جۇما, 3 مامىر 2013 2:51
قىزىلوردادا وزەكتى ماسەلەگە اينالىپ تۇر
جەردىڭ داۋىن قازاق قاشاننان جوعارى قويعان. قارىس سۇيەم جەر ءۇشىن تالاس بىزدە ەجەلدەن بار. سونداي تالاستىڭ تالايى بۇگىندە قىزىلوردانىڭ توڭىرەگىنەن دە تابىلىپ قالادى. سوندىقتان دا, وبلىستىق پروكۋراتۋرا جاقىندا وتكىزگەن القا ءماجىلىسىن وسى ءبىر عانا ماسەلەگە ارنادى.
جۇما, 3 مامىر 2013 2:51
قىزىلوردادا وزەكتى ماسەلەگە اينالىپ تۇر
جەردىڭ داۋىن قازاق قاشاننان جوعارى قويعان. قارىس سۇيەم جەر ءۇشىن تالاس بىزدە ەجەلدەن بار. سونداي تالاستىڭ تالايى بۇگىندە قىزىلوردانىڭ توڭىرەگىنەن دە تابىلىپ قالادى. سوندىقتان دا, وبلىستىق پروكۋراتۋرا جاقىندا وتكىزگەن القا ءماجىلىسىن وسى ءبىر عانا ماسەلەگە ارنادى.
ءبىر جيىننىڭ وزىندە-اق سىر بويىنداعى باستى قالادا جەرگە قاتىستى ماسەلەنىڭ قانشالىقتى ۋشىعىپ تۇرعانى بايقالىپ قالدى. ونداعى ەڭ ءبىر ەكشەپ وتەتىن تۇس – قالا اكىمدىگىنىڭ 2011 جىلعى 4 قازاندا 1997-2005 جىلدار ارالىعىنداعى جەرگە بايلانىستى وتىنىشتەردى ەسەپكە الۋ جۋرنالىن جويىپ جىبەرگەنىنەن كورىنىس بەرەدى. سونىڭ سالدارىنان مۇندا جەر ۋچاسكەسىن تابىستاۋ كەزەكتىلىگى تۇسىنىكسىز حالگە جەتكەن. ال اكىمدىك ءالى كۇنگە 2004 جىلعا دەيىنگى كەزەكتە تۇرعاندار ءتىزىمىن قۇراي الماي كەلەدى.
وبلىس پروكۋراتۋراسى سونداي-اق, جەرگىلىكتى اتقارۋشى ورگاندار تاراپىنان مەملەكەت مۇقتاجىنا جەرلەردى الۋ بارىسىندا ونىڭ نەگىزدىلىگى مەن تيىمدىلىگىنە باعا بەرىلمەي, تيىسىنشە مەملەكەت قاراجاتىنىڭ نەگىزسىز جۇمسالۋىنا باعىتتالعان شەشىمدەر قابىلداناتىنىن دا انىقتادى. اتاپ ايتقاندا, اكىمدىك 2008 جىلعى 28 قاراشاداعى قاۋلىسىمەن قاراتوعاي كوشەسى, №36 ءۇيدىڭ استىندا ورنالاسقان جالپى كولەمى 0,1 گا جەر ۋچاسكەسىن ۇستىندەگى ۇيىمەن بىرگە 5 440 400 تەڭگەگە مەملەكەت مۇقتاجى ءۇشىن ساتىپ العانىمەن, ونى مۇلدەم بۇل ماقساتتا پايدالانباعان بولىپ شىقتى. سوعان قاراماستان, ول قالالىق پروكۋراتۋراعا بەرگەن انىقتاماسىندا اتالعان جەر ۋچاسكەسىندە ورنالاسقان تۇرعىن ءۇي قۇرىلىسىنىڭ بۇزىلىپ, جەر ۋچاسكەسى بوساتىلعانىن جانە مەملەكەتتىك جەر قورىنا قايتارىلعانىن اتاپ كورسەتكەن. بۇعان قوسا, اتالمىش ءۇيدىڭ يەسى ءالى دە ن.بازارباەۆ بولىپ تابىلاتىنى تۋرالى جالعان مالىمەت بەرگەن.
