سارسەنبى, 22 مامىر 2013 1:23
وزىنىكى دۇرىس, وزگەنىكى بۇرىس
سولتۇستىك كورەيا وسى ايدىڭ سوڭىندا اقش سىناقتان وتكىزگەلى وتىرعان قۇرلىقارالىق بالليستيكالىق زىمىران ۇشىرىلىمىن ارانداتۋ ءۇشىن جاسالىپ وتىرعان ارەكەت دەپ مالىمدەدى. ال بۇل ەلدىڭ ءوزى بولسا, وتكەن سەنبى كۇنى شاعىن راديۋستاعى باسقارىلاتىن ءۇش زىمىران ۇشىرعان بولاتىن.
سارسەنبى, 22 مامىر 2013 1:23
وزىنىكى دۇرىس, وزگەنىكى بۇرىس
سولتۇستىك كورەيا وسى ايدىڭ سوڭىندا اقش سىناقتان وتكىزگەلى وتىرعان قۇرلىقارالىق بالليستيكالىق زىمىران ۇشىرىلىمىن ارانداتۋ ءۇشىن جاسالىپ وتىرعان ارەكەت دەپ مالىمدەدى. ال بۇل ەلدىڭ ءوزى بولسا, وتكەن سەنبى كۇنى شاعىن راديۋستاعى باسقارىلاتىن ءۇش زىمىران ۇشىرعان بولاتىن.
بۇۇ باس حاتشىسى پان گي مۋن سولتۇستىك كورەيانىڭ سول جولعى ۇشىرىلىمدارىنا الاڭداۋشىلىق ءبىلدىرىپ, مۇنى ارانداتۋ ارەكەتتەرى دەپ مالىمدەدى. بۇۇ باس حاتشىسى پحەنياندى مۇنداي ءىس-قيمىلدان باس تارتۋعا شاقىرىپ, يادرولىق پروبلەما جونىندەگى التى جاقتى پىشىندەگى كەلىسسوز ۇستەلىنە وتىرۋدى ۇسىندى. وڭتۇستىك كورەيا دا كورشىلەرىنىڭ جاقىنداعى ءىس-ارەكەتىن ايىپتاعان پىكىرىن ءبىلدىردى.
قۇيىن قۇرباندىقتارى ارتا تۇسۋدە
اقش-تىڭ وكلاحوما شتاتىنا وسى ءوڭىر تاريحىنداعى ەڭ كۇشتى تورنادو قايتا اينالىپ سوقتى. تابيعات اپاتىنىڭ بۇل جولعى سالدارى اسا اۋىر بولىپ وتىر. سۇراپىل قۇيىننان قازا تاپقاندار سانى قازىردىڭ وزىندە 90 ادامنان اسىپ تۇسكەن. ولاردىڭ اراسىندا بالالار كوپ.
تورنادونىڭ كۇشتى بولعانى سونشالىق, اعاشتاردى تامىرىمەن قوپارىپ تاستاعان. وكلاحوما ءسيتيدىڭ ماڭىنداعى 55 مىڭ ادام تۇراتىن مۋر قالاسى جەرمەن-جەكسەن بولعان. 100-دەن استام ادام اۋىر جاراقات السا, كوپشىلىگى ءال ۇستىندە كورىنەدى. اتالعان قالاداعى باستاۋىش مەكتەپ تۇگەل قيراپ قالعان. ەلەكتر جەلىلەرى ۇزىلگەن. ەل پرەزيدەنتى باراك وباما تابيعات اپاتىن شتاتتاعى ەڭ سۇمدىق وقيعا دەپ اتاپ, جەرگىلىكتى بيلىككە اپاتتىڭ سالدارىن جويۋ ءۇشىن كومەك كورسەتۋگە بۇيرىق بەرگەن.
جارىلىستاردان 43 ادام وپات بولدى
يراكتىڭ بااكۋبا قالاسىنداعى سۇننيتتەر مەشىتتەرىنىڭ بىرىندە جاسالعان ەكى جارىلىستان كەم دەگەندە 43 ادام قازا تاپتى. جارالانعاندار سانى بۇدان دا كوپ. لاڭكەستىككە جاۋاپكەرشىلىكتى ەشقانداي ۇيىم ءوز موينىنا الماعان. بىراق, جارىلىستاردى راديكالدى كوڭىل كۇيدەگى شيتتەر جاسادى دەگەن پىكىر باسىم.
