سەيسەنبى, 14 مامىر 2013 1:47
رەيحانلىداعى جارىلىسقا كىم كىنالى؟
تۇركيا وكىمەتى سيريامەن شەكارادا 46 ادامنىڭ قازا تابۋىنا اپارىپ سوقتىرعان رەيحانلى قالاسىنداعى جارىلىستى ۇيىمداستىردى دەگەن كۇدىكتىلەردى ۇستادى. وتكەن سەنبى كۇنى تۇركيا ىشكى ىستەر مينيسترلىگى قىلمىسقا كورشى سيريا كىنالى دەپ اتاعان بولاتىن. بىراق 12 مامىر كۇنى تەررورشىلاردىڭ تۇرىكتەر ەكەنى انىقتالعان.
سەيسەنبى, 14 مامىر 2013 1:47
رەيحانلىداعى جارىلىسقا كىم كىنالى؟
تۇركيا وكىمەتى سيريامەن شەكارادا 46 ادامنىڭ قازا تابۋىنا اپارىپ سوقتىرعان رەيحانلى قالاسىنداعى جارىلىستى ۇيىمداستىردى دەگەن كۇدىكتىلەردى ۇستادى. وتكەن سەنبى كۇنى تۇركيا ىشكى ىستەر مينيسترلىگى قىلمىسقا كورشى سيريا كىنالى دەپ اتاعان بولاتىن. بىراق 12 مامىر كۇنى تەررورشىلاردىڭ تۇرىكتەر ەكەنى انىقتالعان.
وسىعان بايلانىستى داماسك انكارانى شەكاراداعى جاعدايعا باقىلاۋ جاسامايدى دەپ ايىپتاپ وتىر. سيريا اۋماعىنا يزرايل اۋە سوققىلارىن جاساعاننان كەيىن وڭىردەگى احۋال بۇرىنعىدان بەتەر شيەلەنىسە ءتۇستى. «حەزبوللا» ۇيىمى بولسا تەل-ءاۆيۆتىڭ ارەكەتى يزرايل وككۋپاتسيالاعان اۋماقتاعى كۇرەستى جانداندىرۋعا تاپتىرماس سەبەپ دەپ ءتۇسىنىپ وتىر. ايتا كەتۋ كەرەك, رەيحانلىداعى جارىلىس 11 مامىر كۇنى ورىن العان بولاتىن. سونىڭ سالدارىنان 46 ادام قازا تاۋىپ, 120 ادام ءتۇرلى دەنە جاراقاتتارىن الدى.
بولگاريا بۇرىنعى تاڭداۋىندا قالدى
ەلدىڭ ەكس-پرەمەرى بويكو بوريسوۆ باسقاراتىن «ازاماتتار بولگاريانىڭ ەۋروپالىق دامۋى ءۇشىن» وڭشىل تسەنتريستىك پارتياسى مەرزىمىنەن بۇرىن وتكەن پارلامەنت سايلاۋىندا باسىم داۋىسقا يە بولدى. بۇل اقپارات الدىن-الا الىنعان رەسمي مالىمەتتەر نەگىزىندە تاراتىلىپ وتىر.
ۇستىمىزدەگى جىلدىڭ ناۋرىزىندا تكش قىزمەتى باعاسىنىڭ وسۋىنە بايلانىستى ورىن العان جاپپاي نارازىلىقتار سالدارىنان وتستاۆكاعا كەتۋگە ءماجبۇر بولعان ەكس-پرەمەردىڭ جەڭىسى بولگار استاناسىندا جاڭا نارازىلىق اكتسيالارىن تۋىنداتتى. ۇلتتىق مادەنيەت سارايى الدىندا وپپوزيتسيا بەلسەندىلەرى مەن پوليتسيا اراسىندا قاقتىعىستار ورىن العان. جۇزدەگەن نارازىلىق بىلدىرۋشىلەر قۇقىق قورعاۋ ورگاندارى وكىلدەرىنە تاس لاقتىرسا, پوليتسيا ءوز كەزەگىندە جينالعان توپتى رەزەڭكە توقپاقپەن ۇرىپ تاراتپاق بولعان.