تەكسەرۋ بارىسىندا جەرگىلىكتى اتقارۋشى ورگانداردىڭ ءبىر ازاماتقا ەكى رەت جەر ۋچاسكەلەرىن بەرگەن دەرەكتەرى دە ايعاق بولدى. مۇندايلاردىڭ قاتارى ارتىق-كەمى جوق 57 ادام ەكەن. سونىمەن قاتار, قالا اۋماعىندا باس جوسپارعا سايكەس كەلمەيتىن جەر ۋچاسكەلەرى دە بەرىلىپ كەتكەن. مۇنىڭ ءبىر ايقىن دەرەگىن بوكەيحان – سۇلتان بەيبارىس كوشەلەرى ارالىعىنداعى قالاىشىلىك ماگيسترالدى جول سالۋ جوسپارىنا كىرگەن اۋماقتان جۇرتقا جەر بەرىلىپ كەتۋىنەن دە كورۋگە بولادى.
جالپى, اكىمدىك 2012 جىلى جەكە جانە زاڭدى تۇلعالارمەن جەر ۋچاسكەلەرىن ساتىپ الۋ-ساتۋ تۋرالى بارلىعى 152 شارت جاساسقان. الايدا, وسىنىڭ نەگىزىندە بەرىلگەن جەر ۋچاسكەلەرىنىڭ 64-ءىنىڭ قارجىسى ۋاقتىلى تولەنبەگەندىكتەن, مۇنىڭ قارىزى 101 911 028 تەڭگەگە ءبىر-اق جەتكەن. ءدال وسىنداي زاڭ بۇزۋشىلىقتار قارماقشى اۋدانىندا دا ورىن العان. بۇدان باسقا, قالالىق اكىمدىكتە 2012 جىلى جالپى جەر ماسەلەسىنە قاتىستى جەكە تۇلعالاردان تىركەلگەن وتىنىشتەردىڭ 200-دەن استامى سوزبالاڭعا سالىنعانى بەلگىلى بولدى. مىسالى, «مەليوراتور» جشس-نىڭ 2012 جىلعى 28 مامىرداعى ويىن-ساۋىق كەشەنىن سالۋ ءۇشىن جەر ۋچاسكەسىن سۇراعان ارىزىنا جاۋاپتى جەرگىلىكتى بيلىك 6 اي 21 كۇنگە كەشىكتىرىپ بەرگەن. وسى تەكتەس زاڭ بۇزۋشىلىقتار 127 كاسىپكەرلىك سۋبەكتىنىڭ وتىنىشتەرىن قاراۋ بارىسىندا دا ورىن العان. سونداي-اق, اتقارۋشى ورگاندار 2012 جىلى جەر ۋچاسكەلەرىن تابىستاۋ تۋرالى 22 سوت شەشىمىنىڭ تەك 1-ەۋىن عانا ورىنداعان ەكەن.
تەكسەرۋ بارىسى جەكە جانە زاڭدى تۇلعالارعا جەكە تۇرعىن ءۇي قۇرىلىستارى مەن كاسىپكەرلىك ماقساتقا سۋ قورعاۋ ايماقتارىنان دا جەر تەلىمدەرى بەرىلىپ كەتكەنىنە كوز جەتكىزدىردى. مىسالى, حالىققا قىزمەت كورسەتۋ ورتالىعىنىڭ ماڭىنداعى اۋداننان «بيس-ستروي» جشس-ىنە جانە «بيزنەس-ينتەركونتي» جشس-نە جەر ۋچاسكەلەرى تابىستالۋىن وسىلاي باعالاۋعا بولادى. اتالعان ۋچاسكەلەر سۋ قورعاۋ بەلدەۋىنەن شامامەن 20-22 مەتر اراقاشىقتىقتا عانا تۇر.
