سەيسەنبى, 9 ءساۋىر 2013 2:20
قازىرگى كۇندەرى باتىپ بارا جاتقان كەمەنىڭ ىشىندە الاسۇرىپ, بۇرىشتان بۇرىشقا قاشىپ جۇرگەن اتجالماننىڭ كەيپىن كەلتىرەتىن بتا-بانكتىڭ ءبىر كەزدەگى ديرەكتورلار كەڭەسىنىڭ توراعاسى مۇحتار ءابىلازوۆ پەن ونىڭ سىبايلاس جەمقورلىق سيپاتىنداعى ساربازدارىن بۇرىنعىدان بەتەر تۇيىققا تىرەيتىن تاعى ءبىر وقيعا ورىن الدى. بۇل اتىشۋلى «ءالي بابا جانە ونىڭ قىرىق قاراقشىسى» اتانعان كومانداعا جىعىلعان ۇستىنە جۇدىرىق بولىپ ءتيىپ جاتىر.
سەيسەنبى, 9 ءساۋىر 2013 2:20
قازىرگى كۇندەرى باتىپ بارا جاتقان كەمەنىڭ ىشىندە الاسۇرىپ, بۇرىشتان بۇرىشقا قاشىپ جۇرگەن اتجالماننىڭ كەيپىن كەلتىرەتىن بتا-بانكتىڭ ءبىر كەزدەگى ديرەكتورلار كەڭەسىنىڭ توراعاسى مۇحتار ءابىلازوۆ پەن ونىڭ سىبايلاس جەمقورلىق سيپاتىنداعى ساربازدارىن بۇرىنعىدان بەتەر تۇيىققا تىرەيتىن تاعى ءبىر وقيعا ورىن الدى. بۇل اتىشۋلى «ءالي بابا جانە ونىڭ قىرىق قاراقشىسى» اتانعان كومانداعا جىعىلعان ۇستىنە جۇدىرىق بولىپ ءتيىپ جاتىر.
البەتتە, ءبىز باسقاشا ءبىر جاعداي بولسا, جىعىلىپ جاتقانعا بۇلايشا كۇلمەگەن بولار ەدىك. ال مىنا جاعداي – ءتىپتى دە بولەك. بۇل ەلدەگى ەرتەلى-كەش بەلىن جازباي ەڭبەك ەتكەن قاراپايىم حالىقتىڭ تابان اقى, ماڭداي تەرىنەن قۇرالعان ادال اقشاسىن قوپارىپ الىپ كەتكەن قاراقشىلىقتى تايعا تاڭبا باسقانداي ەتىپ كورسەتىپ تۇرعان كورىنىستىڭ كەسكىنى بولىپ تابىلادى. بۇل – ەلدى توناۋشىلىقتىڭ وزگەشە ءبىر ۇلگىدەگى دايەكتى دەرەگى.
ال قارا قىلدى قاق جاراتىن قازىلار توبى البيون جەرىندە دە بار ەكەن. انگليانىڭ جوعارعى سوتى اتالمىش نوياندارعا قارسى پروتسەسس جۇرگىزۋ بارىسىندا كەزەكتى ءىستى ەشبىر بۇلتارىسسىز تاعى دا بتا-بانكتىڭ پايداسىنا شەشىپ بەردى. بۇل جولى «Drey ءىسى» (نەمەسە «DCM ءىسى») دەگەن اتپەن بەلگىلى بولعان قىلمىستىق ءىستى تالقىلاۋ شەڭبەرىندە ماسەلە قاراعان سوت م.ابىلازوۆتەن 2 ملرد. اقش دوللارى كولەمىندەگى قاراجاتتى ۇستەمە پايىزىمەن قوسىپ ءوندىرىپ الۋعا ۇكىم ەتتى. سوت, سونداي-اق, وسى ءىستىڭ اياسىندا بانكتىڭ بۇرىنعى باسقارما توراعاسى رومان سولودچەنكودان 400 ملن. دوللار مولشەرىندە تولەم ءوندىرۋ جونىندە ۇيعارىم جاسادى.