بىرلەسكەن جاتتىعۋلار وتكىزۋدە
اقش پەن وڭتۇستىك كورەيا 13 مامىر كۇنى وڭتۇستىك كورەيا جاعالاۋلارىندا بىرلەسكەن اسكەري-تەڭىز جاتتىعۋلارىن باستادى. بۇل تۋرالى جەرگىلىكتى باسپاسوزگە سىلتەمە جاساي وتىرىپ, ۆۆس اگەنتتىگى حابارلاعان.
ەكى كۇنگە سوزىلاتىن جاتتىعۋلارعا امەريكالىق «نيميتس» اتومدى اۆياتاسىعىشى باستاعان سوققى بەرۋشى توپ قاتىساتىن بولادى. بۇل توپتىڭ قۇرامىنا سونىمەن بىرگە ەكى زىمىراندىق ەسمينەتس پەن زىمىراندىق كرەيسەر كىرمەك. وتكەن اپتادا سولتۇستىك كورەيا وكىمەتى كحدر-عا قارسى باعىتتالعان اشىق قوقان-لوقى جانە ارانداتۋ دەپ اتاي وتىرىپ, جاتتىعۋلار وتكىزۋگە قارسىلىق بىلدىرگەن بولاتىن. وندا «امەريكالىق جانە وڭتۇستىككورەيالىق جاۋلارىنىڭ يادرولىق سوعىس بەلسەندىلىگىنە بايلانىستى كورەيا تۇبەگىندەگى يادرولىق سوعىس تاۋەكەلى بۇرىنعىدان بەتەر وسە ءتۇستى», دەپ اتاپ كورسەتىلگەن.
يران سيريا جونىندەگى كونفەرەنتسياعا قاتىسۋعا دايىن
يران سىرتقى ىستەر ءمينيسترى الي اكبار سالەحي رەسەي مەن اقش ۇسىنعان يدەيا بويىنشا وتكىزىلەتىن سيريا جونىندەگى حالىقارالىق كونفەرەنتسياعا ءوز ەلىنىڭ قاتىسۋعا دايىن ەكەنىن مالىمدەدى.
نەمىستىڭ Der Spiegel گازەتىنە بەرگەن سۇحباتىنا سالەحي يراننىڭ ءالى كۇنگە دەيىن كونفەرەنتسياعا شاقىرتۋ الماعانىن, دەگەنمەن ءوز ەلىنىڭ وعان قاتىسۋعا دايىن ەكەنىن ايتقان. ونىڭ مالىمدەۋىنشە, يران تارابى ۇكىمەت پەن سيريا وپپوزيتسياسى اراسىنداعى كەلىسسوزدەردىڭ باستالۋىنا ىقپال ەتە الار ەدى. سونداي-اق سالەحي يراننىڭ كەز كەلگەن تاراپتىڭ جاپپاي قىرىپ-جوياتىن قارۋ پايدالانۋىنا ءپرينتسيپتى تۇردە قارسى ەكەنىن دە جەتكىزگەن.
ءمينيستردىڭ ورىنباسارى قاماۋعا الىندى
گرۋزيا ىشكى ىستەر ءمينيسترىنىڭ ءبىرىنشى ورىنباسارى گەلا حۆەدەليدزەنى 12 مامىر كۇنى ءىىم باس ينسپەكتسياسىنىڭ قىزمەتكەرلەرى تۇتقىنعا العان. مينيسترلىك ءباسپاسوز قىزمەتىنىڭ اقپاراتىنشا وعان گرۋزيا قىلمىستىق كودەكسىنىڭ 157-بابى, 2-بولىگىندە قاراستىرىلعان قىلمىس بويىنشا ايىپ تاعىلىپ وتىر.
