىلدانۋ ۇستىندەمىز. وسىعان بايلانىستى گاز قۇبىرلارى تارتىلىپ, كومپرەسسورلىق ستانسالار سالىنۋدا. قازىرگى كۇنى جۇرگىزىلگەن جۇمىستاردىڭ ناتيجەسىندە ەلىمىزدىڭ ىشكى رىنوگىنداعى تۇتىنۋشىلاردىڭ قاجەتتىلىگىن وتەۋ ءۇشىن وسى ماقساتتاعى «قازترانسگازايماق» اق-تىڭ گاز تاسىمالداۋ جۇيەسىنە قۇرعاق گاز بەرۋ جۇمىستارىن جۇزەگە اسىرۋ ۇستىندەمىز. بۇل جونىندەگى وندىرىستىك كورسەتكىشىمىز جىلدان-جىلعا قارقىندى تۇردە ارتۋ ۇستىندە. ماسەلەن, 2011 جىلى بەرىلگەن گاز كولەمى 7,6 ملن. تەكشە مەتردى قۇراسا, وتكەن جىلى 55 ملن. تەكشە مەتر بولدى. ال بيىلعى جىلعى كولەمدى 75 ملن. تەكشە مەترگە جەتكىزۋدى جوسپارلاپ وتىرمىز. اتالعان ىسكە 25 ملن. 858 مىڭ اقش دوللارىن جۇمسادىق.ءسويتىپ, ءبىزدىڭ كاسىپورىن قازاقستاندا ءبىرىنشى بولىپ ىلەسپە گازدى كادەگە جاراتۋ باعدارلاماسىن جۇزەگە اسىردى. ءبىزدىڭ بۇل جونىندەگى كورسەتكىشىمىز 95 پايىزعا دەيىن جەتىپ وتىر.– كومپانيادا باسقا قانداي الەۋمەتتىك جوبالار جۇزەگە اسىرىلۋدا؟– ونىڭ ءبارىن ايتا بەرسەك, ماقتانعانداي بولارمىز. بىراق, ءسىز سۇراپ وتىرعان سوڭ بىرقاتارىنا توقتالا كەتەيىن. كومپانيا قۇرىلعان كەزدەگى «قازاقتۇرىكمۇناي» جشس مەن ينۆەستيتسيالار جونىندەگى اگەنتتىك اراسىندا جاسالىنعان كەلىسىمگە سايكەس اقتوبە وبلىسىنداعى ينفراقۇرىلىمداردى دامىتۋ ءۇشىن وڭىرگە جىل سايىن 100 مىڭ اقش دوللارى كولەمىندە قارجى بەرىلىپ كەلەدى. بۇل قارجى ۇلى وتان سوعىسى ارداگەرلەرىن باسپانامەن قامتۋعا, بوبەكتەرگە بالالار باقشالارىن سالۋعا, الەۋمەتتىك ورىندار مەن اۋىل تۇرعىندارىن گازبەن قامتاماسىز ەتۋگە جۇمسالادى.مۇنىڭ سىرتىندا 1996 جىلى ماڭعىستاۋ وبلىسىنىڭ اقتاۋ قالاسىندا ۇزاق جىلدار مۇناي-گاز سالاسىندا ەڭبەك ەتكەندەر مەن ۇلى وتان سوعىسىنىڭ ارداگەرلەرىنە 78 پاتەردى سىيعا تارتتىق. 2010 جىلى وسى وبلىستىڭ بەينەۋ اۋدانىنداعى بۇرانقۇل اۋىلىندا العاشقى مەديتسينالىق كومەك ورتالىعىنىڭ قۇرىلىسىن جۇرگىزۋگە 8 ميلليون تەڭگە قارجى بەردىك. اتىراۋ قالاسىنداعى سپورتتىق ساۋىقتىرۋ كەشەنىن, گەولوگ كەنتىندەگى جىلۋ ورتالىعىن قايتا جوندەۋ, بالاباقشا, وقۋ كومبيناتى عيماراتتارىن جوندەۋ جۇمىستارى جۇرگىزىلدى. ماڭعىستاۋ اۋدانى, وڭدى اۋىلىنداعى ورتا مەكتەپكە كىتاپحانا سىنىبى جاساقتالىپ بەرىلدى. باسقا دا كوپتەگەن الەۋمەتتىك شارالاردى جۇزەگە اسىرۋعا دەمەۋشىلىك كومەكتەر كورسەتۋدەمىز.