سۋديا نايدجەل تير شىڭىراۋ تۇبىنەن شىندىقتى ىزدەۋ بارىسىندا بۇدان دا ارى كەتتى. ول «Drey», «Granton» جانە «ۆيتينو» دەپ اتالعان ىستەردى قاراۋدىڭ ناتيجەسىندە قازاقستاندىق بتا-بانكتىڭ جوعارىداعى جەمقور جىلپوستاردىڭ ارقاسىندا قولدى بولىپ, قىر اسىپ كەتكەن قىرۋار اقشاسىنىڭ ءىزىن تاپ باستىرماي تاۋىپ, ولاردى قايتارۋدىڭ جولدارىن قاراستىردى. اتاپ ايتقاندا, بانك باسقارماسى توراعاسىنىڭ ورىنباسارى بولعان جاقسىلىق جارىمبەتوۆكە شامامەن 1,5 ملرد. دوللار كولەمىندەگى قارجىنى پايىزدىق ۇستەمەسىمەن قايتارۋدى مىندەتتەدى. سوت نازارىنان كيپردىڭ وسى وبىرلار توبىنا قىزمەت كورسەتكەن «Usarel Investment Limited» دەپ اتالاتىن كومپانياسى دا شەت قالعان جوق. ول وسى قىزمەتى ارقاسىندا اسا قۇندى اكتيۆ – رەسەيدىڭ اق تەڭىزدەگى ۆيتينو پورتىنا يەلىك ەتىپ قويعان ەكەن. فەميدانىڭ بەزبەنىن بەرىك ۇستاعان اعىلشىن سۋدياسى تاعى تىرس ەتكىزگەن جوق, سوزگە كەلمەستەن كومپانيانىڭ وسى جونىندەگى اكتسيالارىن ونىڭ زاڭدى يەسى – بتا-بانككە قايتارۋدى جۇكتەدى. ول, سونىمەن بىرگە, مۇنداي اكتسيالاردىڭ قۇنى 120 ملن. دوللاردان اسپايتىن بولسا, ولارعا پايىز قوسىپ تولەۋدى تاپسىردى. سوت قاراعان وسى ىستە بانكتىڭ ماسكەۋدەگى بۇرىنعى وكىلى يلدار حاجاەۆقا قاتىستى دا تارماقتار بار. ول جوعارىداعى ۆيتينوعا بايلانىستى ءبىراز تولەمدى ۇيىرىمەن ءۇيىپ قايتارۋعا ءتيىستى.
سۋديا نايدجەل تير ىستەردى قاراۋ قورىتىندىسىندا بتا-بانككە اسا ءىرى كولەمدەگى تيەسىلى اقشالاي قاراجاتتارىن قايتارۋعا شەشىم شىعارۋ ارقىلى ونىڭ تالاپ-ارىزىن تولىعىمەن قاناعاتتاندىرىپ قانا قويعان جوق, ول, سونىمەن بىرگە, ءابىلازوۆ پەن ونىڭ جارىمبەتوۆ, حاجاەۆ جانە باسقالارى سەكىلدى سىبايلاس سيپاتتاعى كومەكشىلەرىنىڭ جەكە باستارىنىڭ مۇددەلەرى ماقساتىندا الاياقتىق وپەراتسيالاردى قالاي جانە قاشان ورىنداعاندارىن وتە ءجىتى تەكسەرىپ, جەكە-جەكە ۇيعارىمدار جاساپ شىقتى. سوت سونداي-اق بانك اكتيۆىنەن زاڭسىز جولمەن شىعارۋدىڭ الاياقتىق مازمۇنداعى وپەراتسيالارى نىساناسىنا اينالعان قارجىلاردىڭ ەلگە تولىق قايتارىلۋىن دا بۇدان ءارى ۇدايى قاداعالاپ وتىراتىنىن تانىتىپ وتىر. ال بتا-بانك بۇرىنعىسىنشا انگلياداعى, تمد ەلدەرى مەن باسقا دا مەملەكەتتەردەگى ءابىلازوۆ پەن ونىڭ كومانداسى اكەتكەن كوپ قارجىسىن قايتارىپ الۋ پروتسەسىنە بەلسەنە قاتىسىپ تۇراتىن بولادى.
وسىمەن, ءابىلازوۆ پەن ونىڭ قاراقشىلارىنا قاتىستى تاعى ءبىر قامال الىندى. ۇياتتان جۇرداي ۇجدانسىز ۇرلىقتىڭ تاعى ءبىر تەمىر قورعانى بۇزىلدى.
ازىرگە وسىمەن ءسوز ءتامام.
جىرى ۇزاققا سوزىلعان بۇل حيكايانىڭ جالعاسىن كەلەر جولى ايتىپ بەرەرمىز. باتقان كەمەنىڭ بەيباقتارى تۋرالى اڭگىمە مۇنىمەن بىتپەيدى.
رۋسلان يگىلىك.