قاسىم-جومارت توقاەۆ مادەنيەت جانە سپورت ءمينيسترى اقتوتى رايىمقۇلوۆانى قابىلدادى, دەپ حابارلادى پرەزيدەنتتىڭ ءباسپاسوز قىزمەتى.
مەملەكەت باسشىسىنا مينيسترلىكتىڭ اتقارىپ جاتقان قازىرگى قىزمەتى جانە ورتا مەرزىمدى جوسپارى جونىندە مالىمەت بەرىلدى.
قازاقستان پرەزيدەنتى جاڭا مينيسترگە زاڭنامالار مەن نورماتيۆتىك-قۇقىقتىق بازانى ودان ءارى جەتىلدىرۋ, سونداي-اق «رۋحاني جاڭعىرۋ» جانە «كيەلى قازاقستان» باعدارلامالارىن, تۋريزم, سپورت, مادەنيەت جانە ءتىل ساياساتى سالالارىنداعى جوبالاردى ىسكە اسىرۋ جونىندە بىرقاتار مىندەت قويدى.
سونىمەن قاتار قاسىم-جومارت توقاەۆ مادەنيەت جانە سپورت قايراتكەرلەرىنىڭ الەۋمەتتىك تۇرمىس جاعدايىن جاقسارتۋ, جەرگىلىكتى اتقارۋشى ورگاندارمەن جانە بيزنەس-قۇرىلىمدارمەن ءوزارا ىقپالداستىقتى نىعايتۋ بويىنشا جۇمىستاردى جانداندىرۋ قاجەتتىگىن ايتتى.