– وسىنداي ەڭبەكتەرىڭىز ەل كولەمىندە لايىقتى باعالانىپ كەلە جاتقاندىعىن ەستىدىك. پرەزيدەنتتىڭ «پارىز» سىيلىعىنا يە بولدىڭىزدار. 20 جىلدىق مەرەكە قارساڭىندا ەلباسىمىز ارنايى حات جولداپ, قۇتتىقتاعان ەكەن. باسقا دا الىپ جاتقان ماراپاتتارىڭىز بار شىعار؟– ارينە, جوق دەپ اۋىز ءسۇرتۋگە كەلمەس. كومپانيامىزدىڭ ەل يگىلىگى جولىندا جۇرگىزگەن جۇمىستارى وتاندىق, الەمدىك دەڭگەيدە وڭ باعاسىن الۋدا. ماسەلەن, 1999 جىلى فرانتسيانىڭ ۇلتتىق ونەركاسىپتى قولداۋ اسسوتسياتسياسىنىڭ «التىن» ءجۇلدەسىن جەڭىپ الدىق. 2008 جىلى ەكونوميكا سالاسىنداعى ءتيىمدى ىنتىماقتاستىقتى نىعايتقانىمىز ءۇشىن رەسەي دۋماسىندا وتكەن ارنايى شارادا «زۆەزدا سودرۋجەستۆا» ديپلومىمەن ماراپاتتالدىق. ال «ۇزدىك الەۋمەتتىك جىل جوباسى» نوميناتسياسى بويىنشا بىزگە ەلباسىنىڭ «پارىز» سىيلىعىنىڭ بەرىلۋى – ءبىزدىڭ جۇمىسىمىز ءۇشىن بەرىلگەن ۇلكەن باعا.تۇپتەپ كەلگەندە, ءبىزدىڭ نەگىزگى ماقساتىمىز كومپانيانىڭ الدىنا قويىلعان نەگىزگى مىندەتتەردى جۇزەگە اسىرۋ ارقىلى ەل ەكونوميكاسىنىڭ دامۋىنا لايىقتى ۇلەس قوسۋ. ەگەر جۇمىس ونىكتى بولسا, تۇرمىس تا جايلى بولاتىندىعى اقيقات. كومپانيامىز بۇل قاعيداتتى جىل وتكەن سايىن دالەلدەۋ ۇستىندە. حالقىمىزدىڭ «ەڭبەك ەتسەڭ – ەمەرسىڭ» دەپ ايتقانىنداي, وسى ەڭبەكتىڭ ارقاسىندا كومپانيا جۇمىسشىلارىنىڭ الەۋمەتتىك جاعدايى جاقسارىپ كەلەدى. وسى ماسەلەنى مەن ۇزدىكسىز قاداعالاپ وتىرامىن. كومپانيانىڭ جاۋاپتى قىزمەتكەرلەرى ايىنا ەكى رەت ايماقتاعى جۇمىسشىلارمەن كەزدەسۋگە بارادى. كومپانيا جۇمىس جاسايتىن وڭىرلەر حالقىنىڭ الەۋمەتتىك جاعدايىن جاقسارتۋعا دا ۇزدىكسىز ۇلەس قوسۋ ۇستىندەمىز.قىسقاسىن ايتقاندا, ءوزىمىزدىڭ 20 جىلدىق مەرەكەمىزگە ەشقانداي ءبىر ايعاي-شۋسىز, ىڭ-شىڭسىز ەڭبەك پەن تۇرمىستا ورلەۋ ۇستىندە جەتتىك. وسىعان شۇكىر دەيمىز.اڭگىمەلەسكەن سۇڭعات ءالىپباي,«ەگەمەن قازاقستان».