رەسپۋبليكالىق اپتالىقتىڭ ماقساتى – تاراز قالاسى جانە جامبىل, بايزاق اۋداندارىنىڭ مەملەكەتتىك قىزمەتشىلەرگە, مۇعالىمدەرگە, جاستار مەن وقۋشىلارعا, جالپى كوپشىلىككە جانە رەسپۋبليكانىڭ ءار وڭىرىنەن كەلگەن ءتىل ماماندارىنا قازاق ءالىپبيىنىڭ ماڭىزى مەن جاڭا ەملە-ەرەجەلەرىنىڭ مازمۇنىن ءتۇسىندىرۋ, ۇلتتىق جازۋدىڭ بولاشاعى تۋرالى اقپارات بەرۋ. اقپاراتتىق كەزدەسۋلەر, دارىستەر مەن سەمينارلار قوعامنىڭ ءار ءتۇرلى الەۋمەتتىك توپتارىن قامتيدى.
اپتالىق 24-ماۋسىمدا تاراز قالاسىندا ىقىلاس دۇكەن ۇلى اتىنداعى مادەنيەت ۇيىندەگى اۋقىمدى شارامەن اشىلادى. بۇل شاراعا قر پارلامەنتىنىڭ دەپۋتاتتارى, قوعام قايراتكەرلەرى, جازۋشىلار, عالىمدار, ادىسكەرلەر جانە كوپشىلىك قاۋىم قاتىسادى. مۇندا مەملەكەتتىك ءتىلدىڭ مارتەبەسى, قازاق ءتىلىنىڭ لاتىن الىپبيىنە كوشۋى سياقتى ىرگەلى ماسەلەلەر ايتىلادى.
25-ماۋسىمدا اسا كەنتىندە جانە 27-ماۋسىمدا سارىكەمەر كەنتىندە اقپاراتتىق-ناسيحات توبى مەملەكەتتىك قىزمەتشىلەرگە, مۇعالىمدەرگە جانە اۋدان جۇرتشىلىعىنا قوعامدىق دارىستەر جۇرگىزەدى. 26-ماۋسىمدا تاراز قالاسىندا ءبىلىم, دەنساۋلىق ساقتاۋ قىزمەتكەرلەرىنە, وقۋشىلارعا جانە ەتنوس وكىلدەرىنە «قازاق ءتىلىنىڭ دامۋى – ۇلتتىڭ دامۋى» تاقىرىبىندا دارىستەر ۇيىمداستىرىلادى. وسىنداي ءدارىس 27-ماۋسىمدا پروكۋراتۋرا قىزمەتكەرلەرىنە دە جۇرگىزىلەدى. قوعامدىق دارىستەردە مەملەكەتتىك ءتىلدىڭ قولدانىس اياسىن كەڭەيتۋ, جاڭا الىپبيگە كوشۋ جۇمىستارىنىڭ بارىسى جونىندە جالپى كوپشىلىككە تولىق ماعلۇماتتار بەرىلەدى. 27-ماۋسىمدا م.دۋلاتي اتىنداعى تاراز مەملەكەتتىك جانە تاراز پەداگوگيكالىق ۋنيۆەرسيتەتتەرىندە نۇر-سۇلتان, الماتى قالالارىنان كەلگەن عالىمدار رەسپۋبليكادان شاقىرىلعان جانە جەرگىلىكتى ادىسكەرلەر مەن مۇعالىمدەرگە جاڭا ءالىپبي, ونىڭ ەملە ەرەجەلەرى جونىندە ادىستەمەلىك سەمينارلار جۇرگىزەدى. 28-ماۋسىمدا جاڭا الىپبيگە بايلانىستى رەسپۋبليكالىق جانە وڭىرلىك شارالاردى ۇيلەستىرۋ بويىنشا سەمينار-كەڭەس ۇيىمداستىرىلادى.
رەسپۋبليكالىق اپتالىقتىڭ جۇمىسىن قورىتىندىلاۋ شاراسى 28-ماۋسىمدا وتكىزىلەدى. مۇندا ۇزدىك كابينەت, ماڭدايشا, ساباق, ادىسكەر نوميناتسيالارى بويىنشا جانە اپتالىقتىڭ وتۋىنە اتسالىسقان قىزمەتكەرلەردى ماراپاتتاۋ ءراسىمى بولادى.