سەيسەنبى, 15 قاڭتار 2013 7:20
«الەۋمەتتىك-ەكونوميكالىق جاڭعىرتۋ – قازاقستان دامۋىنىڭ باستى باعىتى» اتتى جولداۋىندا مەملەكەت باسشىسى: «اكىمدەرگە حالىقتىڭ دەنەشىنىقتىرۋمەن جانە سپورتپەن جاپپاي اينالىسۋى ءۇشىن سپورتتىق ينفراقۇرىلىمداردىڭ قولجەتىمدىلىگىن كەڭەيتۋ تۋرالى ماسەلەنى شەشۋدى تاپسىرامىن. سوڭعى جىلدارى استانادا دا, وبلىستاردا دا كوپتەگەن سپورتتىق نىساندار سالىندى. ولارعا بالالار دا, ۇلكەندەر دە بارا المايدى دەگەن شاعىم كوپ.
سەيسەنبى, 15 قاڭتار 2013 7:20
«الەۋمەتتىك-ەكونوميكالىق جاڭعىرتۋ – قازاقستان دامۋىنىڭ باستى باعىتى» اتتى جولداۋىندا مەملەكەت باسشىسى: «اكىمدەرگە حالىقتىڭ دەنەشىنىقتىرۋمەن جانە سپورتپەن جاپپاي اينالىسۋى ءۇشىن سپورتتىق ينفراقۇرىلىمداردىڭ قولجەتىمدىلىگىن كەڭەيتۋ تۋرالى ماسەلەنى شەشۋدى تاپسىرامىن. سوڭعى جىلدارى استانادا دا, وبلىستاردا دا كوپتەگەن سپورتتىق نىساندار سالىندى. ولارعا بالالار دا, ۇلكەندەر دە بارا المايدى دەگەن شاعىم كوپ. وسى سپورتتىق عيماراتتاردىڭ ءبارىن دە قولجەتىمدى ەتۋ كەرەك. ادامدار سپورتپەن اينالىساتىن بولسىن», دەپ اتاپ وتكەن ەدى. مىنە, وسى جولداۋدا ايتىلعانداي, حالقىمىزدىڭ سپورتپەن شۇعىلدانۋى, دەنساۋلىعىن ساقتاۋى, ءسويتىپ, قاشاندا سالاماتتى ىسپەن اينالىسۋى ەلباسىنىڭ العا قويىپ وتىرعان باستى مىندەتتەرىنىڭ ءبىرى بولىپ تابىلادى. الايدا, وسىنداي جاقسىلىقتىڭ نەگىزى ەلوردادان باستالادى دەسەك, اسىرا ايتقاندىق ەكەن. ويتكەنى, جوعارىدا ءسوز بولعان سالاماتتى ىسپەن قالا تۇرعىندارىنىڭ جاپپاي اينالىسۋىنا استانا قالاسىندا ءتارتىپ جەتىسپەي جاتقان كورىنەدى. وعان سپورتتىق عيماراتتاردىڭ لاۋازىمدى تۇلعالارى جىبەرگەن بىرقاتار زاڭ بۇزۋشىلىقتار سەبەپ, دەيدى باس پروكۋراتۋرانىڭ تاپسىرماسىنا سايكەس وسى ءىستىڭ زاڭدىلىعىن تەكسەرگەن استانا قالاسىنىڭ پروكۋراتۋراسى.
