تاريحى 2013 جىلدان تامىر تارتاتىن تەاتر ونەرىنىڭ دۋمانى ءداستۇرلى تۇردە وسىمەن جەتىنشى مارتە ۇيىمداستىرىلىپ وتىر. فەستيۆالدە ەلىمىزدىڭ جانە تاياۋ شەتەلدىڭ ايتۋلى 15 تەاتر ۇجىمى باس قوسىپ, ءبىر اپتا بويى ءوز ونەرلەرىن ورتاعا سالدى. ولاردىڭ بەسەۋى ەلوردالىق, اتاپ ايتساق: «جاستار» تەاترى م.اۋەزوۆ پەن ق.مۇحامەدجانوۆتىڭ «ايمان-شولپان» مۋزىكالىق كومەدياسىن (رەجيسسەرى – نۇرقانات جاقىپباي), م.گوركي اتىنداعى مەملەكەتتىك اكادەميالىق ورىس دراما تەاترى م.گوركيدىڭ «وتەتس» (رەجيسسەرى – يوناس ۆايتكۋس), ق.قۋانىشباەۆ اتىنداعى مەملەكەتتىك اكادەميالىق مۋزىكالىق دراما تەاترى ءنيزاميدىڭ «ءلايلى-ءماجنۇن» (رەجيسسەرى – بارزۋ ابدراززاكوۆ) قويىلىمدارىن دوداعا قوسسا, تالانتتى جاس رەجيسسەر فارحاد مولداعاليدىڭ «Nomad City Hall» كومەديا تەاترىندا قويعان ۋ.شەكسپيردىڭ «ريچارد ءىىى» تراگەدياسى مەن قازاقستاننىڭ ەڭبەك سىڭىرگەن قايراتكەرى نۇركەن وتەۋىلوۆتىڭ جەكەمەنشىك تەاترى ساحناسىندا قويىلعان «جان» مونوسپەكتاكلى دە ساراپشىلار تالقىسى مەن جالپى تەاترسۇيەر قاۋىم نازارىنا ۇسىنىلدى. بۇدان بولەك, فەستيۆال باعدارلاماسىنا ەنگەن ن.پوگودين اتىنداعى سولتۇستىك قازاقستان دراما تەاترى (پەتروپاۆل), اسانالى ءاشىموۆتىڭ «جاڭا عاسىر» تەاترى (الماتى), ج.ايماۋىتوۆ اتىنداعى پاۆلودار وبلىستىق قازاق مۋزىكالىق دراما تەاترى (پاۆلودار), س.سەيفۋللين اتىنداعى وبلىستىق قازاق دراما تەاترى (قاراعاندى), شىعىس قازاقستان وبلىسىنىڭ دراما تەاترلارى شەتەلدىك قوناقتار – وزبەكستان مەملەكەتتىك دراما تەاترى (تاشكەنت قالاسى), «ۋ موستا» پەرم تەاترى (رەسەي, پەرم قالاسى), جاڭا كوركەم تەاترى (رەسەي, چەليابى قالاسى), «Pilies» تەاترى (ليتۆا, كلايپەدا قالاسى), ب.قىدىكەەۆ اتىنداعى قىرعىز مەملەكەتتىك جاس كورەرمەندەر تەاترى (بىشكەك قالاسى) ۇجىمدارىمەن بىرگە باس شاھار تەاترلارى ساحناسىن تەڭدەي ءبولىسىپ, شىعارماشىلىق قارىمىن ورتاعا سالدى. ونەر ۇجىمدارىنىڭ ىزدەنىسىنە تەاترتانۋشى, تەاتر سىنشىسى, دراماتۋرگ, ع.مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىنىڭ كوركەمدىك جەتەكشىسى ەركىن جۋاسبەك, ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىنىڭ كوركەمدىك جەتەكشىسى, تەاتر جانە كينو رەجيسسەرى, قازاقستاننىڭ حالىق ءارتىسى تالعات تەمەنوۆ, ونەرتانۋ دوكتورى, تەاتر سىنشىسى, گيتيس-رەسەي تەاتر ونەرى ينستيتۋتىنىڭ پروفەسسورى – نينا شاليموۆا, تەاتر سىنشىسى, ونەرتانۋ كانديداتى, ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ دوتسەنتى انار ەركەباي, رەسەي حالىق ءارتىسى, «التىن ۆيتياز» حالىقارالىق كينوفورۋمىنىڭ پرەزيدەنتى نيكولاي بۋرلياەۆ باستاعان ساراپشى ماماندار تورەلىك ەتتى.