تەرگەۋ گەلا حۆەدەليدزەنىڭ جۋرناليست گەورگي پارەساشۆيليدىڭ جەكە ءومىرى تۋرالى بەينەماتەريالدى ينتەرنەتتە زاڭسىز تاراتقانىن انىقتاعان. ىشكى ىستەر ءمينيسترى يراكلي گاريباشۆيليدىڭ ايتۋىنشا, گەلا حۆەدەليدزە ءوز كىناسىن مويىنداعان كورىنەدى. ال بەينەكادرلاردى تاراتۋعا كەلسەك, ول باق-تاردا ءىىم مەن ونىڭ جەكە وزىنە قاتىستى جالا جابۋ ناۋقانى باستالعاننان كەيىن ول وسىنداي قادامعا بارعان. «ءبىرتۇتاس ۇلتتىق قوزعالىس» وكىلدەرى حۆەدەليدزە تۇتقىندالعاننان كەيىن وزگە دە ادامدارعا قاتىستى تەرگەۋ ارەكەتتەرى جالعاساتىن بولادى دەپ كۇتۋدە.
كحدر-دا قورعانىس ءمينيسترى اۋىستى
گەنەرال-پولكوۆنيك چان چون نام سولتۇستىك كورەيا حالىق قارۋلى كۇشتەرىنىڭ جاڭا ءمينيسترى بولىپ تاعايىندالدى. ول وسى مىندەتتى سەگىز ايعا جۋىق اتقارعان گەنەرال كيم كەك سيكتى الماستىردى. بۇرىنعى مينيستردىڭ نەلىكتەن وتستاۆكاعا كەتكەنى ازىرگە بەلگىسىز.
كيم كەك سيك قورعانىس ءمينيسترى لاۋازىمىنا وتكەن جىلدىڭ قازان ايىندا تاعايىندالعان بولاتىن. شەتەلدىك باقىلاۋشىلاردىڭ پىكىرىنشە, وتستاۆكاعا كەتكەن مينيستر اسكەري باسشىلىقتا قاتاڭ ءتارتىپ ۇستانۋشىلاردىڭ ءبىرى بولعان. كەيبىر تۇجىرىمدار بويىنشا كحدر باسشىسى اسكەري باسشىلىقتى جاسارتۋ ماقساتىندا وسىنداي قادامعا بارىپ وتىر. ويتكەنى, كيم كەك سيكتىڭ جاسى 75-تە بولسا, ونىڭ ورنىنا كەلگەن مينيستر 50-دە.
كەننەديدى ولتىرگەن كىم؟
امەريكا قۇراما شتاتتارىنىڭ پرەزيدەنتى ريچارد نيكسوننىڭ بۇرىنعى كومەكشىسى رودجەر ستوۋن ءوزىنىڭ جاڭا كىتابىندا دجون ف.كەننەديدى قاتىگەزدىكپەن كوپشىلىك الدىندا ولتىرۋگە بۇيرىق بەرگەن ادامنىڭ ەسىمىن اتاعان.
رودجەر ستوۋننىڭ ايتۋىنشا, پرەزيدەنت كەننەديدىڭ اجالىنا ونىڭ داللاس اۋماعى بويىنشا قوزعالۋ باعىتىن تىكەلەي ءوزى بەكىتكەن ليندون ب.دجونسون كىنالى. ونىڭ ۇستىنە دجونسون كەننەديدى ءولتىردى دەپ تانىلعان لي حارۆي ءوسۆالدتىڭ اجال قۇشۋىنا سەبەپكەر بولعان دجەك رۋبيمەن دە بايلانىستا بولعان كورىنەدى. رودجەر ستوۋننىڭ كەننەدي ءولىمىنىڭ قۇپياسىن اشقان كىتابى ۇستىمىزدەگى جىلدىڭ قازان ايىندا ساۋداعا تۇسەتىن بولادى.
ينتەرنەت ماتەريالدارى نەگىزىندە ازىرلەندى.