سوڭعى ايلاردا يراكتا ءدىني اۋانداعى لاڭكەستىك شابۋىلدار سانى كۇرت ارتا ءتۇسىپ وتىر. ولاردىڭ كوپشىلىگىن قازىرگى شيت بيلىگىنە نارازى سۇننيتتەر جاساۋدا. ويتكەنى, شيتتەر سۇننيتتەردى ءىس جۇزىندە «ەكىنشى سورتتاعى» ادامدار ەتىپ تاستاعان. ال مەشىتتەگى جارىلىستارعا كەلسەك, العاشقىسى ادامدار مەشىتتەن شىعا بەرگەن ساتتە جاسالسا, ەكىنشىسى كوپشىلىك ولارعا كومەككە ۇمتىلعان كەزدە ورىن العان.
قىلمىسپەن كۇرەس كۇشەيە ءتۇستى
ۆەنەسۋەلانىڭ تاعى ءۇش شتاتى – لارا, سۋليا جانە كارابوبو شتاتتارىنا قىلمىسپەن كۇرەس جۇرگىزىپ, قاۋىپسىزدىكتى قامتاماسىز ەتۋ ءۇشىن اسكەر بولىمشەلەرى ەنگىزىلدى. بۇل جونىندە وسى ەل پرەزيدەنتى نيكولاس مادۋرو حابارلادى.
ءسويتىپ, قازىرگى كەزدە اتالعان شتاتتاردا «قاۋىپسىز وتان» جوسپارىن جۇزەگە اسىرۋ جۇرگىزىلىپ جاتىر. كۇرەس ناتيجەلى بولۋى ءۇشىن ەل باسشىسى بۇكىل حالىقتىڭ قولداۋىن ءوتىندى. ويتكەنى, دەيدى مادۋرو, تۇراقتىلىقتى قامتاماسىز ەتۋ بۇكىل ەل ءۇشىن اسا ماڭىزدى. جالپى, جوعارىداعى ءۇش شتات اۋماعىنا شامامەن 12 مىڭ اسكەري ورنالاستىرىلىپتى. ال ۆەنەسۋەلا الەمدەگى ەڭ قىلمىستى مەملەكەتتەردىڭ ءبىرى بولىپ سانالادى. مىسالى, وتكەن جىلى ەلدە 22 مىڭ ادام كىسى قولىنان قازا تاپسا, بۇل ادام ءولتىرۋ 2011 جىلمەن سالىستىرعاندا 14 پايىزعا ارتىپ كەتكەنىن كورسەتەدى.
ەر-ريادتا التىن ستانسا سالىنادى
ساۋد ارابياسىنىڭ استاناسىندا التىننان مەترو ستانساسى سالىنادى. ونىڭ قۇرىلىسىنا اقشانى ساۋديا كورولى ابداللا ءوز قالتاسىنان تولەيدى. بۇل اقپاراتتى «يندەپەندەنت» باسىلىمى تاراتتى.
ەر-ريادتىڭ قارجى اۋدانىنداعى جاڭا ستانسانىڭ اۋماعى 20 مىڭ شارشى مەتردى قۇرايتىن بولادى. ول مەترونىڭ ءارى كەتكەندە 4 جىل ىشىندە سالىنۋى جوسپارلانىپ وتىرعان جاڭا جەلىسىندە ورنالاسادى. ستانسانىڭ نەگىزگى بولىگى ءمارماردان سالىنسا, قابىرعالارى التىننان قۇيىلعان تاباقشالارمەن اشەكەيلەنەدى. ءسويتىپ, ول الەمدەگى ەڭ قىمبات, ءارى سوڭعى ۇلگىدە جاسالعان ستانسالار قاتارىنان ورىن الماقشى.