– حالىقارالىق «SAMGAU» تەاتر فەستيۆالىن سوڭعى جەتى جىل كولەمىندە ەلوردا ەسىمىمەن ەگىز اتالىپ كەلە جاتقان, بۇگىندە باس قالانىڭ برەندىنە اينالىپ ۇلگەرگەن ساحنا دۋمانى, تەاتر الەمىنىڭ ايتۋلى وقيعاسى دەسەك, ارتىق ەمەس. سامعاۋ ءسوزىنىڭ ماعىناسى وتە كەڭ. وسى جىلدار ىشىندە فەستيۆال ءوزىنىڭ باستى مىندەتى – ەلوردا مادەنيەتىن دامىتۋ جانە قازاقستاندىق تەاتر ونەرىنە دەگەن قىزىعۋشىلىقتى ارتتىرۋ, شەتەلدىك سەرىكتەستەرمەن رۋحاني-شىعارماشىلىق ىنتىماقتاستىقتى نىعايتۋ, گۋمانيتارلىق بايلانىستاردى كەڭەيتۋ سىندى الدىنا قويعان ماقساتتارىن ابىرويمەن ەڭسەرىپ كەلەدى. ءبۇگىندە «SAMGAU» – وتاندىق جانە الەمدىك تەاتر ونەرى ماماندارىنىڭ شىعارماشىلىق پىكىر الماسۋ الاڭى عانا ەمەس, ساحنا سالاسى قىزمەتكەرلەرى مەن استانالىق ونەر جاناشىرلارى ءۇشىن اسىعا كۇتەتىن سۇيىكتى ونەر مەرەكەسىنە دە اينالىپ ۇلگەردى. جىل سايىن فەستيۆالدىڭ قاناتىن كەڭگە جايىپ, گەوگرافيالىق اۋقىمىن ۇلعايتىپ, كاسىبي ءھام كوركەمدىك بيىككە ۇمتىلعانىنا كۋا بولىپ, قۋانىپ وتىرامىز. بيىلعى فەستيۆالدەن دە سونداي جاڭالىق, جارقىن ەموتسيالار كۇتەمىز», – دەيدى فەستيۆالدىڭ نەگىزىن قالاۋشىلاردىڭ ءبىرى, ساراپشىلار القاسىنىڭ توراعاسى, بەلگىلى تەاتر سىنشىسى ەركىن جۋاسبەك.
فەستيۆال شىمىلدىعى قازاقستاننىڭ ەڭبەك سىڭىرگەن قايراتكەرى رەجيسسەر نۇرقانات جاقىپبايدىڭ ساراپتاۋىندا كورەرمەن نازارىنا ۇسىنىلعان م.اۋەزوۆ پەن ق.مۇحامەدجانوۆتىڭ «ايمان-شولپان» كومەدياسىمەن اشىلدى. ال ساحنا دۋمانىن ەلوردانىڭ ەڭ جاس تەاترى – «Nomad City Hall» كومەديا تەاترى ۇجىمى ۋ.شەكسپيردىڭ «ريچارد ءىىى» تراگەدياسىمەن تۇيىندەدى.
ايتا كەتەيىك, «SAMGAU» حالىقارالىق تەاتر ونەرى باس قالا تورىندە 2013 جىلدان بەرى وتكىزىلىپ كەلەدى. وسى كۇنگە دەيىن شاراعا قازاقستاننىڭ ايماقتىق تەاترلارى – پاۆلودار, قاراعاندى, سولتۇستىك قازاقستان, قوستاناي, ماڭعىستاۋ, تۇركىستان, جامبىل, شىعىس قازاقستان, باتىس قازاقستان, اقمولا, اقتوبە, سولتۇستىك قازاقستان وبلىستارىنىڭ, سونىمەن قاتار اقتاۋ, اتىراۋ, الماتى, جەزقازعان, تالدىقورعان, تۇركىستان, ورال, وسكەمەن, شىمكەنت, سەمەي قالالارىنىڭ شىعارماشىلىق ۇجىمدارى قاتىسقان. سونداي-اق ورتالىق ازيا, رەسەي, ليتۆا, تۇركيا, داعىستان, گرۋزيا, ۋكراينا جانە سەربيا ەلدەرىنىڭ تەاتر ۇجىمدارى دا فەستيۆالدە ءوز ونەرلەرىن ورتاعا سالدى.