پروكۋرورلار قالا اۋماعىندا ورنالاسقان سپورتتىق-ساۋىقتىرۋ كەشەندەرىنىڭ قىزمەتتەرىندەگى زاڭدىلىقتىڭ ساقتالۋى مەن تيىمدىلىك ماسەلەلەرى بويىنشا تەكسەرۋ وتكىزدى. سوندا بايقاسا, استانا اۋماعىندا 25 سپورتتىق عيمارات قىزمەت ەتەدى ەكەن. ونىڭ 3-ءۋى ۆەدومستۆولىق بولعاندىقتان, 22 نىسان عانا قالا تۇرعىندارىنا دەنەشىنىقتىرۋ جانە سپورتپەن اينالىسۋ ءۇشىن قىزمەتتەرىن ۇسىنا الادى. بۇل حالىق سانى جىل سايىن ءوسىپ كەلە جاتقان قالا ءۇشىن, ارينە, جەتكىلىكسىز. قازىرگى جاعدايدا وسى سپورت نىساندارى ءبىر مەزگىلدە 9851 ادامدى عانا قابىلداي الادى, ول تۇرعىنداردىڭ جالپى سانىنىڭ 1,2 پايىزىن عانا قۇرايدى. سونىمەن, استانا قالالىق پروكۋراتۋرا قىزمەتكەرلەرى انىقتاعانداي, سپورتتىق عيماراتتاردىڭ لاۋازىمدى تۇلعالارى جىبەرگەن زاڭ بۇزۋشىلىقتار: كوممۋنالدىق مەنشىك بولىپ تابىلاتىن سپورتتىق عيماراتتاردىڭ زاڭسىز جالعا بەرىلۋى; پايدالانۋعا قابىلدانباعان سپورتتىق نىسانداردى پايدالانۋ; نىسانداردى پايدالانۋ ماقساتىنان تىس قولدانۋ; شتاتتىق باپكەرلەر قۇرامىن جيناقتاماۋ; ءتيىستى بىلىكتىلىگى جانە ءبىلىمى جوق نۇسقاۋشىلارمەن سپورتتىق جاتتىعۋلار وتكىزۋ; جاس شاماسى ءتيىستى جاسقا تولماعان بالالاردى وقىتۋ جانە باسقا دا زاڭ بۇزۋشىلىقتار بولىپ انىقتالدى.
ماسەلەن, «داۋلەت» سپورت كومبيناتى» مقكك تۋريزم جانە سپورت اگەنتتىگى توراعاسىنىڭ بۇيرىعىمەن بەكىتىلگەن سپورت مەكتەپتەرىندە وقۋ-جاتتىعۋ ۇدەرىسىن ۇيىمداستىرۋ ءتارتىبى تۋرالى رەگلامەنتتىڭ 9-تارماعىن بۇزىپ, تەننيستەن باستاۋىش دايىندىق توپتارىنا بالالاردى جاس مولشەرىنە بايلانىستى شەكتەۋلەرگە قاراماستان قابىلداعان. ال اتالعان رەگلامەنتكە سايكەس توپقا قابىلداۋ 7-9 جاستان باستالادى. «الاۋ» مۇز سارايى» مقكك دوپتى حوككەي, شايبالى حوككەي, شورت-ترەك بويىنشا باستاۋىش دايىندىق توپتارىنا بالالاردى شەكتى جاس مولشەرىنە قاراماستان قابىلداۋ ارقىلى اتالعان رەگلامەنتتىڭ 9-تارماعى بۇزىلعان. ەرەجەگە سايكەس اتالعان توپتارعا بالالاردى قابىلداۋ 9-11 جاستان باستالادى. وسىلايشا, مقكك بۇيرىقتارىنا ءسايكەس, شايبالى حوككەيگە 9 جاسقا تولماعان – 41, شورت-ترەككە – 3, مانەرلەپ سىرعاناۋ توبىنا 6 جاسقا تولماعان 28 بالا قابىلدانعان.
ال ەڭ سوراقىسى, سپورت نىساندارىنىڭ قاۋىپسىزدىك شارالارى ءتيىستى تۇردە قامتاماسىز ەتىلمەيتىن كورىنەدى. نىسانداردىڭ بارلىعىندا دەرلىك تەحنيكالىق رەتتەۋ جانە مەترولوگيا, ءورت قاۋىپسىزدىگى مەن سانيتارلىق-ەپيدەميولوگيالىق نورمالاردىڭ بۇزىلعاندىعى كەزدەسەدى. سونداي-اق, قىزمەتكەرلەردىڭ مەديتسينالىق كىتاپشالارىندا ساراپتامادان وتكەندىگى تۋرالى جالعان بەلگى قويىلۋى بويىنشا 68 دەرەك انىقتالعان. جانە سپورت نىساندارىندا 1700 بىرلىكتەن استام سەنىمسىز ولشەم قۇرالدارى (مونومەترلەر, ولشەگىشتەر) قولدانىلادى ەكەن. ەندى, جوعارىدا ايتقانىمىزداي, استاناداعى مۇنداي كەلەڭسىزدىكتەر قاشان تۇزەلەدى؟
الەكساندر تاسبولاتوۆ,
«ەگەمەن قازاقستان».