ۇكىمەتتىڭ «جەر ۋچاسكەسىن نەمەسە جەر ۋچاسكەسىن جالداۋ قۇقىعىن ساتۋ جونىندەگى ساۋدا-ساتتىقتى (كونكۋرستاردى, اۋكتسيونداردى) ۇيىمداستىرۋ جانە وتكىزۋ ەرەجەسىن بەكىتۋ تۋرالى» قاۋلىسىنىڭ 4-تارماعىنىڭ 1-تارماقشاسىنا ساي, ساتۋشىنىڭ ايرىقشا فۋنكتسيالارىنىڭ ءبىرى جەرگىلىكتى وكىلدى ورگان بەكىتكەن تىزبەگە سايكەس ناقتى جەر ۋچاسكەلەرىن جانە جەر ۋچاسكەسىن جالداۋ قۇقىعىن انىقتاۋ بولىپ تابىلادى. الايدا, 2011-2012 جىلدارى اۋكتسيون ارقىلى تابىستالاتىن جەر ۋچاسكەلەرىنىڭ ءتىزىمىن قىزىلوردا قالاسى اكىمى قۇزىرەتى شەگىنەن تىس شىعىپ كەتىپ, ءوز قاۋلىلارىمەن بەكىتىپ جىبەرگەن. وسىنىڭ سالدارىنان قالا اۋماعىندا 214 جەر ۋچاسكەسى ەشقانداي نەگىزسىز بەرىلىپ كەتكەن.
تاعى ءبىر ايتا كەتەتىن جاعداي, كودەكسكە 2011 جىلعى 16 تامىزدا جەكە تۇرعىن ءۇي قۇرىلىسى ءۇشىن جەر ۋچاسكەسىنە ۋاقىتشا وتەۋلى جەر پايدالانۋ (جالداۋ) قۇقىعىن تابىستاۋ جونىندە وزگەرىس ەنگىزىلدى. الايدا, قىزىلوردا قالاسى اكىمدىگى بۇعان پىسقىرىپ تا قاراعان جوق. ول 2012 جىلى جەكە تۇرعىن ءۇي قۇرىلىسى ءۇشىن 287 جەر ۋچاسكەسىن تابىستاسا, سونىڭ 90-ى جەكە مەنشىكتىڭ پايداسىنا ۇسىنىلعان. وسىعان وراي وبلىستىق پروكۋراتۋرا تاياۋدا وبلىس اكىمىنىڭ اتىنا اتالعان جاعدايلاردى الدىن الۋعا باعىتتالعان ناقتى شارالاردى قابىلداۋ جونىندە پروكۋرورلىق ىقپال ەتۋ اكتىسىن ەنگىزدى.
جالپى, وبلىستىق پروكۋراتۋرا ورگاندارى جەر قاتىناستارى سالاسىنداعى زاڭدىلىقتاردىڭ ساقتالۋىنا جۇرگىزگەن 10 تەكسەرۋىندە 463 زاڭ بۇزۋشىلىقتى انىقتاپ, 7 ۇسىنىس ەنگىزگەن. وسىنىڭ ناتيجەسىندە 12 تۇلعا تارتىپتىك جازا العان. بۇلاردىڭ ءوزىنىڭ 5-ەۋى سىبايلاس جەمقورلىق سيپاتىنداعى جاۋاپكەرشىلىككە تارتىلعان.
راس, مۇنىڭ ءبارى قالانىڭ بۇرىنعى باسشىلىعى تۇسىندا ورىن العان. سول سەبەپتى دە وبلىس ورتالىعىنىڭ جاڭا اكىمى نۇرلىبەك نالىباەۆ كەمشىلىكتەردى جويۋ ماقساتىندا كەشەندى شارالار اتقارىلاتىنىن مالىمدەدى. ال اۋماقتىق جەر ينسپەكتسياسىنىڭ باستىعى باعدات مۇحامەدوۆ بۇعان دەيىن جەر ماسەلەسى وبلىس اكىمدىگى مەن وبلىس پروكۋراتۋراسىنىڭ القا ماجىلىستەرىندە بىرنەشە رەت كوتەرىلگەنىنە قاراماستان, ءبارى «باياعى جارتاس – ءبىر جارتاس» كۇيىندە قالىپ وتىرعانىن دا جاسىرماي ايتتى. بۇعان وبلىس پروكۋرورى ساپاربەك نۇرپەيىسوۆ ەندىگى جەردە ايتىلعان ءسوزدىڭ ايتىلعان جەرىندە قالمايتىنىن ايتىپ جاۋاپ بەردى. ول ەندىگى كەزەكتە جەرگە قاتىستى ماسەلەنىڭ بارلىعى ۇدايى نازاردا بولىپ, كۇندەلىكتى باقىلاۋعا الىناتىنىن ەرەكشە اتاپ ءوتتى.
سەرىك ءپىرنازار,
«ەگەمەن قازاقستان».
قىزىلوردا.