اسكەري بازا كىم ءۇشىن ءتيىمدى؟
ارمەنيانىڭ «مۇرا» دەپ اتالاتىن وپپوزيتسيالىق پارتياسىنان دەپۋتات زارۋي پوستاندجيان رەسپۋبليكا اۋماعىندا ورنالاسقان رەسەيدىڭ اسكەري بازاسى ءۇشىن جالگەرلىك اقى تالاپ ەتتى. بۇل جونىندە ول پارلامەنت وتىرىسىندا مالىمدەمە جاساعان.
ز.پوستاندجيان ءوزىنىڭ تالابىن ارمەنيا ساتىپ الاتىن رەسەي گازىنا باعانىڭ وسۋىمەن تۇسىندىرگەن. «ءبىز ءوز تاۋارىمىزدى تەگىن ۇسىنامىز, ال ولار ءوز تاۋارلارى ءۇشىن باعانى كوتەرەدى. بۇل – ءبىزدىڭ سىرتقى ساياساتىمىزدىڭ قاۋقارسىزدىعىن كورسەتەدى», دەيدى دەپۋتات. ءسوز رەتىندە رەسەيدىڭ 102-ءشى بازاسى ارمەنيانىڭ سولتۇستىگىندەگى گيۋمري اۋدانىندا 1990-شى جىلداردىڭ ورتاسىندا قۇرىلعانىن ايتا كەتەيىك. تۇتاستاي العاندا, بۇل بازا ارمەنيا قاۋىپسىزدىگىنىڭ مۇددەسىنە سايكەس كەلەدى.
قىسقا قايىرىپ ايتقاندا:
يندونەزيانىڭ شىعىسىنداعى شاحتانىڭ تىرەۋلەرى وپىرىلىپ قۇلاپ تۇسۋىنەن قازا بولعان كەنشىلەر سانى 12 ادامعا جەتتى. بۇل الەمدەگى التىن مەن مىس وندىرەتىن ەڭ ۇلكەن كەنىش بولىپ تابىلادى. ءۇيىندى استىندا كەم دەگەندە 15 ادام قالىپ وتىرعان سىڭايلى.
سيريادان قاشقان بوسقىندار سانى قازىرگى كەزدە 1 ملن. 515 مىڭ 639 ادامدى قۇرايدى. بۇلار تىركەلگەن بوسقىندار سانى. سونداي-اق, سيريانىڭ ءوز ىشىندە كوشىپ جۇرگەندەر سانى 4 ملن.-عا جەتىپ جىعىلادى ەكەن. ەلدە جانجال باستالعالى بەرى 80 مىڭ ادام كوز جۇمعان.
قىتايدىڭ وڭتۇستىك جانە ورتالىق ايماقتارىنا جاۋعان نوسەر جاڭبىر 55 ادامنىڭ ولىمىنە سوقتىرعان. 14 ادامنىڭ تاعدىرى بەلگىسىز. ەڭ كوپ زارداپ شەككەن وڭتۇستىكتەگى گۋاندۋن پروۆينتسياسى دەلىنۋدە. سوڭعى كۇندەرى مۇندا 30-دان استام ادام كوز جۇمىپتى.
تايلاندتىڭ وڭتۇستىگىندەگى سۋنگاي-كولوك قالاسىنداعى قوناق ۇيدە جارىلعان بومبا 1 ادامنىڭ ءومىرىن قيسا, 5-ەۋىن جارالاپ كەتكەن. ەلدىڭ بۇل وڭىرىندە نەگىزىنەن مۇسىلماندار تۇرادى. پوليتسيانىڭ ۇستانىمىنشا, جارىلىس سەپاراتيستەر قولىمەن جاسالىپ وتىر.
سولتۇستىك كورەيا تەڭىزشىلەرى ۇستاعان قىتايدىڭ بالىق اۋلايتىن كەمەسى قىتاي سىرتقى ىستەر مينيسترلىگىنىڭ رەسمي تالابىنان كەيىن بوساتىپ جىبەرىلگەن. كەمەنىڭ يەسى يۋي سيۋەتسزيۋننىڭ سوزىنە قاراعاندا, بالىقشىلاردىڭ بارلىعى ءدىن امان. ال كيكىلجىڭنىڭ قالاي رەتتەلگەنى تۋرالى ناقتى اقپارات جوق.
ينتەرنەت ماتەريالدارى نەگىزىندە ازىرلەندى.